بەلگىلى وپپوزيتسيالىق ساياساتكەر جانبولات ماماي مەن «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك اراسىندا سوت پروتسەسسى ءوتىپ جاتقانى بەلگىلى. جانبولات مامايدىڭ جەلىدە تاراعان «زەرتتەۋىنەن» كەيىن «ار-وجدانىم مەن ىسكەرلىك بەدەلىمە نۇقسان كەلتىردى» دەگەن باۋىرجان قادىرعاليۇلى سوتقا جۇگىنىپ، ماماي مەن ونىڭ ايەلى ينگا يمانبايدىڭ ۇستىنەن دومالاق ارىز تۇسىرگەن ەدى.

بۇل سوت پروتسەسسى قازىر قوعامنىڭ ءجىتى باقىلاۋىندا. ەل ىشىندە ماماي مەن بايبەك جاقتاۋشىلارى اراسىندا قىزۋ پىكىر-تالاس وربۋدە.

جۋىردا الماتىنىڭ «راحات» بازارىنىڭ باسشىلىعى مەن 130-عا تارتا ساۋداگەرى سوتقا جۇگىنىپ، الماتى اكىمدىگىنىڭ، قالالىق جەر قاتىناستارى باسقارماسىنىڭ، قالالىق ۋربانيستيكا جانە قالالىق جوسپارلاۋ باسقارماسىنىڭ، قالالىق جەر كوميسسياسىنىڭ شەشىمدەرىنىڭ كۇشىن جويۋ تۋرالى تالاپ-ارىزدارىن جولداپتى.

وعان الماتىنىڭ بۇرىنعى اكىمى باۋىرجان بايبەك ءۇشىنشى تاراپ رەتىندە شاقىرىلعان ەكەن.

الماتىنىڭ ايدىك بولعان «باراحولكاسىنداعى» «راحات» بازارىنا قاتىستى داۋ ءالى باسىلماي تۇر. بيىل ناۋرىز ايىنىڭ باسىندا باق پەن الەۋمەتتىك جەلىدە: «الماتىدا 250-گە تارتا كاسىپكەر جۇمىستارىنان ايىرىلىپ قالۋى مۇمكىن»، دەگەن اقپارات جاريا بولدى. وندا الماتىداعى «راحات» بازارىنىڭ جەر ۋچاسكەسى وزگە كومپانيانىڭ قولىنا ءوتىپ كەتكەنى تۋرالى ايتىلعان.

«جەردى جالعا العان جاڭا كومپانيا ەسكى بازاردى ءسۇرىپ تاستاپ، ورنىنا جيھاز فابريكاسىن سالماق»، دەگەن ساۋداگەرلەر نارازىلىقتارىن ءبىلدىرىپ، ميتينگكە  دە شىققان.

«راحات» بازارىنىڭ جابىلۋىنا قارسى كاسىپكەرلەردىڭ ايتۋىنشا، «تكم» كومپانياسى بازار اۋماعىن جيىرما جىلدان استام ۋاقىت بويى جالعا الىپ كەلگەن. ال 2018 جىلى جەرگىلىكتى اتقارۋ ورگانى (الماتى قالالىق اكىمدىگى) جەر «زيراتتىڭ سانيتارلىق قورعاۋ ايماعىندا ورنالاسقانىن» سەبەپ ەتىپ، جالعا الۋ مەرزىمىن ۇزارتپاعان.

ءبىر قىزىعى، جەردىڭ پايدالانۋ ماقساتى وزگەرتىلمەستەن، ءبىر اي ۋاقىت ىشىندە ءدال سول جەردى وزگە كومپانياعا - «الماتى CPS» جشس-عا جيھاز فابريكاسىن سالۋ ءۇشىن 5 جىلعا جالعا بەرۋ تۋرالى شەشىم شىعارعان.

اتالعان فابيركانى سالۋ تۋرالى قاۋلىعا الماتى قالاسىنىڭ بۇرىنعى اكىمى، قازىر «نۇر وتان» پارتياسى توراعاسىنىڭ ورىنباسارى باۋىرجان بايبەك قول قويعان. ال «ازاتتىق راديوسى» فابريكا سالۋشى كومپانياعا يەلىك ەتكەن ادام باۋىرجان بايبەكتىڭ اكەسى قىدىرعالي بايبەكپەن سەرىكتەس بولعانىن انىقتاپ جازعان.

