اۋىل اكىمدەرىن سايلاۋ بيىل شىلدە ايىنىڭ سوڭعى 10 كۇنى ىشىندە ءوتۋى ءتيىس. بۇل تۋرالى قازاقپارات مالىمدەدى.

قر ۇلتتىق ەكونوميكا مينيسترلىگىنىڭ اقپاراتىنشا، سايلاۋ 2021 جىلدىڭ تامىز ايىنان باستاپ وكىلەتتىگى اياقتالاتىن اكىمدەرگە قاتىستى بولادى. بۇل رەتتە سايلاۋ 40 كۇن بۇرىن جاريالانادى. ال سايلاۋدىڭ ءوزى ءىس باسىنداعى اكىمنىڭ وكىلەتتىك مەرزىمى اياقتالعانعا دەيىن 10 كۇن بۇرىن وتەدى.

- «وسىلايشا، العاشقى تىكەلەي سايلاۋ وسى جىلدىڭ شىلدە ايىنىڭ سوڭعى ونكۇندىگىندە ءوتۋى ءتيىس. بۇل رەتتە كانديداتتاردى ۇسىنۋ سايلاۋ جاريالانعاننان كەيىن كەلەسى كۇنى باستالادى جانە سايلاۋ وتكىزىلەتىن كۇنگە دەيىن 15 كۇن بۇرىن اياقتالادى. ياعني ۇزارتۋ مەرزىمىنىڭ ۇزاقتىعى 14 كۇنگە دەيىن جەتۋى مۇمكىن. وسى ۋاقىت ىشىندە كانديدات تىركەۋگە قاجەتتى قۇجاتتاردى جيناۋمەن اينالىسادى»، - دەدى مينيسترلىك وكىلدەرى.

كانديداتتاردى تىركەۋ سايلاۋ كۇنىنەن 10 كۇن بۇرىن اياقتالادى. وسى كەزەڭدە اۋماقتىق سايلاۋ كوميسسياسى ۇسىنىلعان قۇجاتتاردىڭ دۇرىستىعىن تەكسەرەدى. سايلاۋ كۇنىنىڭ الدىنداعى سوڭعى ونكۇندىكتە ۇگىت-ناسيحات ءىس-شارالارى، تىركەلگەن كانديداتتار تۋرالى بۇقارالىق اقپارات قۇرالدارىندا جاريالانىمدار جانە سايلاۋعا دايىندىق جۇزەگە اسىرىلادى.

- «سايلاۋ وتكىزىلگەننەن كەيىن ءۇش كۇن ىشىندە قورىتىندى شىعارىلادى، جەتى كۇن ىشىندە سايلانعان اكىمدى تىركەۋ جۇزەگە اسىرىلادى. بۇل رەتتە سايلانعان اكىمنىڭ وكىلەتتىگى ونى ءتيىستى اۋماقتىق سايلاۋ كوميسسياسى تىركەگەن كەزدەن باستالادى»، - دەپ تۇسىندىرەدى ۆەدومستۆودان.

Abai.kz