5 مامىر كۇنى ءماجىلىس دەپۋتاتى ازات پەرۋاشەۆ باستاعان «اق جول» پارتياسى استانا اكىمى التاي كولگىنوۆتىڭ اتىنا ءوتىنىش جولداپ، 31 مامىر كۇنى اشارشىلىق جانە ساياسي قۋعىن-سۇرگىن قۇرباندارىن ەسكە الۋ شەرۋىن وتكىزۋگە مۇمكىندىك جاساۋدى سۇراپتى.

الايدا كولگىنوۆ اكىمدىگى بۇقارالىق ءىس-شارالار وتكىزۋگە تىيىم سالعان استانانىڭ باس سانيتارلىق دارىگەرىنىڭ قاۋلىسىن العا تارتىپ، «الاشقا تاعزىم» شەرۋىن وتكىزۋگە رۇقسات بەرمەپتى.

دەپۋتات پەرۋاشەۆتىڭ وتىنىشىنە بەرگەن جاۋاپ-حاتتا سوزبە-ءسوز بىلاي دەپ جازىلعان ەكەن:

«قازاقستان رەسپۋبليكاسىندا بەيبىت جينالىستار ۇيىمداستىرۋ جانە وتكىزۋ ءتارتىبى تۋرالى» 2020 جىلعى 25 مامىرداعى قازاقستان رەسپۋبليكاسى زاڭىنىڭ 14-بابى 1-تارماعىنىڭ 3-تارماقشاسىنا، نۇر-سۇلتان قالاسىنىڭ باس مەملەكەتتىك سانيتارلىق دارىگەرىنىڭ 2021 جىلعى 6 مامىرداعى بمسدق № 17 قاۋلىسى 1-تارماعىنىڭ، 1.1 تارماقشاسىنا سايكەس نۇر-سۇلتان قالاسىنىڭ اكىمدىگى قاۋلى ەتەدى:

1.ن.پەرۋاشەۆقا نۇر-سۇلتان قالاسىندا 2021 جىلعى 31 مامىر كۇنى 10 ساعات 00 مينۋتتان 12 ساعات 00 مينۋتقا دەيىن قوسىمشادا كورسەتىلگەن مارشۋرتتار بويىنشا شەرۋ وتكىزۋگە رۇقسات بەرۋدەن باس تارتىلسىن.

2.وسى قاۋلىنىڭ ورىندالۋىن وزىمە قالدىرامىن»، - دەپ جازىلعان. قاۋلى 17.05.2021 جىل دەگەن داتامەن بەرىلگەن. وعان استانا اكىمىنىڭ ورىنباسارى باقتيار ماكەن ءمور قويعان.

وسىدان سوڭ ازات پەرۋاشەۆ ءوزىنىڭ Telegram-داعى رەسمي پاراقشاسىندا بىرنەشە جازبا جاريالادى.

«اق جول» دەموكراتيالىق پارتياسىنىڭ ساياسي قۋعىن-سۇرگىن قۇرباندارىن ەسكە الۋعا ارنالعان «الاشقا تاعزىم» شەرۋىن وتكىزۋىنە نۇر-سۇلتان قالاسىنىڭ اكىمدىگى تىيىم سالدى.

ءتىپتى، اكىمشىلىكتىڭ جاۋابىندا اتالعان ءىس-شارانىڭ ساياسي ماڭىزىن كورسەتپەۋ ءۇشىن، «اق جول» دەموكراتيالىق پارتياسىنىڭ «الاشقا تاعزىم» ءىس-شاراسى ەمەس، «ن.پەرۋاشەۆتىڭ» (ول كىم ەكەن؟) «جەكە» باستاماسى دەپ كورسەتىپتى. سۇمدىق (ماسقارا) ەمەس پە؟ الماتىدا فەمينيزمدى قولداۋ جونىندەگى شەرۋىلەرگە رۇقسات بەرىلەدى، ال ەلوردادا قاسىرەت قۇرباندارىن ەسكە الۋعا تىيىم سالىنادى. ابسۋرد!»، - دەگەن ازات پەرۋاشەۆ 19 مامىر كۇنى التاي كولگىنوۆتىڭ اتىنا قايتادان سۇراۋ سالىپ، استانا اكىمىنەن بۇل شەشىمدى  قايتا قاراستىرۋدى سۇراپ، شەرۋگە قولداۋ كورسەتۋگە شاقىرىپتى. ءبىز دەپۋتات ازات پەرۋاشەۆتىڭ استانا اكىمى التاي كولگىنوۆكە جازعان ەكىنشى حاتىن قاز قالپىندا جاريالاعاندى ءجون كوردىك.

