شىعىس قازاقستاندا الاپات ءورت بولىپ جاتىر. ورمان ورتەنىپ، قاراعايلار ارقىلى ءورت ەلدى-مەكەنگە اۋىسقان. شىعىس قازاقستانداعى ريددەر ورمان شارۋاشىلىعىنداعى ءورت كەزىندە لەسحوز كەنتىنەن 72 جانە 42 جاستاعى ەكى ەر ادام كۇيىك شالىپ، جەرگىلىكتى اۋرۋحانانىڭ جانساقتاۋ بولىمىنە جەتكىزىلدى، دەپ حابارلايدى «حابار 24».

پوليتسيا قىزمەتكەرلەرى ءۇي توبەسىنەن 73 جاستاعى ايەلدىڭ ءمايىتىن تاۋىپ الدى. وت شامامەن 2 گەكتارعا جايىلعان. وقيعا ورنىنا ءورت ءسوندىرۋ قىزمەتىنىڭ 20 تەحنيكاسى مەن 100-دەن استام قۇتقارۋشىسى جانە ەكى مي-8 تىكۇشاعى جۇمىلدىرىلدى. بىراق وت بوي بەرەر ەمەس. وسى ماڭايداعى 31 ءۇيدى دە وت شارپىعان. ورتكە قاتىستى ەل باسشىسى دەرەۋ ارادا تاپسىرما بەرىپ ۇلگەردى. بۇل تۋرالى بەرىك ءۋالي ءوز پاراقشاسىنا سالدى.

"مەملەكەت باسشىسىنىڭ تاپسىرماسى بويىنشا ۇكىمەت پەن شىعىس قازاقستان وبلىسىنىڭ اكىمدىگى ورتتەن زارداپ شەككەن لەسحوز كەنتىنىڭ تۇرعىندارىنا كومەك كورسەتىپ، باسپانامەن قامتاماسىز ەتۋ جۇمىستارىن جۇرگىزىپ جاتىر. بۇل ماسەلەنى پرەزيدەنت ءوز باقىلاۋىندا ۇستاپ وتىر", - دەپ جازدى ول ءوزىنىڭ Facebook جەلىسىندەگى پاراقشاسىنا.

ال شقو پوليتسيا دەپارتامەنتى ورتكە قاتىسى بار دەگەن كۇددىكتىنى ۇستاعانىن مالىمدەدى. ول ريددەر قالاسىنىڭ ماڭىندا ءورت تۋىنداۋىنا سەبەپكەر بولۋى مۇمكىن.

Abai.kz