وسى كەزگە دەيىن ەلىمىزدە 9 مامىر جەڭىس كۇنى رەتىندە اتالىپ وتىلەتىن. زامان وزگەردى، قۇندىلىقتار دا جاڭا بيىككە كوتەرىلدى. 9 مامىر – ەندى بىزگە ءىس جۇزىندە ەكىنشى جاھان سوعىسى قۇرباندارىن ەسكە الۋ كۇنىنە اينالۋعا ءتيىس. ەندى بىزگە ءبىر-ءبىرىمىزدى جەڭىس كۇنىمەن قۇتتىقتاۋدىڭ قاجەتى جوق! كورگەندە ءبىر-بىرىمىزگە «اللا تاعالا باتىر بابالارىمىزدى شەيىتتەردىڭ قاتارىنان ەتسىن!» دەسەك جەتىپ جاتىر.

ەكىنشى جاھان سوعىسىندا اسكەري قيمىلدار باتىس ەۋروپا، جەرورتا تەڭىزى، افريكا قۇرلىعى، وڭتۇستىك-شىعىس ازيا جانە شىعىس ەۋروپا سياقتى بەس سوعىس تەاترىندا ءوتتى. سونىڭ تورتەۋىندە اقش پەن ۇلىبريتانيا جەڭىسكە جەتتى. سوڭعى شىعىس ەۋروپاداعى سوۆەت-گەرمان سوعىسىندا جەڭىسكە جەتكەن – سسسر. فاشيستىك گەرمانيانى جەڭگەن قازاقستان دا، ءتىپتى رەسەي دە ەمەس سول – سوۆەت وداعى. بۇگىندە سوۆەت وداعى دا، قاندى شايقاستارعا قاتىسقان مايدانگەرلەر دە كەلمەستىڭ كەمەسىنە مىنگەن. ول سوعىسقا قاتىسپاعاندىقتان تاۋەلسىز قازاقستان ءۇشىن 9 مامىر جەڭىس كۇنى بولا المايدى!

ءبىز 70 ميلليوننان استام ادام ءومىرىن جالماعان ەكىنشى جاھان سوعىسىنا ماجبۇرلىكپەن قاتىسقان، قازاقستاندىقتاردى، قازاق حالقىنىڭ باتىر ۇل-قىزدارىن، وكوپتىڭ قاي جاعىندا بولسا دا قازا تاپقان شاھيدتەرىمىزدى قاستەرلەپ ەسكە الامىز. ەكىنشى جاھان سوعىسى جىلدارىندا قازاقستاننان العى شەپكە اتتانعان 1,5 ملن ادامنىڭ تەڭ جارتىسىنا جۋىعى مايدان دالاسىنان ورالمادى. جارالى بولىپ، قالعان ءومىرىن مۇگەدەكتىكپەن وتكىزگەندەر قانشاما؟!

ءبىز ءۇشىن بۇگىندە سوۆەت اسكەرى قاتارىندا بولعان بابالارىمىز دا، قازاقستاندى بولشەۆيكتەردەن ەرتەرەك تازارتۋ جولىندا مايداننىڭ ارعى بەتىندە قارۋ ۇستاعان قانداستارىمىز دا قىمبات! ءبىز فاشيستىك جانە سوۆەتتىك كونتسلاگەرلەردە ءتۇرلى ازاپتاۋلارعا ۇشىراعان، فاشيستىك جانە سوۆەتتىك جەندەتتەردىڭ قولىنان قازا تاپقان ۇل-قىزدارىمىزدى ۇمىتپايمىز. ەكىنشى جاھان سوعىسىنا قاتىسقان، قازا بولعان، كەيىن سوعىس جاراقاتىنان كوز جۇمعاندار دا جادىمىزدا. ولاردى ءبىرىن قالدىرماي تۇگەندەۋ جانە تاريحي تۇرعىدان اقتاۋ بۇگىنگى ۇرپاقتىڭ قاسيەتتى مىندەتى.

ەكىنشى جاھان سوعىسى قۇرباندارىن ەسكە الۋ كۇنىندە وعان قاتىسقان بارشا بوزداقتارىمىزدى ەسكە الامىز! اللا تاعالادان ولارعا شەيىتتىك مارتەبە ءتان بولسىن! ولارعا ءبادىر سوعىسى ارىستاندارىنىڭ ابىرويى بۇيىرسىن!
قيامەت-قايىمعا دەيىن ولاردىڭ ەرلىگى ۇمىتىلمايدى!

مارات ءبايدىلداۇلى

Abai.kz