نۇر-سۇلتان قالاسى اكىمى ا.س.كولگىنوۆ مىرزاعا!

قۇرمەتتى التاي سەيدىرۇلى!

ەلوردا اكىمدىگى اشارشىلىق قۇرباندارىن ەسكە الۋعا نەگە قارسى؟

بيىلعى 5 مامىردا «اق جول» دەموكراتيالىق پارتياسىنىڭ اتىنان 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ ماقساتىندا «الاشقا تاعزىم» شەرۋىن وتكىزۋگە مۇمكىندىك سۇراپ، نۇر-سۇلتان قالاسى اكىمىنە ارىز جولداعان بولاتىنبىز.

كەشە سول ارىزىمىزعا جاۋاپ رەتىندە شەرۋ وتكىزۋگە رۇقسات بەرۋدەن باس تارتۋ تۋرالى نۇر-سۇلتان قالاسىنىڭ اكىمدىگىنىڭ قاۋلىسى شىعىپتى. الايدا، قاۋلىدا حاتتىڭ پارتيا اتىنان جىبەرىلگەنىنە قاراماستان، «ن.پەرۋاشەۆقا نۇر-سۇلتان قالاسىندا 2021 جىلعى 31 مامىر كۇنى 10 ساعات 00 مينۋتتان 12 ساعات 00 مينۋتقا دەيىن قوسىمشادا كورسەتىلگەن مارشرۋتتار بويىنشا شەرۋ وتكىزۋگە رۇقسات بەرۋدەن باس تارتىلسىن» دەپ جازىلعان، نۇر-سۇلتان قالاسى اكىمى ورىنباسارى باحتيار ماكەننىڭ حاتى كەلدى.

الدىمەن، وتكىزىلەتىن ءىس-شارانىڭ ازات پەرۋاشەۆتىڭ جەكە باستاماسى ەمەس، «اق جول» دەموكراتيالىق پارتياسىنىڭ رەسمي جانە دە داستۇرگە اينالعان، 2017 جىلدان باستاپ وتكىزەتىن ءىس-شاراسى ەكەنىن ەسكە سالامىز.

ەكىنشىدەن ايتارىمىز، نۇر-سۇلتان قالاسى اكىمىنە «اق جول» پارتياسى اتىنان حات جازىپ وتىرعان بەلگىسىز «ن.پەرۋاشەۆ» ەمەس، مەن، ازات پەرۋاشەۆ.

سوندا ەل استاناسى اكىمىنىڭ ورىنباسارى، جاس دوسىم ءارى بۇرىنعى ماجىلىستەگى ارىپتەسىم باحتيار ماكەن ءوز قىزمەتكەرلەرىنە سەنىپ، قول قويىپ جاتقان حاتتاعى ەكى اۋىز ءسوزدى وقي المادى ما؟ اكىمدىكتىڭ قىزمەتكەرلەرى پارلامەنتتىك پارتياعا مىناداي ساۋاتسىزدىقپەن جاۋاپ بەرگەندە، جەكە ازاماتتاردىڭ ساۋالىنا قالاي قارايدى ەكەن؟

ۇشىنشىدەن، باس سانيتاردىڭ قاۋلىسىنا سايكەس شەرۋ وتكىزۋگە «رۇقسات بەرە المايمىز» دەپ كىمدەر جازىپ وتىر؟

