تۇرسىن جۇرتباي. «بايتۇرسىنوۆ – باياعى بايتۇرسىنوۆ» (جالعاسى)
4.
ازاپتىڭ ازابى - تۇرمە مە، جوق، كونتسلاگەر مە؟ مۇنىڭ باعاسىن وسىناۋ قارعىس ساپارىن باسىنان كەشكەندەر بىلەدى. تۇرمەدە - جانىڭ قىستىعادى، ايداۋىلدا - ءتانىڭ شىرقىرايدى. ەكەۋى دە قورقىتتىڭ كورى. ايىرماشىلىعى جارىق دۇنيەنىڭ جارىعى. وسى ەكى دۇنيەنى سالىستىرۋ ءۇشىن ەمەس، ا.بايتۇرسىنوۆ باستاتقان الاش ارداگەرلەرىنىڭ ەلى ءۇشىن تارتقانتاۋقىمەتتى تاعدىرىنان حاباردار ەتۋ ءۇشىن احمەت بايتۇرسىنوۆتىڭ مىرجاقىپ دۋلاتوۆقا جازعان حاتتارىن نازارعا ۇسىنامىز. حاتتى ساقتاپ، جاريالانىمعا ۇسىنعان گۇلنار مىرجاقىپقىزى دۋلاتوۆا. مەنىڭ ويىمشا جازىلعان جايلارعا تۇسىنىك بەرىپ جاتۋدىڭ قاجەتى شامالى. تەك ادام اتتارىن جاقشانىڭ ىشىنە كىرىكتىرە كەتەمىز.
«كاسسر پ/و پوپوۆ وستروۆ 1-وە سولوۆەتسكوە وتدەلەنيە، سلاگ 1, لاگپۋنكت دۋلاتوۆۋ مير-ياكۋبۋ دۋلاتوۆيچۋ ارحانگەلسك، سولومبالا، 1-يا دەرەۆنيا، 1-يا لينيا، د. 9.
32 جىل، دەكابردىڭ 31-ءى.
مىرجاقىپ (دۋلاتوۆ), مىرزاعازى (ەسپولوۆ), عازىمبەك ء(بىرىمجانوۆ) قاراقتارىم!
مەن ارحانگەلگە 30-نويابردە كەلدىم. كۇن دەمالىس بولعاندىقتان، ەشكىمدى ىزدەپ تاۋىپ الۋعا مۇمكىن بولمادى. دالاعا تۇنەگەندەي بولىپ تۇنىمەن جاتپاي، كوشەدە قىدىرىپ جۇرۋمەن بولدىم. تاڭەرتەڭ بارعان ادام، كەلەسى تاڭەرتەڭگە دەيىن وتىرارعا جەر تاپپادىم. جانىمدا بىرگە بارعان 4-5 ادام، ولار دا سولاي بولدى.
4.
ازاپتىڭ ازابى - تۇرمە مە، جوق، كونتسلاگەر مە؟ مۇنىڭ باعاسىن وسىناۋ قارعىس ساپارىن باسىنان كەشكەندەر بىلەدى. تۇرمەدە - جانىڭ قىستىعادى، ايداۋىلدا - ءتانىڭ شىرقىرايدى. ەكەۋى دە قورقىتتىڭ كورى. ايىرماشىلىعى جارىق دۇنيەنىڭ جارىعى. وسى ەكى دۇنيەنى سالىستىرۋ ءۇشىن ەمەس، ا.بايتۇرسىنوۆ باستاتقان الاش ارداگەرلەرىنىڭ ەلى ءۇشىن تارتقانتاۋقىمەتتى تاعدىرىنان حاباردار ەتۋ ءۇشىن احمەت بايتۇرسىنوۆتىڭ مىرجاقىپ دۋلاتوۆقا جازعان حاتتارىن نازارعا ۇسىنامىز. حاتتى ساقتاپ، جاريالانىمعا ۇسىنعان گۇلنار مىرجاقىپقىزى دۋلاتوۆا. مەنىڭ ويىمشا جازىلعان جايلارعا تۇسىنىك بەرىپ جاتۋدىڭ قاجەتى شامالى. تەك ادام اتتارىن جاقشانىڭ ىشىنە كىرىكتىرە كەتەمىز.
