ءماجىلىس توراعاسى نۇرلان نىعماتۋلين كورەيا رەسپۋبليكاسى ۇلتتىق اسسامبلەياسىنىڭ توراعاسى پاك بەن سوكپەن كەزدەستى.

پاندەميا جاعدايىنا بايلانىستى ونلاين فورماتتا وتكەن كەزدەسۋ بارىسىندا تاراپتار بارلىق سالا بويىنشا ەكىجاقتى قارىم-قاتىناستى، سونىڭ ىشىندە، پارلامەنتارالىق ىنتىماقتاستىقتى دامىتۋ جايىندا پىكىر الماستى.

سونداي-اق، قازاقستاندا جۇرگىزىلىپ جاتقان ساياسي رەفورما تۋرالى كەڭىنەن اڭگىمە قوزعالدى.

ءماجىلىس توراعاسى كورەيا قازاقستاننىڭ شىعىس ازياداعى ماڭىزدى ستراتەگيالىق ارىپتەستەرىنىڭ ءبىرى ەكەنىن العا تارتا كەلىپ، ساياسي، ساۋدا-ەكونوميكالىق سالاداعى جەتىستىكتەرگە توقتالدى.

نۇرلان نىعماتۋلين اتاپ وتكەندەي، ديپلوماتيالىق قاتىناس ورناعان 29 جىلدىڭ ىشىندە نۇر-سۇلتان مەن سەۋل  اراسىندا قارقىندى ساياسي ديالوگ ورناپ، ەكى ەل قاتىناسىن تەرەڭدەتۋدىڭ بەرىك ىرگەتاسى قالاندى.

پالاتا سپيكەرىنىڭ ايتۋىنشا، بۇل جولدا قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ ءرولى زور.

بۇگىندە  قالىپتاسقان ستراتەگيالىق ارىپتەستىك قازاقستان پرەزيدەنتى قاسىم-جومارت توقاەۆتىڭ جالعاستىرۋىمەن ودان ءارى  نىعايىپ كەلەدى.

ءوز كەزەگىندە پاك بەن سوك مىرزا قازاقستاندى  ءوزىنىڭ دامۋ جولىن ۇسىنعان ۇلگىلى مەملەكەت رەتىندە الەمگە تانىلعانىن العا تارتا كەلىپ، ەكى ەل اراسىنداعى جوعارى دەڭگەيدەگى ىقپالداستىق قارىم-قاتىناستاردى راستاي وتىرىپ، الداعى ۋاقىتتا ءداستۇرلى كەزدەسۋلەر مەن ءىس شارالاردى بەلسەندى جالعاستىرۋ كەرەكتىگىن اتاپ ءوتتى.

كەزدەسۋ يەلەرىنىڭ پىكىرىنشە، وسىنداي كەزدەسۋلەر قازاقستان مەن وڭتۇستىك كورەيا  اراسىنداعى ءوزارا سەنىمدى، ارىپتەستىكتى دامىتۋعا ىقپال ەتەدى.

Abai.kz