بەلگىلى ساياساتكەر، قوعام قايراتكەرى مۇحتار تايجان پرەزيدەنت قاسىم-جومارت توقاۆقا تالاپ قويىپ، ۇكىمەتتى قايتا جاساقتاۋدى ۇسىندى.

ۇسىنىس:

قاسىم-جومارت كەمەلۇلى، حالىق سەنەتىن ۇكىمەت قۇرىڭىز!

اۋىل شارۋاشىلىعىنا ارنالعان اۋماعى وتە ۇلكەن ەل قازاقستاندا ءسابىزدىڭ قۇنى 735 تەڭگەگە جەتىپ، 1,5 دوللاردى قۇراپ وتىر. جانە بۇل - مەملەكەتتىك سۋبسيديا جىلدار بويى قۇيىلىپ جاتقان سالاداعى جاعداي. جايىلىم جوقتىعىنان مال اشتان ءولىپ، كوتەرەم بولىپ، قوقىس، كارتون جەپ جاتىر! مۇنىڭ ءبارى جۇزدەگەن جىلدار بويى مال باققان كونە كوشپەندىلەر ەلىندە ورىن الىپ وتىر!

بۇل – سوڭعى جىلدارداعى ەكونوميكالىق ساياساتتىڭ قانشالىقتى سوراقى ەكەنىنەن شىنايى دا تۋرا حابار بەرەتىن كورسەتكىش. بابالارىمىزدان مۇرا بولىپ قالعان، كەلەشەك ۇرپاققا تيەسىلى ۇلتتىق قورىمىز سارقىلۋعا جاقىن تۇر. وتكەن جىلى سول جىلى تۇسكەن قارجىنىڭ 96 پايىزى جۇمسالىپ كەتتى.

ەندى ءۇ كىمەت ازىق-تۇلىك باعاسىن اكىمشىلىك جولمەن رەتتەگىسى كەلەدى. ونداي بولسا مەملەكەتتىك جوسپار جۇيەسىن ەنگىزىپ، ەكونوميكانى مەملەكەت مەنشىگىنە وتكىزىڭىزدەر! بۇل – ادامنىڭ كۇلكىسىن كەلتىرەتىن: «پويىز، توقتا، ءبىر-ەكى!» دەگەن انەكدوت قوي... نارىقتىق ەكونوميكادا باعانى – بۇيرىق، جارلىقتارمەن ەمەس، ۇسىنىستى كوبەيتۋ ارقىلى تۇسىرەتىنىن ەستىمەپ پە ەدىڭىز؟

ەكونوميكامىزدىڭ بارشا سالاسىن تۇرالاتىپ، جوعارىدا باياندالعان كۇيسىز ناتيجەگە جەتكىزگەن كلاندار مەن وليگارحتىق توپتارمەن بايلانىس-شاتىسى جوق ادامدار ۇكىمەتكە كىرۋى ءتيىس ەكەنىنە بەك سەنەمىن!

ءوز باسىم حالىق الدىندا جاۋاپكەرشىلىك ارقالاپ، ەلىمىزدى ەكونوميكالىق داعدارىستان شىعارۋعا ءازىرمىن!

مۇحتار تايجان

مامين «كريزيس مەنەدجەر» بولا المادى

قازاقستان رەسپۋبليكاسىنىڭ پرەمەر-ءمينيسترى اسقار ءماميننىڭ قىزمەتىنە ايتىلاتىن سىن مەن ءمىن كوپ. سوڭعى ەكى جىلدىقتاعى پاندەميا ەل ۇكىمەتىنىڭ داعدارىس ۋاقىتىندا ءتيىمدى شەشىم قابىلداۋ قابىلەتىنىڭ جوقتىعىن كورسەتتى.

پرەمەر-مينيستر ول – «كريزيس مەنەدجەر» بولۋى ءتيىس. اسقار مامين ءوزىن ول تاراپتان كورسەتە المادى. جۇمىسسىزدىق سانى ارتتى، دەنساۋلىق سالاسى كۇتپەگەن قيىندىقتى كوتەرە المادى، ەكونوميكا تۇرالاپ قالدى. ەندى وعان اسپانداپ تۇرعان ازىق-تۇلىك باعاسىن تاعى قوسىڭىز. دەمەك، لوگيكاعا ساي پرەمەر-ءمينيستردى اۋىستىرىپ، ۇكىمەتتى قايتا جاساقتاۋ كەرەك. ءسىز قالاي ويلايسىز؟..

Abai.kz