«كاسسر پ/و پوپوۆ وستروۆ 1-وە سولوۆەتسكوە وتدەلەنيە، سلاگ 1, لاگپۋنكت دۋلاتوۆۋ مير-ياكۋبۋ دۋلاتوۆيچۋ ارحانگەلسك، سولومبالا، 1-يا دەرەۆنيا، 1-يا لينيا، د. 9.
32 جىل، دەكابردىڭ 31-ءى.
مىرجاقىپ (دۋلاتوۆ), مىرزاعازى (ەسپولوۆ), عازىمبەك ء(بىرىمجانوۆ) قاراقتارىم!
مەن ارحانگەلگە 30-نويابردە كەلدىم. كۇن دەمالىس بولعاندىقتان، ەشكىمدى ىزدەپ تاۋىپ الۋعا مۇمكىن بولمادى. دالاعا تۇنەگەندەي بولىپ تۇنىمەن جاتپاي، كوشەدە قىدىرىپ جۇرۋمەن بولدىم. تاڭەرتەڭ بارعان ادام، كەلەسى تاڭەرتەڭگە دەيىن وتىرارعا جەر تاپپادىم. جانىمدا بىرگە بارعان 4-5 ادام، ولار دا سولاي بولدى.
ءتۇندى سولاي وتكىزىپ، ەرتەڭىنە ابدوللانى (ابدوللا بايتاسوۆ) تاۋىپ الىپ، 17-دەكابرگە دەيىن سونىڭ ۇيىندە بولدىم. ونان كەيىن پاتەر تاۋىپ الىپ، بولەك شىقتىم. مۇندا پاتەر تابۋ دەگەن وتە قيىن جۇمىس ەكەن. تانىس ارقىلى بولماسا، ءوز بەتىنشە پاتەر تابۋ دەگەن بولمايدى. ابدوللا ءوزىنىڭ تانىستارى ارقىلى ارەڭ پاتەر تاۋىپ بەردى. كەلگەننەن بەرى ورىن ىزدەدىم. ءالى تابىلعان جوق. تالاي ۇمىتتەنگەن جەرگە تۇياق ىلىكپەي قالدى. بوس ورىندارعا - بىرىنە: ايدالعان بولعان سوڭ المايمىز دەيدى. بىرىنە: اۋەلى پروفسويۋز مۇشەسىن الامىز دەيدى. بىرەۋلەرىنە: ۇشەكەڭنىڭ (ترويكانىڭ) رۇقساتىن سۇرايمىز - دەپ، سۇراعاننان كەيىن، بولمايدى دەيدى. سونىمەن ءالى كۇنگە دەيىن ورىن ىزدەپ ساندالۋمەن ءجۇرمىن. ورىنسىز ادامعا نان كارتوچكەسىن، ستولوۆوي كارتوچكەسىن بەرمەيدى. ول كارتوچكەلەر بولماسا، ناندى، تاماقتى بازار باعاسىمەن الىپ ىشەسىڭ.
بازار قىمبات: ناننىڭ كيلوسى 5-6 سوم، بۋحانكاسى 25-30 سوم. ءسۇتتىڭ ءليترى 4-5 سوم، مايدىڭ كيلوسى 45-50 سوم. وعان قالاي اقشا شىداسىن. الىپ كەلگەن از اقشام الدەقاشان ءبىتىپ قالدى. ابدوللا مەن قىربالاسى ء(ا.بوكەيحانوۆ) ەكەۋىنىڭ اتسالىسۋىمەن جان ساقتاپ تۇرعان جاي بار. قىربالاسى ورىنىندا بولىپ، بۇرىنعى ادرەسىمەن تەز حابارلاستىم. سەندەرگە ورىن-مورىن تاۋىپ جايعاسىپ جازارمىن دەپ ەدىم. ول بولماعان سوڭ، كوڭىلدى حابار جازا الماي تۇرعان جاي بار.
