بۇگىن ءماجىلىس توراعاسى نۇرلان نىعماتۋلين جاپونيا پارلامەنتى وكىلدەر پالاتاسىنىڭ سپيكەرى تاداموري وشيمامەن قازاقستان مەن جاپونيا اراسىنداعى جان-جاقتى ىنتىماقتاستىق پەن پارلامەنتارالىق ديالوگتى نىعايتۋ تۋرالى كەلىسسوز جۇرگىزدى.

بەينەكونفەرەنتسيا بايلانىسى ارقىلى وتكەن كەزدەسۋدە ءماجىلىس توراعاسى جاپونيا قازاقستاننىڭ ازياداعى ماڭىزدى ستراتەگيالىق سەرىكتەس ەل ەكەنىن، قوس مەملەكەت اراسىندا سەنىمدى ساياسي ديالوگ ورناپ، ىنتىماقتاستىقتىڭ بەرىك ىرگەتاسى قالانعانىن، وعان قازاقستان رەسپۋبليكاسىنىڭ تۇڭعىش پرەزيدەنتى-ەلباسى نۇرسۇلتان نازارباەۆتىڭ شەشۋشى ءرول اتقارعانىن اتاپ ءوتتى.

سونداي-اق، مەملەكەت باسشىسى قاسىم-جومارت توقاەۆتىڭ جاپونيامەن كوپجوسپارلى ىنتىماقتاستىقتى دامىتۋعا ەرەكشە ءمان بەرەتىنىن ايتقان نۇرلان نىعماتۋلين ەلدىڭ ساياسي جۇيەسىن جاڭعىرتۋ،  وتاندىق زاڭنامانى جەتىلدىرۋ جونىندەگى جۇمىستار تۋرالى، پرەزيدەنتتىڭ ساياسي رەفورمالارىنداعى نەگىزگى بولىپ تابىلاتىن ميتينگ جانە سايلاۋ تۋرالى زاڭدار جايىندا اڭگىمەلەدى.

اتاپ ايتقاندا، پالاتا سپيكەرى 29 جاسقا دەيىنگى ايەلدەر مەن جاستار ءۇشىن پارتيالىق تىزىمدەردە زاڭنامادا كوزدەلگەن 30 پايىزدىق كۆوتانى، ءماجىلىس سايلاۋىندا ساياسي پارتيالار ءۇشىن ءوتۋ شەگىن تومەندەتۋ، بارلىق دەڭگەيدەگى سايلاۋ بيۋللەتەندەرىنە «بارلىعىنا قارسى» باعانىن ەنگىزۋ سياقتى زاڭناماداعى جاڭالىقتاردى اتاپ ءوتتى.

كەزدەسۋ باراسىندا تاراپتار قازاقستان مەن جاپونيا اراسىنداعى قارىم-قاتىناستارىنىڭ ماڭىزدى قۇرامداس بولىگى رەتىندە پارلامەنتارالىق بايلانىستى جانداندىرۋدى قولدادى.

ءوز كەزەگىندە، تاداموري وشيما جاپونيا قازاقستانمەن ىنتىماقتاستىققا زور ءمان بەرەتىنىن جانە ستراتەگيالىق سەرىكتەس مەملەكەت ەكەنىن، ەكى ەل اراسىنداعى سىنداردى بايلانىس ودان ءارى نىعايا تۇسەتەتىنە سەنىم ءبىلدىردى.  سونىمەن قاتار، قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ يادرولىق قارۋدان ازات الەم قۇرۋعا قوسقان ەرەكشە ۇلەسىن اتاپ ءوتتى.

نۇرلان نىعماتۋلين مەن تاداموري وشيما پارلامەنتارالىق ديالوگتى نىعايتۋ قازاقستان مەن جاپونيا اراسىنداعى ءوزارا ءتيىمدى ىنتىماقتاستىقتى دامىتۋعا ىقپال ەتەتىنىنە سەنىم ءبىلدىردى.

Abai.kz