«تكم» جشس باسشىلىعىىنڭ سوتقا بەرگەن ارىزىندا جاۋاپكەر رەتىندە: الماتى قالالىق اكىمدىگى، الماتى ق. جەر قاتىناستارى باسقارماسى، الماتى ق. قالالىق جوسپارلاۋ جانە ۋربانيستيكا باسقارماسى، الماتى ق. كاسىپكەرلىكتى دامىتۋ جانە ينۆەستيتسيالار باسقارماسى، الماتى ق. جەر كوميسسياسىنىڭ مۇشەلەرى: ازىرباەۆ مۇحيت، مۇقانوۆ تەمىرلان، يمانبەت راۋشان، قۇدايبەرگەن قايرات، گراياچەۆ ميحايل، يبراگيموۆا ساۋلە تانىلعان. ودان بولەك، ءۇشىنشى تاراپ رەتىندە الماتىنىڭ بۇرىنعى اكىمى، قازىرگى «نۇر وتان» پارتياسى توراعاسىنىڭ ءبىرىنشى ورىنباسارى بۋاىرجان بايبەك پەن «راحات» بازارىنىڭ 128 ساۋداگەرى دە سوتقا شاقىرتىلعان.

ۇزىن-سانى 14 بەتتىك تالاپ-ارىزدا الماتى قالالىق اكىمدىگىنە قاراستى قۇزىرلى مەكەمەلەر مەن قالالىق جەر كوميسسياسى «راحات» بازارى ورنالاسقان اۋماقتاعى جەر تەلىمىن «تكم» جشس-عا جالعا بەرۋ مەرزىمىن ۇزارتۋدان باس تارتىپ، ونى «الماتى CPS» جشس-عا جيھاز فابريكاسىن سالۋ ءۇشىن جالعا بەرۋ پروتسەسسىندە جىبەرىلگەن ورەسكەل زاڭ بۇزۋشىلىقتار تۋرالى ەگجەي-تەگجەيلى بايانداعان.

قىسقاشا:

جەردى جالعا الۋ تۋرالى 16.04.2015 جىلعى №66 كەلىسىمشارت بويىنشا (مەملەكەتتىك اكت نومەرى: 0013598)  «تكم» جشس جەردى ۋاقىتشا پايدالانۋ قۇقىعىمەن (كاداسترلىق نومەرى: 20-314-041-016) جالپى اۋماعى 4,9045 گا جەرگە يەلىك ەتەدى. بۇل جەردى پايدالانۋ قۇقىعى ەكى جشس-عا بەرىلەدى. ءبىرى – وسى «تكم» جشس بولسا (جەر كولەمى: 0,9699گا), ەكىنشىسى – «است ارەندا» جشس (جەر كولەمى: 3,9089 گا). انىعىراق: 05.02.2018 جىلعى جەرگە ورنالاستىرۋ جوباسى بويىنشا (مەملەكەتتىك اكت نومەرى: 0162184. 27.02.2018 داتامەن بەرىلگەن.) جاڭاعى 4 گەكتاردان اسا اۋماقتى قامتىپ جاتقان جەر ۋچاسكەسى ەكى بولىككە ءبولىنىپ، جوعارىداعى ەكى جشس مەنشىگىنە ۋاقىتشا پايدالانۋ قۇقىعىمەن بەرىلەدى.

ال 2018 جىلدىڭ 24 ساۋىرىندە الماتى قالاسى اكىمىنىڭ ورىنباسارى مۇحيت ازىرباەۆتىڭ توراعالىعىمەن الماتى قالالىق جەر كوميسسياسىنىڭ وتىرىسى ءوتىپ، «تكم» جشس-عا ۋاقىتشا پايدالانىپ وتىرعان جەردىڭ جالعا الۋ مەرزىمىن ۇزارتاۋدان ءۇزىلدى-كەسىلدى باس تارتادى.