قۇشاقتاپ سۇيەم، احمەت».
* * *
«اكسەر پ./و. پوپوۆ وستروۆ 1-وە سولوۆەتسكوە سلاگ 1, لاگپۋنكت، دۋلاتوۆۋ مير-ياكۋبۋ دۋلاتوۆيچۋ.
ارحانگەلسك، سولومبالا 1-يا دەرەۆنيا، 1-يا لينيا، دوم، 9. 26/11-33 ج.
دەندەرىڭ ساۋ، امان جۇرسىڭدەر مە؟ 31-دەكابردە ءبىر حات جازعان ەدىم. ونى العان - الماعاندارىڭنان دەرەك جوق. مەن ءالى ورىنعا كىرە الماي ءجۇرمىن. مەكەمەلەردى ىقشامداپ، جەر اۋدارىلعانداردى الماۋ دەگەن اعىن تۇسىنا كەز كەلىپ، ەش جەرگە ورنالاسا الماي تۇرعانىم. ورىن بولماعان سوڭ، قاي جاعىنان بولسا دا حال ناشار بولاتىنى بەلگىلى عوي.
ءبىر جاعىنان - اۋرۋ، ەكىنشى جاعىنان - سۋىق، ءۇشىنشى جاعىنان - اشتىق، ءۇش جاقتاپ قىسىپ، اركىمنىڭ اتسالىسقان كومەگى ارقاسىندا كۇنەلتىپ كەلە جاتقان جاي بار. بۇل قالىپپەن كوپكە بارماي ءبىر شەگىنە بارىپ تىناتىن شىعارمىن. قىربالاسى ء(ا.بوكەيحانوۆ) قولدان كەلگەن كومەگىن ىستەپ-اق جاتىر. بىراق كومەكپەن كۇنەلتۋ مۇندا وتە قيىن. قازىر قارا ناننىڭ كيلوسى 12 سومعا جەتتى. ول نە شىداتار؟ جۇمىستا بولماعان سوڭ، نان كارتوچكەسى دە جوق، ستولوۆوي ناندى كارتوچكەسىز بەرمەگەن سوڭ ناندى بازاردان الىپ جەمەسكە شاراڭ جوق. بازار باعاسى اناۋ. ونىمەن قانشا نان ساتىپ الۋعا، تويىنىپ تۇرۋعا بولار. قازىر ابدەن ارىقتاپ، جۇدەپ بولدىم. جىلى كيىمىم جوق.
كۇن مۇندا ارالداعىداي ەمەس. وتە سۋىق. اشتىق، ارىقتىق، سۋىق تاعى ءبىر جاعىنان اينالدىرعان سوڭ، ەل قالاي كۇنەلتپەك؟ ەلدىڭ حابارى وزدەرىڭە ءمالىم كۇيدە، جۇمىسى بىتكەن. قىربالاسىنىڭ ەل جايىنان جازعان حاتى قولدى بولىپ، قولىما تيگەن جوق. قۋجاق (گولوششەكين) ەكى جولداسىمەن (- ؟) ورنىنان تۇسكەن. جولداستارى كىم ەكەنىن جازبايدى. قازاق جايى - سوقىرعا كورىنگەن، ساڭىراۋعا - ەستىلگەن بولسا كەرەك.