نەگىزىندە، بىلتىرعى جىلى پرەزيدەنت ق.توقاەۆتىڭ باستاماسىمەن «ميتينگتەر تۋرالى» زاڭعا ەنگىزىلگەن تۇزەتۋلەرگە سايكەس، مۇنداي ءىس-شارالاردى وتكىزۋگە شەنەۋنىكتەردىڭ رۇقساتى كەرەك ەمەس. وتكىزۋشى تەك الدىن الا حابارلاپ، ۇيىمداستىرۋ ماسەلەلەرى بويىنشا كومەك سۇراۋ كەرەك: مىسالى، شەرۋ اۆتوكولىكتەرگە، ازاماتتارعا كەدەرگى كەلتىرمەۋ ءۇشىن، جول پوليتسياسى سول كوشەلەردە كولىك قوزعالىسىن ءتيىستى رەتتەۋدى قولعا الۋ جونىندە.

جانە دە اكىمدىكتىڭ جاۋابىندا سانيتارلىق تالاپتاردى (شەرۋگە قاتىسۋشىلار قانداي الشاقتىقتى ۇستاۋ كەرەك، قانشا ادامنان كوپ جيناماۋ كەرەك دەگەن سياقتى، بەتپەردە رەجيمىن ساقتاۋ، ت.ب.) كورسەتسە ءجون بولاتىن ەدى.

«اق جول» پارتياسىنىڭ ارىزىندا كورسەتكەندەي، مىڭداعان ازامات جيناۋ قاۋىپتى دەپ ساناسا، وندا سول شەرۋگە مىڭ ەمەس - 100, نەمەسە 10, ءتىپتى 3 ادام عانا قاتىسۋىن تالاپ ەتۋىنە بولاتىن ەدى عوي. نەمەسە، جينالعانداردىڭ قولىندا پتسر انىقتاماسى بولسىن، نەمەسە ۆاكتسيناتسيادان وتكەندەرگە عانا قاتىسۋعا بولادى دەپ ءجون سىلتەۋگە بولماس پا ەدى؟

ال، جاي «تىيىم سالۋعا» اسا اقىلدىلىق كەرەك ەمەس، بۇل دەگەن وتكەن زاماننىڭ ادىستەمەسى.

كەشە عانا 9 مامىردا اكىمدىكتىڭ ءوزى ارنايى ۇلكەن اۆتوكولىكتەرگە جەڭىس مەيرامىن تويلاعان ءانشى-بيشىلەردى توپتاپ تولتىرىپ الىپ، بۇكىل قالانى ارالاپ شىققاندا باس سانيتاردىڭ قاۋلىسى قايدا قالدى؟

التى ساعاتتاي سەرۋەندەپ، 60-تان استام ءان ايتقاندا (2-اق ءان مەملەكەتتىك تىلدە بولدى) شىرقاپ جۇرگەن انشىلەردى سايرانداتىپ قويعان ەلوردا اكىمدىگى سول كەزدە نەگە 6 مامىرداعى باس سانيتاردىڭ قاۋلىسىنا قارامادى؟

سالىستىرۋ ءۇشىن ايتار بولساق، ەكىنشى دۇنيەجۇزىلىك سوعىستا قازاقستاندىقتاردىڭ قۇربان بولعاندار سانى 600 مىڭداي بولسا، ساياسي قۋعىن-سۇرگىن مەن اشارشىلىق قۇرباندارىن قوسقاندا 4 ميلليوننان اسىپ كەتەدى، ياعني، جەتى ەسە ارتىق قازا تاپقاندار. جانە دە ولار سوعىسقا جينالعان، قارۋ ۇستاعان ساربازدار ەمەس، كوبىسى – قاريالار قوسا ايەلدەر مەن بالالار ەدى. بۇنى كەز كەلگەن وتاندىق تاريحشى، الاشتانۋشى دالەلدەپ شىعادى.

