اقش پرەزيدەنتى دجو بايدەن ماۋسىم ايىندا ەۋروپاعا ساپارى كەزىندە رەسەيلىك ءارىپتەسى ۆلاديمير پۋتينمەن كەزدەسۋدىڭ سءاءتى تءۇءسىپ قالار دەپ ءۇمىتتەنەدى.

"وسىلاي بولادى دەپ ۇمىتتەنەمىن جانە كۇتەمىن. سوعان كۇش سالىپ جاتىرمىز" دەدى بايدەن 4 مامىر كۇنگى كوروناۆيرۋس احۋالىنا ارنالعان ءباسپاسوز جيىنى كەزىندە جۋرناليستەرگە.

پرەزيدەنت قىزمەتىنە كىرىسكەلى بەرى العاش رەت شەتەلگە جاساعالى وتىرعان ساپارىندا بايدەن "ۇلكەن جەتىلىك" (G7) ەلدەرىنىڭ باسشىلارىمەن كەزدەسۋدى جوسپارلاپ وتىر. G7 ءسامميتى 11-13 ماۋسىمدا ۇلىبريتانيادا بولادى. سامميتتەن سوڭ بايدەن 14 ماۋسىمعا بەلگىلەنگەن ناتو سامميتىنە قاتىسۋ ءۇشىن بريۋسسەلگە ۇشادى. ول جاقتا ەو – اقش كونفەرەنتسياسىنا دا قاتىسادى دەپ ايتىلادى.

ءساۋىر ايىندا بايدەن پۋتينگە ەكى ەل اراسىندا قوردالانىپ قالعان ماسەلەلەردى (ۋكرايناعا تونگەن قاۋىپ، SolarWinds امەريكالىق كومپيۋتەرلەرگە كيبەرشابۋىلى، رەسەي بيلىگىنىڭ وپپوزيتسيالىق ساياساتكەر الەكسەي ناۆالنىيدى تۇرمەگە جىبەرۋى) تالقىلاۋ ءۇشىن ءۇشىنشى ەلدە كەزدەسۋدى ۇسىنعان.

ءپۋتيننىڭ سىرتقى ساياسات جونىندەگى كومەكشىسى يۋري ۋشاكوۆ ەكى پرەزيدەنتتىڭ كەزدەسۋىن ۇيىمداستىرۋ بويىنشا شارۋالارمەن اينالىسىپ جاتقانىن حابارلادى. "ماۋسىمدا دەيدى، ءتىپتى ناقتى كۇنى دە بەلگىلەنگەن" دەدى ۋشاكوۆ.

وتكەن ايدا رەسەي ۆاشينگتوننىڭ ون رەسەيلىك ديپلوماتتى ەلدەن شىعارىپ، سانكتسيانى كۇشەيتكەنىنە "جاۋاپ رەتىندە" اقش-تىڭ ماسكەۋدەگى ەلشىلىگىنىڭ ون قىزمەتكەرىن "پەرسونا نون گراتا" دەپ جاريالاعان. سانكتسيا كرەملدىڭ اقش-قا قارسى ارەكەتى ءۇشىن جازالاۋ تالپىنىسى رەتىندە باعالانعان.

بايدەن رەسەيدىڭ قاستىق جاساعانى انىقتالسا، قاتاڭ جاۋاپ بەرەتىنىن بىرنەشە رەت ەسكەرتكەن. بىراق ورتاق مۇددەلەر الاڭىندا (مىسالى، يادرولىق قارۋدىڭ تارالۋى، عالامدىق كليماتتىڭ وزگەرۋى، يرانمەن يادرولىق كەلىسىم، سولتۇستىك كورەيا ماسەلەسى جانە اۋعانستاندا بەيبىتشىلىك پەن تۇراقتىلىقتى نىعايتۋ) ماسكەۋمەن ارىپتەستىك ورناتۋعا دايىن ەكەنىن دە جەتكىزگەن.

3 مامىردا لوندونعا ساپارى كەزىندە اقش مەملەكەتتىك حاتشىسى ەنتوني بلينكەن ۆاشينگتون ماسكەۋمەن قارىم-قاتىناسىنىڭ "تۇراقتى، جوسپارلى" بولعانىن قالايدى، بىراق اقىر سوڭىندا بۇل قارىم-قاتىناستىڭ سيپاتى كرەملدىڭ ساياساتىنا قاراي انىقتالادى دەپ مالىمدەگەن.

Abai.kz