ءالىمحان ەرمەكوۆ), اۋەزۇلى (مۇحتار) ەكەۋى ءتاۋبا قىلىپ شىققان. باسقالارى: سەيدازىم (قادىرباەۆ), مۇحامەدجان ت. (تىنىشباەۆ), ەكى دوس حالەل جانە جاھانشا دوسمۇحامەدوۆتەر), اقباي (جاقىپ) اقساق ىنىسىمەن ء(ابدىلحاميد), ءاشىم (وماروۆ), ۇزىن مۇحتار (مۇرزين) - بۇلار ۆورونەج قالاسىندا. اۋداندارىندا: كوشكە (كەمەڭگەروۆ), جۇماعالي (تىلەۋلين), مۇستافا (بۇرالقيەۆ), م. (مۇڭايتپاسوۆ) ءابدىراحمان، ءناشىر (قوجامقۇلوۆ), (جۇماقان) كۇدەرى بالاسى، ءبارى دە قىزمەتكە قاتىن-بالالارىمەن تۇرعان كورىنەدى. مەن دە: نە قاتىن-بالالارىما مۇندا كەلۋگە، نە مەنى وندا بارۋعا ۇرىقسات ەت - دەپ ماسكەۋگە ارىز بەرىپ ەدىم، حابارى جوق.
جاقىن ارادا جازۋشىنىڭ (م.گوركيدىڭ) بۇرىنعى قاتىنى (پەشكوۆا) باستىق بولىپ تۇرعان مەكەمە (قىزىل كرەست قوعامى) ارقىلى ارىز بەردىم. مۇندا قازىرگى جاي-كۇيىمنىڭ ءبارىن ايتىپ: ءولسىن دەمەسەڭدەر مەنى نە جىلى جاققا جىبەرىڭدەر، نە قاتىن-بالام تۇرعان جەرگە جىبەرىڭدەر. مەن بۇل كۇيدە تۇرعاندا ولەمىن - دەپ جازىپ وتىرمىن. مۇنان اناۋ قاتىن ارقىلى بىردەمە بولار دەگەن ءۇمىت بار. مۇنان ەش نارسە شىقپاسا، شىنىندا دا ءولۋ عانا قالادى.
مۇندا سروگى بىتكەندەردى دە بوساتا قويماي، ءبارىن وسىندا ۇستاپ وتىر ەكەن. سوڭعى كۇندەرى بوساتۋلارى سۇراپىل; كۇنى-ءتۇنى قاعازدارىن بەرىپ، قويشا اعىتىپ جاتىر. كۇنى بىتكەندەردەن ەشكىم قالاتىن كورىنبەيدى. وزدەرى:«قالام» - دەپ تىلەسە عانا قالدىرادى. مۇندا ابدوللا قاتىن-بالاسىمەن تۇرادى. ولار دا مەكەمە ىقشامداۋىنا ىلىگىپ ەدى، قاتىنى باسقا ورىن تاۋىپ كىردى دە، ءوزى بۇرىنعى ورنىنا 10 كۇننەن سوڭ قايتا كىردى. جاقىن ارادا الماتى جاعىنان ءۇي-ىشتەرىمەن كوپ قازاق كەلدى دەپ ەدى. ولارعا ءالى جولىققانىم جوق.
حوش، احمەت».
* * *
اقسسر پ/و، پوپوۆ وستروۆ 3 وتدەل، سلاگ. و سولوۆكي، 1 لاگپۋنكت، 1-يا روتا دۋلاتوۆۋ ميرياكۋبۋ.
س.موچلينو، كلۋبنايا، د. سويگاروۆا ستەپانا. زاپ. سيب. كراي. تومسك. وكر. كريۆوشەيەنسك. رايون. ء8/ىىى-34.
قاراقتارىم مىرجاقىپ، مىرزاعازى!
