نۇر-سۇلتاندا ازىق-تۇلىكتىڭ قىمباتتاعانىنا نارازىلىق بىلدىرگەن تۇرعىندار ينتەگراتسيا ءمينيسترى باقىت سۇلتانوۆتىڭ ورنىنان كەتۋىن تالاپ ەتتى.

ايتۋلارىنشا، حالىق كوپ باراتىن ساۋدا نۇكتەلەرىنىڭ وزىندە قازىر كارتوپ پەن ءسابىزدىڭ ءبىر كەلىسى 500 تەڭگەدەن اسىپ كەتكەن. ال، اۋلاداعى كوكونىس ساتاتىن دۇڭگىرشەكتەردە ودان دا قىمبات دەيدى. ونسىز دا كۇنىمىزدى ارەڭ كورىپ وتىرمىز دەپ اشىنعان ايەلدەر ءمينيستردىڭ وزىنەن جاۋاپ بولماسا جاپپاي شەرۋگە شىعامىز دەپ وتىر. ال، جاۋاپتىلار بولسا بۇل ماۋسىمارالىق قىمباتشىلىق، كوكونىستىڭ باعاسى الداعى ەكى اپتادا تۇسەدى دەپ ءتۇسىندىردى.

جاردەماقىمەن كۇن كورىپ وتىرعان بۇل انالاردى قىمباتشىلىق ابدەن اشىندىرعان. ەلوردالىق ءاليا ابىلاەۆا ۇنەمى باعانى باقىلاپ، سالىستىرىپ جۇرەمىن دەيدى. ەكى اي بۇرىن وسىندا كەلىپ، كوكونىستىڭ قىمباتتاپ كەتكەنىن ايتىپ، مينيسترلىك ماماندارىمەن قارا بازارعا بارىپتى. جاۋاپتىلار سول كەزدە باعانى باقىلاۋدا ۇستايمىز دەپ ۋادە بەرگەنىمەن، كەرىسىنشە ودان سايىن كوتەرىلىپ كەتتى دەيدى.

“ازىق-تۇلىكتى نەسيەگە الىپ وتىرمىز. باسقا شارامىز جوق. ويتكەنى مۇلدەم اقشا جوق. مەن قازىر كوممۋنالدىق قىزمەتتەردى تولەي الماي وتىرمىن. ويتكەنى ماعان بالا-شاعامدى تاماقتاندىرۋ كەرەك”، – دەيدى كوپ بالالى انا ءاليا ابىلاەۆا.

ءمينيستردىڭ قۇرعاق ۋادەسىنە سەنبەيمىز دەگەن كوپشىلىك قىمباتشىلىق تىيىلماسا، قاراپايىم حالىقتىڭ جاعدايى تاعى ناشارلايدى دەپ وتىر. اكىمدىكتەر كارتوپ پەن ءسابىزدىڭ قاجەتتى قورىن جيناي المادى دەگەن باقىت سۇلتانوۆتىڭ رەسمي جاۋابىنا دا يلانبايدى. كىم جاۋاپتى بولسا دا باعانى شۇعىل ارزانداتقانىن قالايدى.

“نە سەبەپتى مينيسترلەردىڭ جالاقىسىن ازايتپايدى. جۇمىس ىستەي الماسا، ورنىنان الىپ تاستاۋ كەرەك قوي. جوق ءبىزدىڭ بيلىك حالىققا كەلگەندە ۇنەمدەيدى دە، جۇمىس ىستەۋ المايتىندارعا جالاقى تولەيدى. حالقىم سەندەر كىشكەنە شىداي تۇرىڭدار، اش وتىرا تۇرىڭدار دەپ قارايدى”، – دەيدى كوپ بالالى انا گۇلزات تورەباەۆا.

ال ساۋدا مينيسترلىگىندەگىلەر بيىل كوكونىس ەگۋشىلەر ءونىمىن كەش جينادى، الداعى 2 اپتانىڭ ىشىندە باعا قايتادان تۇسەدى دەدى.

“مىسالى ءبىز سەنبى كۇندەرى بارىپ كوردىك. شارىنعا باردىق. تاعى دا باسقا بازارلارعا باردىق. ەندى باعالار ءار ءتۇرلى. 250 تەڭگە، 300 تەڭگەدەن بار. وڭتۇستىك وڭىرلەردە ەگىن ەندى ءپىسىپ جاتتى. سول سەبەپتى 1-2 اپتا كولەمىندە باعا تۇراقتانادى”، – دەيدى ساۋدا ساياساتى باسقارماسىنىڭ باسشىسى باقىتجان تاڭىربەرديەۆ.

الايدا، جاۋاپتىلاردىڭ بۇل جاۋابىنا جينالعاندار تاعى دا سەنبەدى. 250 تەڭگە دەگەن باعا جوق، قازىرگىدەي ءسابىز بەن كارتوپ 400-500 تەڭگە ارالىعىندا ساتىلاتىن بولسا جاپپاي حالىقتىق شەرۋگە شىعامىز دەپ تارقاستى.

ال انالاردى تىڭداعان شەنەۋنىكتەر بارلىق ءۋاجىن مينيستر باقىت سۇلتانوۆقا جەتكىزىپ، وزىمەن 25 ماۋسىمدا كەزدەستىرەمىز دەپ ۋادە بەردى.