مىنە 30 جىل بولدى بيلىكتىڭ حالىققا ەرتەگى ايتىپ، الداپ كەلە جاتقانىنا. الىدە سول قالپىنان تايماي ايتا بەرەتىن سياقتى. سودان بولار جۇرتتىڭ قازىر بيلىكتىڭ ايتقانىنا، ۋادەسىنە سەنە بەرمەيدى. ويتكەنى بيلىكتەن حالىقتىڭ كوڭىلى قالعان.

سوڭعى كۇندەرى الەۋمەتتىك جەلىلەر شۋلاپ جاتقان مىنا ءبىر ماسقارا دەرەكتى ەستىگەن بولارسىزدار. مامين ۇكىمەتىنىڭ ارتىن اشقان ساياساتتانۋشى سانجار بوقاەۆ مىناداي دەرەكتەردى العا تارتىپتى. ايتالىق: قازاقستاندا 167 ءتۇرلى كولىك شىعارىلادى ەكەن. سونىڭ ىشىندە الەمدىك نارىقتا ەرەكشە ورىن الاتىن 22 كولىكتىڭ ءتۇرى بار كورىنەدى. ال، الەمدە اۆتوكولىكتەردى شىعارۋدان العاشقى بەستىككە كىرەتىن جاپون ەلى نە ءبارى 14 كولىكتىڭ ءتۇرىن شىعارسا، گەرمانيا 15 كولىكتىڭ ءتۇرىن وندىرسكە قويا العان ەكەن. بۇلارمەن سالىستىرعاندا قازاقستان 167 كولىك ءتۇرىن سونىڭ ىشىندە 22 برەندى كولىك شىعارۋدى جولعا قويا الىپتى. ولار ەلىمىزدە سوڭعى 10 جىلدا اشىلعان 130 زاۋىتتا شىعادى ەكەن. بۇل دەرەكتەر ۇكىمەتتىڭ سايتىندا ورنالاستىرىلىپتى. مىنە ۇكىمەتتىڭ كەزەكتى الداۋى. كەزەكتى ەرتەگىسى. مامين ۇكىمەتى كىمدى الداپ وتىر؟ وزدەرىن بە، الدە حالىقتى ما؟

بىزدە كولىك شىعاراتىن 130 زاۋىت جوق ەكەنى بەسەنەدەن بەلگىلى. 167 ءتۇرلى كولىك شىعارۋ اۆتوالىپتار ەلى جاپون مەن گەرمانيانىڭ قولىنان كەلمەگەندە ەكونوميكاسى مەشەۋ، جەمقورلىق جايلاعان قازاقستاننىڭ قولىنان كەلدى دەگەندە كىم سەنەدى؟ راس، بىزدە ازدى كوپتى كولىكتەر شىعارىلادى. بىراق ونى Made in Kazakhstan دەۋگە كەلمەيدى. ءبىز بار جوعى دايار كەلگەن دۇنيەنى قۇراستىرامىز. ونى قازاقستاندا شىعارىلعان دەپ ەمەس، قازاقستاندا قۇراستىرىلعان دەسە دۇرىس بولار ەدى. سوندا دەيمىن –اۋ مامين ۇكىمەتى 130 زاۋىتپەن 167 كولىك ءتۇرىن قايدان الىپ وتىر؟ سۋ جۇقپاس سۋايتتىڭ ايتقاندارى عوي، بۇل. ماسقارا!

اقيقاتىن ايتساق، مۇنداي ۇكىمەت ەلدى باسقارا المايدى.

دوعارىسقا كەتكەنى ءجون.

ازاماتحان ءامىرتايدىڭ جازباسى

Abai.kz