ۇلىبريتانيانىڭ كورنۋولل گرافتىعىندا "ءۇلكەن جەتىلىكتىڭ" ءۇش كءۇندىك ءسامميتى اياقتالىپ جاتىر. ءالەمنىڭ ەڭ وزىق جەتى مەملەكەتىنىڭ باسشىلارى پاندەميا سالدارىنان ەكى جىلعا جۋىق ۋاقىتتان بەرى ءبىر-اق كەزدەسىپ وتىر.

ءسامميتتىڭ باس تاقىرىبى دا وسى پاندەميامەن كۇرەس بولدى. G7 ليدەرلەرى دامۋشى ەلدەرگە كوروناۆيرۋس ۆاكتسيناسىنىڭ كەمى ءبىر ميلليارد دوزاسىن بەرۋگە ۋادە بەردى. ونىڭ جارتىسىن اقش قامتاماسىز ەتەتىن بولدى.

سامميت بارىسىندا كليماتتىڭ وزگەرۋى دە ءسوز بولدى، بىراق ول جونىندە ناقتى كەلىسىم جاسالعانى ايتىلمادى.

اقش دامۋشى ەلدەردە ءىرى ينفراقۇرىلىم وبەكتىلەرىن سالۋدى قولداۋ باعدارلاماسىن ۇسىنىپ، بۇل ۇسىنىس سامميتكە قاتىسۋشى ەلدەر اراسىندا قولداۋ تاپتى. بۇل باستاما قىتايدىڭ وسىعان ۇقساس ء"بىر جول، ءبىر بەلدەۋ" باعدارلاماسىنا باسەكەلەس بولماق. قىتاي بۇل باستاماعا نارازىلىعىن ءبىلدىرىپ تە ۇلگەردى. ەلدىڭ سىرتقى ىستەر مينيسترلىگى "ساناۋلى ەلدەن قۇرالعان توپ عالامدىق شەشىمدى تىقپالاماۋى" ءتيىس دەپ مالىمدەدى.

رەسەيدەن تونگەن قاۋىپ ماسەلەسىن اقش پرەزيدەنتى دجو بايدەن G7 ليدەرلەرىمەن جەكە-جەكە كەزدەسكەندە ءسوز قىلدى. بۇل ماسەلە اسىرەسە گەرمانيا كانتسلەرى انگەلا مەركەلمەن كەزدەسۋدە قىزۋ تالقىلاندى. وعان "سولتۇستىك اعىن 2" سۋاستى گاز قۇبىرىنىڭ سالىنۋى تۇرتكى ەدى. رەسەي گازىن ەۋروپاعا جەتكىزەتىن بۇل جوبانى گەرمانيا قولدايدى دا، اقش قولدامايدى. بەرلين ءۇشىن دە، ۆاشينگتون ءۇشىن دە رەسەي گازىنىڭ گاز قۇبىرى ىسكە قوسىلسا دا ۋكراينا ارقىلى تاسىمالدانا بەرۋى ماڭىزدى دەدى مەركەل.

سامميتكە ۇلىبريتانيا پاتشايىمى ەليزاۆەتانىڭ قاتىسۋى ەلەۋسىز قالمادى. دجو بايدەن اعىلشىن پاتشايىمى كەزدەسكەن 13-ءشى اقش پرەزيدەنتى بولدى. بىراق بۇل ەكەۋىنىڭ العاش كەزدەسۋى ەمەس. ءبىرىنشى رەت ول ەكەۋى 1982 جىلى كەزدەسكەن. ول كەزدە بايدەن سەناتور بولاتىن، ال ەليزاۆەتانىڭ تاقتا وتىرعانىنا 30 جىل ۋاقىت وتكەن.

اقش پرەزيدەنتىنىڭ ەۋروپاعا ساپارى ودان ءارى بريۋسسەلدە جالعاسادى. ول جەردە بايدەن ەكى كۇن قاتارىنان ناتو مەن ەۋرووداق سامميتتەرىنە قاتىسادى. سارسەنبى، 16 ماۋسىم كۇنى جەنەۆا قالاسىندا ول رەسەي پرەزيدەنتى ۆلاديمير پۋتينمەن كەزدەسەدى.

Abai.kz