شىعىس قازاقستان وبلىسىندا قوس ازاماتتىعى بار 28 ادام انىقتالعان. بۇل تۋرالى شقو پوليتسيا دەپارتامەنتى كوشى-قون قىزمەتى باسقارماسىنىڭ باستىعى ەربول بەكپاەۆ رەسمي مالىمدەگەن.

ولاردىڭ اراسىندا باسشىلىق قىزمەتتەگى ادامدار دا بار ەكەن. شقو-عا قاراستى گلۋبوكوە اۋدانىندا قازاقستان ازاماتتىعىمەن قاتار رەسەي ازاماتتىعىن العان تۇرعىن انىقتالعان.

«رەسەيدىڭ التاي ولكەسىندە رەسەي ازاماتتىعىن العان سەمەي قالاسىنىڭ تۇرعىنى انىقتالدى. ول كۆازيمەملەكەتتىك سەكتوردا باسشىلىق قىزمەتتە ىستەيتىنى دە بەلگىلى بولدى.

بيىلدىڭ وزىندە قوس ازاماتتىعى بار 28 ادام، ونىڭ ىشىندە 8 ازامات شەتەل ازاماتتىعىن العاننان سوڭ زاڭدا بەلگىلەنگەن مەرزىم ىشىندە قۇزىرلى ورگاندارعا حابارلاماعانى ءۇشىن، جانە 20 ازامات قازاقستان ازاماتتىنىڭ جەكە باسىن كۋالاندىراتىن قۇجاتتى پايدالانعانى ءۇشىن جاۋاپكەرشىلىككە تارتىلدى»، - دەيدى ەربول بەكپاەۆ مىرزا.

بۇل شەتەلدىكتەر قازاقستاننىڭ ازاماتتىعىنان ايىرىلعان. ولارعا قازاقستان رەسپۋبليكاسى ازاماتتىعىنان ايىرۋ جانە اقبتك-ءنىڭ 496-بابى بويىنشا 100-دەن 200 اەك مولشەرىنە دەيىن (265 100-دەن 530 200 مىڭ تەڭگەگە دەيىن) ايىپپۇل سالاتىن اكىمشىلىك حاتتامالار تولتىرىلعان.

تاقىرىپقا تۇزدىق:

ورىس دەسە جانىن بەرەتىن ورتالىق ازياداعى جالعىز مەملەكەت – قازاقستان. بىراق سوڭعى كەزدە بۇرىن ءسوز ەتىلمەگەن جاڭا كىلتيپان بوي كوتەردى. ول وسى كەزگە دەيىن جاسىرىلىپ-جابىلىپ كەلگەن قازاق ەلىنىڭ كەيبىر تۇرعىندارىنىڭ قوس ازاماتتىعى. ارينە، رەسپۋبليكا ازاماتتارىنا قوس ازاماتتىق الۋىنا اتا زاڭىمىزدا رۇقسات بەرىلمەگەن، دەگەنمەن كەي ازاماتتاردىڭ امالىن تاۋىپ، رف تۇراتىن نە كۇيەۋىنىڭ، نە ايەلىنىڭ اتا-تەگىنە ءوتۋ ارقىلى ءارى رف، ءارى قر ازاماتى اتانىپ جۇرگەندەردىڭ سانىنىڭ قانشا ەكەنىن ەشكىم بىلمەيدى.

ەگەر جەرىمىزگە كوز الارتىپ، تارپا باس سالا قالسا، ءدال وسى رف ازاماتتارىنىڭ قاۋىپسىزدىگىن قورعاۋدى سولتۇستىكتەگى كورشىمىز جەلەۋ ەتەتىنى انىق. ءيا، وسى داۋلى ماسەلەگە وتتى اۋەلى قر ازاماتتارىنا رف ازاماتتىعىن الۋدى جەڭىلدەتۋ جارلىعى قۇيدى. كەيىن پۋتين وسى جارلىقتىڭ اياسىن ودان دا كەڭەيتىپ، ءوزى وككۋپاتسيالاعان ۋكراينانىڭ دونەتسك پەن لۋگانسك وبلىستارىنىڭ تۇرعىندارىنا دا ءدال وسىنداي جارلىق شىعاردى.

بۇعان دەيىن قوس ازاماتتىعى بار ازاماتتىڭ شىمكەنتتە شەنەۋنىك بولعانى حابارلانعان ەدى. شىمكەنت قالالىق دەنە شىنىقتىرۋ جانە سپورت باسقارماسىن باسقارعان ولەگ پوچيۆالوۆ قازاقستاننان بولەك رەسەي فەدەراتسياسىنىڭ دا ازاماتى بولعان. بۇل اقپارات قوعامدى قىزۋ تالقى بولعان. ءبىز بۇل تۋرالى ەگجەي-تەگجەيلى جازدىق.

رەسەي ازاماتى شىمكەنتتە قالاي شەنەۋنىك بولدى؟

شىمكەنتتىك شەنەۋنىكتىڭ رەسەي ازاماتى ەكەنى دالەلدەندى

قوس ازاماتتىعى بار پوچيۆالوۆ قىزمەتىنەن بوساتىلدى

ال قازاقستان رەسپۋبليكاسى ىشكى ىستەر مينيسترلىگى تەك 2020 جىلدىڭ 11 ايىندا مەملەكەتتىك قىزمەتشىلەرگە قاتىستى ەكى ازاماتتىقتىڭ 431 فاكتىسى انىقتالعانىن ايتقان.

ال «قازاقستان رەسپۋبليكاسىنىڭ ازاماتتىعى تۋرالى» 1991 جىلعى 20 جەلتوقسانداعى № 1017-XII زاڭىنىڭ «ازاماتتىقتى توقتاتۋ» تۋرالى 3 تاارۋىنىڭ 21 بابىندا:

- قازاقستان رەسپۋبليكاسىنىڭ مەملەكەتارالىق شارتتارىندا كوزدەلگەن رەتتەردى قوسپاعاندا، ادامنىڭ باسقا مەملەكەتتە اسكەري قىزمەتكە قاۋىپسىزدىك قىزمەتىنە، پوليتسياعا، يۋستيتسيا ورگاندارىنا نەمەسە وزگە دە مەملەكەتتىك وكىمەت جانە باسقارۋ ورگاندارىنا ورنالاسۋى سالدارىنان;

- ەگەر قازاقستان رەسپۋبليكاسىنىڭ ازاماتتىعى كورىنەۋ جالعان مالىمەتتەر نەمەسە جالعان قۇجاتتار تابىس ەتۋ ناتيجەسىندە الىنسا;

- ەگەر ادام باسقا مەملەكەتتىڭ ازاماتتىعىن العان بولسا, - دەپ تايعا تاڭبا باسقانداي جازىلعان.

ايتا كەتەيىك، مەملەكەت باسشىسى قاسىم-جومارت توقاەۆ 2020 جىلى قىركۇيەك ايىنداعى قازاقستان حالقىنا جولداۋىندا «ەگەر مەملەكەتتىك قىزمەتشى نەمەسە كۆازيمەملەكەتتىك مەكەمەنىڭ باسشىسى قوس ازاماتتىق السا، ولار قىزمەتىنەن بوساتىلادى»، دەپ مالىمدەگەن.

Abai.kz