سونداسىڭدار ما؟ دەندەرىڭ ساۋ ما؟ عازىمبەك قايدا؟ مەن قاتىن-بالامنىڭ قاسىنا جىبەر دەپ سۇرانىپ، مۇندا كەلدىم. وتكەن سەنتيابردەن بەرى وسىندامىن. ايىنا 150 سوم جالاقىسى بار ءبىر ورىنعا ىلىگىپ ەدىم، ونان وسى مارتتان باستاپ شىعارىپ تۇر. قازىر جۇمىسسىز تۇرمىن. ق. ب. - نان (قىر بالاسى - ءا.بوكەيحانوۆ) حات الىپ تۇرمىن. امان. سوڭعى ءبىر-ەكى حاتىندا سماعۇلدان (سادۋاقاسوۆتان) باسقامىز امانبىز دەپ جازعان ەكەن، ونىسى نەمەنە ەكەنىن انىق بىلمەيمىن. ەلدەس الماتىدا وقىتۋ جۇمىسىندا دەپ جازادى. ونىڭ وزىنە الدەنەشە رەت جازىپ، جاۋاپ الا الماي-اق قويدىم. سەندەرگە جازىپ جاۋاپ قايتپاعان سوڭ، تاعى جازىپ وتىرمىن. قولدارىڭا تيسە كەشىكتىرمەي حابار بەرەرسىڭدەر.
سۇيەم. احمەت.
ب. س-دان (بادريسافادان) سالەم. ول قويانشىق اۋرۋى بولىپ ابدەن بىتكەن... شولپان (قىزى) مەن مۇندا كەلگەنشە الماتىعا كەتىپ قالىپتى.
اعايىنداردىڭ بارىنە سالەم».
سماعۇل سادۋاقاسوۆ سول جىلى توسىن دا كۇدىكتى دەرتتەن (ونەركاسىپتىك، ياعني، كاسىبي ۋلانۋ دەگەن دياگنوز قويىلعان) قايتىس بولعان. جەرلەۋگە قاتىسقان س.مۇقانوۆتىڭ ايتۋىنشا، تاڭەرتەڭ كرەملگە ساۋ كىرگەن، كەشكە قاراي: «سۇيەگىن ورتەۋگە كۋالىك ەتىڭدەر»، - دەپ سۋىت حابارلاعان. دەنەسىن كورۋگە قايىن اتاسى ءا.بوكەيحانوۆقا دار ۇقسات بەرمەگەن. جەرلەۋگە قاتىسقان ءسابيت مۇقانوۆتىڭ جارى ماريام قوجاحمەتقىزى سول ءبىر قازا تۋرالى:
«ەستەلىك ايتامىن دەپ تالاي ارۋاقتىڭ قۇلاعىن شۋلاتتىق-اۋ دەيمىن. يە، سماعۇل سادۋاقاسوۆتىڭ جەرلەۋىنە قاتىسقانىمىز بار. ماسكەۋدە تۇرعان كەزىمىز. شاماسى، نە 32, نەمەسە 33-جىل. ولاي دەيتىنىم، ءسابيت ول كەزدە قىزىل پروفەسسۋرادا وقىپ ءجۇردى. ءبىر كۇنى سىرتتان اسىعىس كەلىپ:
- ءماريام، جينال. سماعۇل سادۋاقاسوۆ قايتىس بولىپتى. بۇگىن جەرلەۋگە اپارادى ەكەن»، - دەدى.
ەكەۋىمىز ۇيدەن شىقتىق. قىستىڭ كۇنى بولاتىن. ماسكەۋدىڭ شەت جاعىن تولىق بىلمەيمىن عوي. ترامۆايعا وتىرىپ، ودان ءبىراز جاياۋ ءجۇرىپ كەلىپ، ءبىر ۇلكەن كىرپىش ءۇيدىڭ جانىنا توقتادىق. الگى ءۇي ەرەكشەلەۋ كورىندى ماعان. «كرەماتوري» دەگەن وسى»، - دەدى ءسابيت. جۇرەگىم زىرق ەتە ءتۇستى. ولگەن ادامدى ورتەپ جىبەرەدى ەكەن دەگەندى ەستىگەنمىن:
- «مارقۇمدى نەگە ەلگە اپارمادى ەكەن؟، - دەگەن سۇراعىمدى ءسابيت جاۋاپسىز قالدىردى.