جەردى جالعا بەرۋ مەرزىمىن ۇزارتۋدان باستارتۋ تۋرالى الماتى قالالىق اكىمدىگىنىڭ قاۋلىسىندا بىرنەشە سەبەپ كورسەتىلگەن. ولار:

*حالىققا قىزمەت كورسەتۋ عيماراتى ورنالاسقان قوعامدىق ىسكەرلىك اۋماق - اۋماقتى فۋنكتسيونالدى پايدالانۋدىڭ رۇقسات ەتىلگەن تۇرلەرىنە كىرمەيدى;

*قۇرىلىستى رەتتەۋ ءۇشىن قولدانىلاتىن قازاقستان رەسپۋبليكاسىنىڭ 16.07.2001 جىلعى «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى» زاڭىنا سايكەس كوشەلەرى ءىشىنارا «قىزىل جولاقتا» ورنالاسقان;

*قازاقستان رەسپۋبليكاسىنىڭ 16.07.2001 جىلعى «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى» زاڭىنىڭ 58 بابىنا سايكەس، زيراتتىڭ سانيتارلىق-قورعاۋ ايماعىنا ونىڭ پارامەترلەرىنە قاراماستان عيماراتتاردى ورنالاستىرۋعا (سالۋعا) جول بەرىلمەيدى.

سوتقا ارىز بەرۋشىلەر الماتى قالاسىنىڭ سول كەزدەگى اكىمى باۋىرجان بايبەكتىڭ جەر ۋچاسكەسىن «تكم» جشس-عا جالعا بەرۋدەن ءۇزىلدى-كەسىلدى باس تارتىپ، شۋ شىعاراتىن بولسا جاۋاپكەرشىلىككە تارتۋدى تاپسىرعانىن ايتىپتى.

ارىزدا:

«2018 جىلى 15 مامىردا الماتىنىڭ ەكس-اكىمى باۋىرجان بايبەك اكىمدىك عيماراتىندا جيىن وتكىزدى. وعان اكىمدىك قۇرىلىمدارىنىڭ باسشىلارى، ۇقك دەپارتامەنتىنىڭ باسشىسى، الماتى قالالىق پروكۋرورى جۇيرىكتاەۆ ب.، پوليتسيا دەپارتامەنتىنىڭ باسشىسى كۇدەباەۆ ە.، «تكم» جشس وكىلدەرى: ديرەكتورى ساعىمبەكوۆ ا.، زاڭگەر تولەنوۆا د.، قاتىستى. وندا باۋىرجان بايبەك «راحات» بازارىنىڭ جەرىن «ءولىپ كەت» «تكم» جشس-عا بەرمەيتىنىن ايتىپ، 2 اپتا ىشىندە جەر ۋچاسكەسىن بوساتۋدى تالاپ ەتتى. ونان سوڭ، قۇقىق قورعاۋ ورگاندارىنا، الماتى قالالىق پروكۋرورىنا تىكەلەي تاپسىرما بەرىپ: «ولار مىنە، سىزدەرمەن بىرگە وتىر. تۇرلەرىن جاتتاپ الىڭىزدار. ەگەر شۋ (بۋنت) بولاتىن بوسلا، جاۋاپكەرشىلىككە تارتىڭىزدار»، - دەدى دە زالدان شىعىپ كەتتى»، - دەپ جازىپتى ارىزدا.

2018 جىلعى 24 ساۋىردەگى الماتى قالالىق جەر كوميسسياسى شەشىمى مەن الماتى قالاسى اكىمدىگىنىڭ قاۋلىسىن كۇشىن جويۋ تۋرالى «تكم» جشس ارىزى بويىنشا 2018 جىلعى 3 مامىر كۇنى سوت وتىرىسى وتكەن. الماتى قالالىق اۋدانارالىق مامانداندىرىلعان ەكونوميكالىق سوتى (تواراعا قازىمبەتوۆا گ.) 2018 جىلدىڭ 7 تامىزىندا قالالىق اكىمدىك پايداسىنا شەشىم شىعارعان.

ونان كەيىن دە بىرنەشە سوت پروتسەسسى وتكەن. سوت بىردە «تكم» كومپانياسىنىڭ، بىردە قالالىق اكىمدىك پايداسىنا شەشىم شىعارىپ كەلگەن.

وسىعان دەيىن ءبىز الماتى قالالىق اكىمدىگى «تكم» جشس مەن «الماتى CPS» جشس وكىلدەرىن شاقىرىپ، ۇشجاقتى جيىن وتكىزگەنى تۋرالى جازعان ەدىك. وندا الماتى اكىمدىگى «الماتى CPS» جشس-عا يندۋستريالدى ايماقتان جەر ۋچاسكەسىن ۇسىنعان. الايدا، جيھاز فابريكاسىن سالۋشى كومپانيا بۇل ۇسىنىستان باس تارتقان.

Abai.kz