ءوز ەلىڭدە بالا-شاعاسىمەن بىرگە، اۋىل-ايماعىڭمەن، قالىڭ ەلىڭمەن بىرگە ازاپتالىپ، اشتان ءولۋ - ەڭ اۋىر قايعىلى قاسىرەت، قورلىق ءولىم!

پارلامەنتتىك پارتياعا اشارشىلىق قۇرباندارىن ەسكە الىپ، شەرۋ وتكىزۋگە ەلوردادا رۇقسات جوق! ال وڭتۇستىك استانادا تۇسىنىكسىز توپتار سايران سالادى. ءدال سول سياقتى وتكەن جىلى 16 جەلتوقساندا «اق جول» پارتياسىنا ەل تاۋەلسىزدىگى مەن مەملەكەتتىك ءتىلدى قولداۋ ءۇشىن ميتينگىگە رۇقسات بەرىلمەگەن ەدى…

بەلگىلى قازاق اقىنى قازىبەك يسانىڭ «زۇلمات. 4 ميلليون قازاقتى جوقتاۋ» ازا جىرىنداعى:

«قولىن جايىپ، نان سۇراعان سابيلەر،

و دۇنيەدە دۇعا سۇراپ ءجۇر ءالى»- دەپ جىرلاعانىنداي، حالقىمىزدىڭ 70 پايىزدان استامى وپات بولعان قۇرباندارىمىزعا دۇعا جاساپ، تاعزىم ەتە الماساق، ەلدىگىمىز قايسى؟

قۇرمەتتى التاي سەيدىرۇلى!

ءبىز، «اق جول» دەموكراتيالىق پارتياسى، ءسىزدىڭ ورىنباسارىڭىز شىعارعان شالاعاي شەشىمىن قايتا قاراستىرۋىن تالاپ ەتەمىز.

«الاشقا تاعزىم» اتتى شەرۋ وتكىزۋ ءۇشىن جوعارىدا كورسەتكەندەي، قانداي قاتاڭ سانيتارلىق تالاپتار بولسا دا، كەلىسىپ، قولداۋ كورسەتۋگە شاقىرامىز.

كولگىنوۆ اكىمدىگى 9 مامىردا كونتسەرت وتكىزگەن

تاقىرىپقا تۇزدىق:

نۇر-سۇلتان قالاسى اكىمدىگىنىڭ رەسمي ينتەرنەت رەسيۋرسى – «astana.gov.kz». ونداعى جاڭالىقتار لەنتاسىن (مامىر ايىن) شولىپ شىقتىق. قاراڭىز:

«جەڭىس جولدارىمەن»: نۇر-سۇلتاندا 9 مامىر قۇرمەتىنە كوشپەلى كونتسەرت ءوتىپ جاتىر»، اتتى اقپارات. 9 مامىر كۇنى جاريالانعان.

جەڭىس كۇنىنە وراي «جەڭىس جولدارىمەن – دوروگامي پوبەدى» اتتى جىلجىمالى كونتسەرتتە اسكەري جىلدارداعى مۋزىكالىق كومپوزيتسيالاردى ورىندايتىن ساحنا مەن ارتىستەرى بار اۆتوكولىك قالانىڭ باستى كوشەلەرىمەن ءجۇرىپ وتكەن.

«قالا تۇرعىندارى مەن قوناقتارى ءۇشىن رەترو-كولىكتەر توسىنسىي رەتىندە ءجۇرىپ ءوتىپ، سول جىلدارعى ەرەكشە كوڭىل-كۇيدى جەتكىزەدى. ولار قابانباي باتىر، ورىنبور، پانفيلوۆ، مۇڭايتپاسوۆ، كەنەسارى، بەيبىتشىلىك كوشەلەرىمەن، ماڭگىلىك ەل، تاۋەلسىزدىك، ابىلاي حان جانە ت.ب. داڭعىلدارىمەن ءجۇرىپ وتەدى. كوشپەلى كونتسەرت نۇر-سۇلتان قالاسى اكىمدىگى الدىنداعى الاڭعا كەپ توقتايدى. ءىس-شارا قالالىق اكىمدىكتىڭ قولداۋىمەن بارلىق سانيتارلىق نورمالاردى ساقتاي وتىرىپ وتۋدە. كونتسەرتكە قاتىسقان بارلىق انشىلەر پتر-تەستتەن وتكەن»، - دەلىنگەن رەسمي اقپاراتتا.

