قازاقستاندا كوروناۆيرۋس جۇقتىرۋ كورسەتكىشى 20 پايىزعا ءتومەندەدى. بۇل تۋرالى بۇگىن ۇكىمەت وتىرىسىندا قر دەنساۋلىق ساقتاۋ ءمينيسترى الەكسەي تسوي ايتتى.

«قازىرگى ۋاقىتتا ۆيرۋس جۇقتىرعانداردىڭ تومەندەۋىنە قاتىستى وڭ ديناميكا بايقالادى جانە ەپيدەميولوگيالىق احۋال بىرتىندەپ تۇراقتالىپ كەلە جاتىر. ماسەلەن، سوڭعى 2 اپتادا وعان دەيىنگى ەكى اپتامەن سالىستىرعاندا ناۋقاستانۋ كورسەتكىشى 20 پايىزعا ازايدى»، - دەدى مينيستر.

ونىڭ دەرەگىنشە، وڭىرلەر شەگىندە 18 مامىرداعى جاعدايعا سايكەس، ينفەكتسيالىق توسەك-ورىنداردىڭ تولىمدىلىعى 36, ال رەانيماتسيالىق توسەك-ورىنداردىڭ تولىمدىلىعى 28 پايىزدى قۇراپ وتىر.

«ينفەكتسيالىق توسەك-ورىنداردىڭ ەڭ جوعارى تولىمدىلىعى نۇر-سۇلتان قالاسىندا - 49, الماتى وبلىسىندا - 45 پايىز، رەانيماتسيالىق توسەك-ورىندار تولىمدىلىعى نۇر-سۇلتان قالاسىندا - 52, الماتى قالاسىندا 47 پايىزدى قۇرايدى»، - دەدى دەنساۋلىق ساقتاۋ ءمينيسترى.

Abai.kz