بۇگىن پارلامەنت ءماجىلىسىنىڭ جالپى وتىرىسىندا دەپۋتاتتار «2021-2023 جىلدارعا ارنالعان رەسپۋبليكالىق بيۋدجەت تۋرالى» زاڭنامالىق تۇزەتۋلەردى ماقۇلدادى.

وتىرىس بارىسىندا دەپۋتاتتار بيۋدجەتكە قاتىستى بىرقاتار وزەكتى سۇراقتاردى كوتەردى. اتاپ ايتقاندا، ساپاسى سىن كوتەرمەيتىن جول قۇرىلىسىنا، ونىڭ ۋاقىتىلى اياقتالۋىنا قاتىستى ماسەلەلەرگە ەرەكشە ءمان بەردى. وسى رەتتە نۇرلان نىعماتۋلين:

- جاسىراتىنى جوق، ءبارىمىز قار ءتۇسىپ كەتسە دە، جول  جوندەپ جاتقانىن ءجيى   كورىپ   ءجۇرمىز. كەيدە ءبىر جىل وتپەي قايتادان رەمونت  جاساپ جاتقانىن دا كورەمىز. بۇل  نەنىڭ  كورسەتكىشى؟ بىرىنشىدەن، ساپالى كونكۋرس وتكىزۋ ءۇشىن، ساپالى كومپانيا تابۋ ءۇشىن ۋاقىت جەتىسپەيدى. ەكىنشىدەن، بارلىق جۇمىستار اسىعىس جاسالادى. ارينە، ودان كەيىن ەشقانداي ساپاسى دا بولمايدى. ال، بيۋدجەتتەن قانشا اقشا كەتىپ جاتىر. وتكەن  ايدا ول تۋرالى پرەزيدەنت تە ايتتى. قازىردە 140 ملرد. تاعى بەرەيىن دەپ  وتىرمىز، - دەدى

سونىمەن قاتار، پالاتا سپيكەرى يندۋستريا جانە ينفراقۇرىلىمدىق دامۋ مينيسترىنە وسىنشا قاراجات بولگەننەن كەيىن، ناتيجە، ياعني، ساپالى جولدار بولۋ  كەرەكتىگىن ايتتى.

رەسپۋبليكالىق بيۋدجەت تۋرالى زاڭنامالىق تۇزەتۋلەر بويىنشا قورىتىندى جاساعان نۇرلان نىعماتۋلين بيۋدجەت – ەلىمىزدىڭ تۇراقتى دامۋىن، حالقىمىزدىڭ الەۋمەتتىك جاعدايىن قامتاماسىز ەتۋدىڭ كەپىلى ەكەنىن العا تارتىپ، بۇل قۇجات ارقاشاندا ءماجىلىس قاراۋىنداعى ەڭ ماڭىزدى، ەڭ جاۋاپتى زاڭ جوبالاردىڭ ءبىرى ەكەنىن ايتتى.

- بۇگىنگى بيۋدجەتتە ادەتتەگىدەي الەۋمەتتىك قولداۋعا، دەنساۋلىققا، ءبىلىم، ەڭبەكپەن قامتۋ سالالارىنا، جانە جول قۇرىلىسى، تاعى باسقا دا ماڭىزدى باعىتتاردى جۇزەگە اسىرۋعا قوسىمشا قاراجاتتار قارالدى. وسىنىڭ بارلىعى، ەلباسى نۇرسۇلتان ءابىشۇلى نازارباەۆتىڭ ستراتەگيالىق باستامالارىن، مەملەكەت باسشىسى قاسىم-جومارت كەمەلۇلى توقاەۆتىڭ سەسسيانىڭ اشىلۋىندا بەرگەن تاپسىرمالارىن جۇزەگە اسىرۋعا ىقپال ەتەدى. ەندىگى مىندەت – وسى بولىنگەن قاراجاتتاردى العا قويعان ماقساتتارعا ءتيىمدى پايدالانۋ. ارينە، بۇل سۇراقتار ءماجىلىس دەپۋتاتتارىنىڭ دا باقىلاۋىندا بولادى، - دەدى.

ايتا كەتۋ كەرەك، اتالعان زاڭ جوباسى 2021-2025 جىلدارعا ارنالعان ماكروەكونوميكالىق كورسەتكىشتەر بولجامىنىڭ ناقتىلانۋىنا بايلانىستى ازىرلەنىپ، «Nur Otan» پارتياسىنىڭ سايلاۋالدى باعدارلاماسىنا، مەملەكەت باسشىسىنىڭ جولداۋىنا جانە كوروناۆيرۋستىق ينفەكتسيامەن كۇرەس جونىندەگى ءىس-شارالاردى ىسكە اسىرۋعا باعىتتالعان.

Abai.kz