ءبىراز كۇتىپ تۇرىپ قالدىق. ماڭايدا كوپ ەشكىم كورىنبەيدى. ءبىر كەزدە انادايدان جاقىنداپ كەلە جاتقان اربا كورىندى. ءمايىتتى سول ارباعا سالىپتى. ارىستاي بوپ سۇلاپ جاتىر ەكەن. اربا سوڭىندا ءىلبي باسىپ ەكى-ءۇش ادام كەلەدى. ءسابيت ماعان سىبىرلاپ:
- ءاليحان بوكەيحانوۆ - قايىن اتاسى، ايەلى - ليزا، اناۋ - بالاسى»، - دەپ ءتۇسىندىرىپ تۇر.
اربا اقىرىن ءجۇرىپ كەلىپ ەسىكتىڭ كوزىنە توقتادى. ءسابيت جاقىن بارىپ امانداسىپ، كوڭىل ايتتى. مەن شەگىنشەكتەپ كەيىندەۋ تۇردىم. بوكەيحانوۆ كەلبەتتى ادام ەكەن. ۇستىندە ەتەگى جەر سىزعان، جاعاسىن التايى قىزىل تۇلكىدەن سالعان قىمبات تونى بار. كەسكىن-كەيپى پاتشاداي بولىپ كورىندى ماعان. تاكاپپار، سۋىق ءجۇزدى.
ءبىر كەزدە ءمايىتتى تابىتىمەن كوتەرىپ، ىشكە كىرگىزۋگە ىڭعايلاندى. ەشكىم داۋىس سالىپ، ءۇن شىعارعان جوق. ايەلى ليزا - قارالى كيىمدە. تابىتتىڭ باسىندا ءۇنسىز تۇرىپ قوشتاستى. قازاق عۇرپىمەن داۋىس سالماعانى ماعان ەرسىلەۋ كورىندى. ىشتەن شىققان ادامدار تابىتتى الا جونەلدى. بوكەيحانوۆ تا، ايەلى مەن بالاسى دا ەسىكتىڭ الدىندا قالىپ قالدى. سول كەزدە ءسابيت تەز-تەز باسىپ، ءۇيدى اينالىپ كەتتى.
بۇل قايدا كەتتى؟»، - دەپ مەن اڭ-تاڭمىن.
ءبىرازدان سوڭ كەلىپ، كورگەنىن ايتتى. ءمايىتتىڭ قالاي جانعانىن ۇلكەن پەشتىڭ الاقانداي تەسىگىنەن كورىپتى. تابىتىمەن جىلجىتىپ اكەلە جاتىپ، جالىنعا بەرەر ساتتە ءمايىتتى اجىراتىپ الادى ەكەن. سول كەزدە ءمايىتتى تىگىنەن كوتەرىپ، قىپ-قىزىل وتقا سۇڭگىتىپ جىبەرەتىن كورىنەدى.
- تىرلىك-اي دەسەڭشى، جامباسى جەرگە تيگەن دە ءبىر مەدەت ەكەن عوي، - دەپ ءسابيت ەكەۋىمىز ۇيگە قايتتىق. بار كورگەن-بىلگەنىمىز سول»، - دەپ ەسكە الادى.