«اشىق اسپان استىنداعى كونتسەرت: نۇر-سۇلتاندا ۇوس ارداگەرلەرىن قالاي قۇتتىقتاپ جاتىر؟». بۇل دا 9 مامىر كۇنگى اقپارات. استانا اكىمى التاي كولگىنوۆتىڭ Instagram-داعى جازباسى جاريالانعان.

وندا: «قالاداعى ەپيدەميولوگيالىق جاعدايدى ەسكەرە وتىرىپ، بۇقارالىق شارالار وتكىزۋ مۇمكىن بولمادى. بىراق بۇعان قاراماستان، ءبىز ارداگەرلەرىمىزگە سىي-قۇرمەت تانىتتىق. ارداگەرلەردىڭ تەرەزەلەرىنىڭ الدىندا اسكەري وركەستردىڭ شەرۋى مەن قويىلىمى ۇيىمداستىرىلدى. وركەستر سوعىس جىلدارىنداعى اندەردى ورىندادى. بالالاردىڭ ارداگەرلەرگە زور قۇرمەتپەن قاراپ، كونتسەرت تاماشالاعانى قۋانتادى. ارداگەرلەردىڭ كەۋدەلەرى مەدالدارعا تولى ەكەنىن كورگەن بالالار ولاردىڭ اسكەري وقيعالارىن تامسانا تىڭدادى»، - دەپ جازىلعان.

ايتپاقشى، بەلگىلى اقىن، جۋرناليست ازامات تاسقاراۇلى كولگىنوۆ اكىمدىگى كەرەمەتتەپ وتكىزگەن «جەڭىس جولدارىمەن – دوروگامي پوبەدى» اتتى جىلجىمالى كونتسەرت تۋرالى: «استانا اكىمدىگى ۇيىمداستىرعان «جەڭىس جولىمەن» اتتى كوشپەلى كونتسەرتتىڭ 6,5 ساعاتتىق تىكەلەي كورسەتىلىمىن ەرىنبەي قاراپ شىقتىم. التى ءان قازاقشا، 60 ءان ورىسشا ايتىلدى. تاۋەلسىز قازاق ەلىنىڭ استاناسى ەمەس، رەسەيدىڭ ءبىر گۋبەرنياسىندا ءوتىپ جاتقان كونتسەرت سەكىلدى. ال التى ءان شىن مانىندە ەكى-ءۇش رەت ورىندالعان ەكى ءان عانا. ءبىرى – ەسكەندىر اتامىزدىڭ «اتامەكەنى»، ەكىنشىسى – سەيدوللا بايتەرەكوۆتىڭ «ءالياسى». بۇل نە ماسقارا؟! ەلوردا اكىمى التاي كولگىنوۆ، مادەنيەت باسقارماسىنىڭ باسشىسى نۇرلان ءالىمجانوۆ، نامىس قايدا؟!  بۇل قازاق حالقىنا، قازاق تىلىنە جاسالعان ناعىز ديسكريميناتسيا!» – دەپ جازعان ەدى.

