بەلارۋس ەلىنىڭ باسشىسى الەكساندر لۋكاشەنكونىڭ ەسىمى ەل اۋزىنان تۇسەر ەمەس. وعان سەبەپكەر بولعان جايت افينادان ۆيلنيۋسكە بەت العان جولاۋشىلار ۇشاعىن ءماجبۇرلى تۇردە مينسك اۋەجايىنا قوندىرىپ، ونىڭ ىشىندەگى ەكى ازاماتتى تۇتقىنداۋى بولىپ وتىر.

لۋكاشەنكونىڭ بۇيرىعى بويىنشا 26 جاستاعى رومان پروتاسەۆيچ پەن ونىڭ قىزى تۇتقىندالعان. رومان بەلارۋس ەلىندەگى تولقۋلاردا باعىت سىلتەپ، اقپارات تاراتقان NEXTA تەلەگرام كانالىنىڭ نەگىزىن قالاۋشىلاردىڭ ءبىرى. اتالمىش كانالدا تولقۋ كەزەڭىندە 2 ملن اۋديتوريا بولعان. قازىرگى تاڭدا رومانعا "بۇلىك باستادى، سوعىسقا يتەرمەلەدى، توڭكەرىس جاساماق بولدى، ىرىتكى سالدى، سەپاراتيزم ارەكەتتەرىنە باردى" دەگەن ايىپتار تاعىلىپ وتىر. بۇل ايىپتار ى دالەلدەنسە، ونى ءومىر بويى باس بوستاندىعىنان ايىرۋ نەمەسە ءولىم جازاسىنا كەسۋ ۇكىمى شىعارىلۋى مۇمكىن دەيدى ساراپشىلار.

لۋكاشەنكونىڭ بۇل ارەكەتى الەمدىك قاۋىمداستىق تاراپىنان جاۋاپسىز قالمادى. ەۋروپا ەلدەرى ءبىر اۋىزدان بەلارۋس اسپانى ارقىلى ۇشاتىن رەيستەرىنىڭ باعىتىن وزگەرتىپ جاتىر. مينسككە انە-مىنە بەرىلۋى ءتيىس بولعان 3 ملرد ەۋرو كومەك بەرىلمەيتىن بولدى. بەلارۋس ەلىنىڭ ءىرى كومپانيالارىنا سانكتسيا سالۋ جاعى قاراستىرىلىپ جاتىر. ال ەكونوميكالىق قىسىمنان بولەك، لۋكاشەنكو رەجيمىنە قىزمەت ەتەتىن ءىرى لاۋازىم يەلەرىنىڭ ەۋروپاداعى ەسەپشوتتارىن بۇعاتتاۋ ماسەلەسى دە قاراستىرىلۋدا. بۇل مينسك ءۇشىن ۇلكەن سوققى. ەۋروپا ەلدەرىنىڭ قارسى شارالارى بەلارۋس ەكونوميكاسىن جىل سايىن 3-5 ملرد دوللار پايدادان قاعۋى مۇمكىن دەگەن بولجامدار ايتىلۋدا.

لۋكاشەنكونىڭ بۇل ارەكەتى تەك قانا ەكونوميكالىق شىعىن ەمەس، ساياسي قاتەرگە دە تولى. ول ەندى ەۋروپا ەلدەرىمەن قاتىناس جاساۋ مۇمكىندىگىنەن ءبىرجولاتا ايىرىلدى. دەمەك ەندى ول انىق رەسەي مەن قىتايدىڭ قولداۋىنا عانا سۇيەنۋگە ءماجبۇر. لۋكاشەنكونىڭ بۇل قادامىنا قاتىستى اككى ساياساتكەر ميحايل سااكاشۆيلي ءوز پىكىرىن ءبىلدىردى. Ryanair ۇشاعىن ءماجبۇرلى تۇردە قوندىرعان لۋكاشەنكونىڭ ارەكەتى تەررورلىق اكت بولىپ سانالادى. سوندىقتان دا ونى اقتاۋ مۇمكىن ەمەس، الايدا ونىڭ اۋىر سالدارى ەل حالقىنا تيمەك.

"ەۋروپا قازىر ولارمەن قاتىناسىن ءۇزىپ، بەلارۋس ديپلوماتتارىن ءوز ەلدەرىنەن قۋىپ جاتىر. بۇل بەلارۋس ەلىنىڭ قاراپايىم حالقىنا سوققى بولادى. قازىر لۋكاشەنكو ءوزىن تىعىرىققا ابدەن تىرەدى. ول نە ءپۋتيننىڭ ايتقانىنان مۇلدە شىقپايتىن باسشىعا اينالىپ، رەسەيگە بەلارۋستى اقىرىنداپ قوسادى نەمەسە بيلىگىنەن ءبىرجولاتا ايىرىلادى. ويتكەنى سوڭعى ارەكەتى ارقىلى بەلارۋس ەڭ سوڭعى مۇمكىندىگىن جوعالتتى، ەندى ول ەركىن قوزعالا المايدى", - دەدى بۇرىنعى گرۋزيا باسشىسى.

ونىڭ ويىنشا لۋكاشەنكو وتۋگە بولمايتىن قىزىل سىزىقتان ءوتىپ كەتتى. "ەندى كەرى قايتۋعا جول جوق. سوندىقتان دا ءبىز قازىر ۇلكەن گەوساياسي وزگەرىستەردىڭ كۋاسى بولامىز" دەدى سااكاشۆيلي.

بەلارۋس ەلىنىڭ باسشىسى 28 مامىردا پۋتينمەن كەزدەسپەك. كەزدەسۋ بارىسىندا ولار سوڭعى وقيعانى دا تالقىلاماق.

اسحات قاسەنعالي

Abai.kz