بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتا بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

بيۋرو وتىرىسىندا دەپۋتاتتار قاراۋىنا «2021-2023   جىلدارعا  ارنالعان  رەسپۋبليكالىق  بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار  ەنگىزۋ تۋرالى» زاڭ جوباسى ۇسىنىلدى.

قۇجات 2021-2025 جىلدارعا ارنالعان ماكروەكونوميكالىق كورسەتكىشتەر بولجامىنىڭ ناقتىلانۋىنا بايلانىستى ازىرلەنىپ، «Nur Otan» پارتياسىنىڭ سايلاۋالدى باعدارلاماسىنا، مەملەكەت باسشىسىنىڭ جولداۋىنا جانە كوروناۆيرۋستىق ينفەكتسيامەن كۇرەس جونىندەگى ءىس-شارالاردى ىسكە اسىرۋعا باعىتتالعان.

سونىمەن قاتار، كۇن ءتارتىبىنىڭ جوباسىندا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراۋ ۇسىنىلدى.

پالاتانىڭ الداعى جالپى وتىرىسىندا زاتتار مەن ماتەريالداردىڭ قۇرامى مەن قاسيەتتەرىنىڭ ستاندارتتى ۇلگىلەرىن جاساۋ جانە قولدانۋ جونىندەگى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن جۇمىسقا الۋ كوزدەلگەن.

Abai.kz