ال ءماجىلىس دەپۋتاتى قازىبەك يسا كولگىنوۆ اكىمدىگىن، ونىڭ مادەنيەت باسقارماسىن:  «تاۋەلسىزدىگىنە 30 جىل تولعان قازاق ەلىنىڭ استاناسى نۇر-سۇلتان قالاسىندا ما، جوق رەسەي گۋبەرنياسى ەكاتەرينبۋرگتە ءوتىپ جاتىر ما؟!. كورشى، تۋىس وزبەكستاننىڭ استاناسى تاشكەنتتە بولسىن، قاي قالاسى بولسىن، ءدال وسىلاي بولۋى كەشەگى كەڭەس يمپەرياسى كەزىنىڭ وزىندە مۇمكىن ەمەس ەدى. قايران، ۇلتتىق يدەولوگياسىز بوسقا وتكەن 30 جىل!»، - دەپ سىناعان ەدى.

وسىدان كەيىن، ەلباسىنىڭ ءرولىن سومداپ ءجۇرىپ، شەنەۋنىك بولعان (اۋەلى دەپۋتات بولىپ سايلانعان، سوسىن ەلوردا اكىمدىگىنە اۋىسقان) نۇرلان ءالىمجانوۆ: «سوۆەتتىك سيمۆوليكانى كوتەرىپ جۇرگەندەردىڭ استانا اكىمدىگىنە ەش قاتىسى جوق. ولاردىڭ ءبىزدىڭ جىلجىمالى كونتسەرتكە قالاي تاپ بولعاندارىن بىلمەيدە قالدىم. سوسىن ءىستىڭ ءمان جايىن وزدەرىنە سۇرادىم. ولار جىلدا وزدەرى وسىلاي شىعىپ جۇرگەن رەترو كلۋب ەكەن»، - دەپ جاۋاپ بەرگەن.

ءتۇيىن.

مىنە، 9 مامىردا الاۋلاتىپ-جالاۋلاتىپ كونتسەرت وتكىزگەن التاي كولگىنوۆ اكىمدىگى 31 مامىر اشارشىلىق پەن ساياسي قۋعىن-سۇرگىن قۇرباندارىن ەسكە الۋ شاراسىنا كەلگەندە كارانتيندىك شەكتەۋلەردى العا تارتىپ وتىر ەكەن.

بىزدەگى 9 مامىر سايىن وتكىزىلەتىن سالتاناتتى شارالاردىڭ ستسەناريى ماسكەۋگە قاراپ قۇرىلاتىنى بەلگىلى. ال 31 مامىر شە؟

31 مامىر - حح عاسىردىڭ باسىندا تالايدى سارساڭعا سالىپ، قاسىرەت شەكتىرگەن ساياسي قۋعىن-سۇرگىن قۇرباندارىن ەسكە الۋ كۇنى! اتاۋلى كۇن نۇرسۇلتان نازارباەۆتىڭ جارلىعىمەن 1997 جىلدان باستاپ اتاپ ءوتىلىپ كەلەدى. دەيمىز-اۋ! باسقا، باسقا ەمەس، نازارباەۆتىڭ جارلىعىمەن اتالىپ وتۋگە ءتيىستى كۇندى كەيبىر اكىم-قارالار مۇلدەم ەستەن شىعارىپ، قازاقتىڭ 4 ميلليون ادامىن جالماعان زۇلماتتى كۇنى ارۋاقتارعا تاعزىم وتۋگە شامالارى كەلمەي كەلەدى.

ۇلتقا جاسالعان قاستاندىققا شىنايى باعا بەرۋ بۇگىنگى قازاق بيلىگى مەن حالقىنىڭ بورىشى دەيمىز. الايدا، ماسكەۋگە مويىن سوزىپ قاراپ وتىرعان قازاقستان بيلىگى اشارشىلىق پەن ساياسي قۋعىن-سۇرگىن قۇرباندارىن ەسكە الۋعا كەلگەندە ەنجار. بالكىم، ماسكەۋدەگى مىقتىلاردىڭ مىسى باسىم بولىپ تۇرعاندىقتان دا شىعار... ايتپەسە، 9 مامىردا توي تويلاعان كولگىنوۆ اكىمدىگى 31 مامىرداعى ەسكە الۋ شاراسىنا نەگە رۇقسات بەرمەي وتىر؟...

نۇرگەلدى ابدىعانيۇلى

Abai.kz