بار ەمەۋىرىن تانىتارىمىز، ول كەزدە جامبىل «تەمىر كوميسسار» دەپ ماقتاعان كەنە - ەجوۆ كرەملدىڭ قاۋىپسىزدىگى سالاسىنا جاۋاپ بەرەتىن. ال س.سادۋاقاسوۆ 1921 جىلى سەمەي وبلىسىن قازاقستانعا كۇشپەن قوسقان كەزدە سماعۇل مەن ەجوۆ ەكەۋىنىڭ اراسىنان «الا جىلان» ءوتىپ كەتكەن بولاتىن. قازاقستاندا دا «قازاقتىق مانەرمەن» ازاناما جاريالاندى. ارىس ازامات قايعىلى قازاعا ۇشىراپ، سۇيەگى اسىعىس ورتەنگەنىنە وكىنىپ جازىلعان باسپاسوزدەگى ازاناماعا ا.مۋسين سياقتى اق جۇرەكتەردىڭ تۇلا بويى تۇرشىگىپ، ازا بويى قازا بولدى. ول ءوزىنىڭ ميرزويانعا جازعان ۇزاق «سۇيكەتپەسىندە»:
«موسكۆادا وقيتىن عالىم مالدىباەۆ دەگەن جاس جازۋشى «سوتسيالدى قازاقستان» گازەتىندە سماعۇلدىڭ ولىمىنە ارنالعان وچەرك-ماقالا جاريالادى. وچەركتىڭ باس-اياعى تۇنعان قايعى، ىڭىرسۋ، سىڭسۋ. وندا ءبىراز ادامداردىڭ جوقتاۋى دا كەلتىرىلگەن. مالدىباەۆ جولداستىڭ وچەركىن وقىپ كورەيىك: «ەكى كۇن بۇرىن سماعۇلعا جولىققانىمدا ونىڭ قاتتى جۇدەپ كەتكەنىن، دەنساۋلىعى السىرەپ، كوزى ناشار كورە باستاعانىن بايقادىم. «سماعۇل، قالىڭ قالاي، تىنىشتىق پا؟»، - دەگەنىمدە سماعۇل: «تىنىشتىق. بىزدەردىڭ ايتىسىپ جۇرگەن كەزىمىز دە بولدى، سوندا سەن: ەگەر مەن ولە قالسام مىڭ ادام جيناپ كومەرسىڭ - دەپ ەدىڭ. ال، ەندى كىرىس، جينا توپىراق سالاتىن ادامدى» - دەپ جاۋاپ قايىرىپ ەدى»، - دەپ جازىپتى.
كرەماتوريدان قايتىپ كەلگەندەردىڭ دە جوقتاۋىن كەلتىرىپتى. وندا: «سماعۇلعا ساتقىندىق جات ەدى، وتە قايسار جىگىت بولاتىن جانە ءوزىنىڭ پوزيتسياسىن قاتاڭ ۇستاناتىن. وقۋىن بىتىرگەن كەزىندە قايتىس بولىپ كەتكەنى وتە وكىنىشتى»، - دەپ وكىنەدى مالدىباەۆ. الگى جولداس شىنىندا دا سولاي دەدى مە، جوق پا، مالدىباەۆ جولداس جانىنان قوسىپ وتىر ما، ماسەلە وندا ەمەس. بۇرىنعى ساياسي كۇرەس كەزى «ايقايشىل ۋاقىت» دەپ باعالانعان. سوندا ءبىز بۇگىن سادۋاقاسوۆشىلدىقپەن كۇرەسپەۋىمىز كەرەك پە؟ «سماعۇلعا ساتقىندىق جات ەدى» - دەگەن نە ءسوز؟ بۇل ءسوزدىڭ استارىندا: پارتيانىڭ سارا جولىن نىق ۇستاعان كوممۋنيستەردى ورىسقا ساتىلىپ كەتكەندەر - دەپ ايتىپ تۇرعانى ەمەس پە ەكەن»، - دەپ ورشەلەنە ارۋاقپەن ايتىستى.
نەسى بار، بۇل دا سول كەزدەگى «ايقايشىل كەزەڭنىڭ» ايقايشىلارىنا ءتان «ساياسي قىراعىلىق» بولاتىن.
ۇلت كوسەمىنىڭ: «سماعۇلدان باسقامىز امانبىز»، - دەۋىنىڭ استارىندا وسىنداي قاسىرەت تابى جاتىر ەدى.
امان بولايىق.
(جالعاسى بار)
«اباي-اقپارات»
