قر اقپارات جانە قوعامدىق دامۋ ءمينيسترى ايدا بالاەۆا جاستار اراسىنداعى وزەكتى 3 ماسەلەنى اتادى، دەپ حابارلايدى قازاقپاراتقا سىلتەمە جاساپ Abai.kz cايتى.

«كەلەسى اۋقىمدى باعىتى – جاستار جانە وتباسى ساياساتى. رەسمي ستاتيستيكا بويىنشا قازىر ەلىمىزدە 3 ميلليون 765 مىڭ جاستار وكىلى بار. بۇل حالىقتىڭ 20,4 پايىزى. 500-دەن استام جاستار ۇيىمى قىزمەت ەتەدى. وكىنىشكە وراي، بىلتىرعى پاندەميا شەكتەۋلەرىنە بايلانىستى بىرقاتار جوبا توقتاتىلعان بولاتىن. ءبىرازى ونلاين فورماتقا اۋىستىرىلدى. دەسە دە، نەگىزگى جوسپارلى جۇمىس ساقتالىپ 22 الەۋمەتتىك جوبا ىسكە استى. ونىڭ اياسىندا 300 مىڭنان استام ادامدى قامتىعان، 200-دەن استام ءىس-شارا ۇيىمداستىرىلدى»، - دەدى ول حالىققا ەسەپ بەرۋ كەزدەسۋىندە.

ءمينيستردىڭ اتاپ وتۋىنشە، بۇل كەزەڭدەگى جۇمىستا نەگىزىنەن اقپاراتتىق-كەڭەس بەرۋگە باسىمدىق بەرىلدى. جاستاردى قولداۋعا ارنالعان ءتۇرلى مەملەكەتتىك باعدارلامالار، جوبالار مەن باستامالار بويىنشا 11 ميلليون ادامعا كەشەندى اقپاراتتىق-ءتۇسىندىرۋ جۇمىستارى جۇرگىزىلدى. قازىرگى تاڭدا جاستار جانە وتباسى ساياساتى باعىتىندا 12 گرانت جوباسى ورىندالۋدا. جىل اياعىنا دەيىن تاعى 12 جوبا ىسكە قوسىلادى. سونىمەن قاتار، بيىل «تاۋەلسىزدىك ۇرپاقتارى» ءتۇرلى سالاداعى تالانتتى جاستاردى قولداۋعا ارنالعان 30 گرانت جوباسىن ۇسىنۋ جوسپارلانىپ وتىر.

«2020 جىلى جاستار جىلىنىڭ جول كارتاسى اياسىندا نۇر-سۇلتان، الماتى، شىمكەنت قالالارىنداعى جۇمىسشى جاستار 1 مىڭنان جالدامالى پاتەرگە قول جەتكىزدى. 2021 جىلى تاعى 3 مىڭ پاتەر بەرىلەدى. بىلتىرعى ەسەپتىك كەزدەسۋدە «جاستاردى قولداۋدىڭ 2025 جىلعا دەيىنگى كەشەندى جوسپارى» ازىرلەنىپ جاتقانى ايتىلعان بولاتىن. ساپالى ءبىلىم، تۇرعىن ءۇي، جۇمىسپەن قامتۋ، مادەني-رۋحاني قولداۋ سىندى 10 نەگىزگى باعىتتان تۇراتىن جوسپار بۇگىندە تولىق قابىلدانىپ، ناقتى ىسكە اسىپ جاتىر»، - دەدى ايدا بالاەۆا.

سونىمەن قاتار ول جاستار ساياساتى سالاداعى ماسەلەلەرگە دە توقتالدى.

«سوڭعى زەرتتەۋلەر ناتيجەسى – جاستار اراسىندا ءۇش نەگىزگى ماسەلەنىڭ وزەكتىلىگىن انىقتادى. اتاپ ايتقاندا: ساپالى ءبىلىم، جۇمىسپەن قامتۋ جانە تۇرعىن ءۇي. ياعني، جۇيەلى تۇردە شەشۋدى تالاپ ەتەتىن سۇراقتار. ال بۇل ءوز كەزەگىندە ستراتەگيالىق قۇجاتتار كەشەنىن قابىلداۋدى كوزدەيدى. ءبىرىنشى - «مەملەكەتتىك جاستار ساياساتى ماسەلەلەرى بويىنشا كەيبىر زاڭنامالىق اكتىلەرگە وزگەرىستەر ەنگىزۋ تۋرالى» زاڭ جوباسى. ونىڭ اياسىندا «جاستار دامۋىنىڭ يندەكسى»، «NEET» جاستار كاتەگورياسى» سياقتى جاڭا ۇعىمدار زاڭمەن بەكىتىلەتىن بولادى. ەكىنشى - «تاۋەلسىزدىك ۇرپاقتارى» ۇلتتىق جوباسى. ەل تاۋەلسىزدىگىنىڭ 30 جىلدىعى اياسىندا مەملەكەت باسشىسى جاستار ساياساتى سالاسىنداعى بارلىق باعدارلامانى تۇتاس ءبىر ۇلتتىق جوباعا بىرىكتىرۋدى تاپسىرعان بولاتىن. بۇگىنگە دەيىن بارلىق وڭىردە قوعامدىق تىڭداۋلار ءوتىپ، 100 دەن استام ۇسىنىس جوباعا ەنگىزىلدى»، - دەدى مينيستر.

ايدا بالاەۆا اتالعان قۇجات جاستار ساياساتى سالاسىندا بارلىق مەملەكەتتىك ورگانداردىڭ جۇمىسىن ءبىر جۇيەگە كەلتىرىپ، يدەولوگيالىق باعىتتان – بازالىق قاجەتتىلىككە دەيىنگى ماسەلەلەردى قامتيتىنىن باسا ايتتى.

«سونداي-اق، «NEET» جاستار كاتەگورياسىمەن جۇمىس جونىندە رەسپۋبليكالىق جوبالىق كەڭسە جۇمىسىن باستادى. ونىڭ اياسىندا، وسى كاتەگورياداعى جاستاردىڭ بىرىڭعاي مالىمەت بازاسىن قۇرۋ، اقپاراتتىق-ءتۇسىندىرۋ جۇمىستارىن كۇشەيتۋ، ناقتى ۇسىنىستار ازىرلەۋ جانە ادرەستىك جۇمىس بولىمدەرىن اشۋ كوزدەلىپ وتىر»، - دەدى ول.

Abai.kz