«پەتروپاۆل اتاۋىن وزگەرتۋدى ءبىر ادام شەشپەيدى»

پەتروپاۆل قالاسىنىڭ اتىن وزگەرتۋ كۇن تارتىبىندە تۇرعان جوق. بۇل تۋرالى سولتۇستىك قازاقستان وبلىسىنىڭ اكىمى قۇمار اقساقالوۆ «استانا تۆ» تەلەارناسىنا بەرگەن سۇحباتىندا ايتىپتى.

سۇحبات بارىسىندا قالاداعى قۇرىلىس، ينۆەستيتسيالىق جوبالار جونىندە ايتقان اقساقالوۆ، وبلىس ورتالىعىنىڭ اتاۋى وزگەرتىلە مە، دەگەن ساۋالعا جاناما جاۋاپ بەرىپتى.

- بۇل ماسەلە ءالى كۇن تارتىبىندە تۇرعان جوق، تەك ءار جەردە تالقىلانىپ جاتقان تاقىرىپ. مەن كوپشىلىكتىڭ ۇستانىمىن قولدايمىن. كوشەنىڭ اتىن وزگەرتۋدى ءبىر ادام شەشپەيدى، ونى قوعام شەشەدى,- دەپت اقساقالوۆ.

ال، 2018 جىلى قۇمار اقساقالوۆ پەتروپاۆل قالاسىنىڭ اتاۋىن وزگەرتۋ تۋرالى تاعى دا پىكىر ءبىلدىرىپ، وعان ءالى ەرتە دەگەن.

- مەن پەتروپاۆل مەن وبلىستىڭ اتىن وزگەرتۋ تۋرالى اڭگىمەلەردى ءجيى ەستيمىن. بىراق بۇگىنگى تاڭدا قالا اتاۋىن وزگەرتۋ جۇمىستارى جۇرگىزىلىپ جاتقان جوق. مەنىڭ ويىمشا، وعان ءالى ەرتە,- دەگەن.

تاقىرىپقا تۇزدىق:

قازاقستاننىڭ كەيبىر قالالارىنىڭ اتاۋلارى ءبىر ادامنىڭ شەشىمىمەن دە وزگەرتىلەتىنىن ايتا كەتكەن ءجون. ال سولتۇستىك قازاقستان وبلىسى مەن پەتروپاۆل اتاۋىنا كەلگەندە بۇل ماسەلە ءارتۇرلى اكىمشىلىك پروتسەدۋرالىق كەدەرگىلەرگە تاپ كەلىپ، اياقسىز قالىپ كەلەدى.

انىعىندا، پەتروپاۆل اتاۋىن «قىزىلجار» دەپ وزگەرتۋ تۋرالى ماسەلە قوعامدا ۇزاق جىلداردان بەرى تالقى بولىپ كەلەدى. قوعام قايراتكەرلەرى، دەپۋتاتتار مەن قوعام بەلسەندىلەرى قالا اتاۋىن وزگەرتۋ تۋرالى ۇسىنىس-تالاپتارىن ايتقانىمەن، جوعارعى بيلىك ۇنسىزدىك تانىتىپ كەلەدى.

اتالعان ماسەلەگە قاتىستى Abai.kz اقپاراتتىق پورتالىندا ءار جىلدارى ونداعان ماقالا جاريالانعان ەكەن. سولاردىڭ ءبىرسىپىراسى، مىنەكەي: