اسەت ەرعاليەۆ دەيتىن ۇكىمەتتەگى ەڭ جاس مينيستر. ونىڭ جاسى – 34-تە. قوستاناي وبلىسىنىڭ تۋماسى. قازاقستاندا، شۆەتسيا مەن ۇلىبريتانيادا ءبىلىم العان.

18 قاڭتاردا پرەزيدەنت توقاەۆ ۇكىمەت قۇرامىن بەكىتكەندە، ءماميننىڭ «كومانداسىنا» جاڭادان ەكى مينيستر قوسىلعان. سول ەكەۋدىڭ ءبىرى جاڭاعى اسەت ەرعاليەۆ بولدى. مينيستر كرەسلوسىنا قونجياردان بۇرىن، ەرعاليەۆ سول مينيسترلىكتە (ۇلتتىق ەكونوميكا مينيسترلىگى) ۆيتسە-مينيستر دەگەن لاۋىزىم يەسى بولعان.

مينيسترلىكتى تىزگىندەگەن ەرعاليەۆ بايانداماسىن قولتىقتاپ الىپ، ماجىلىسكە بارعاندا، دەپۋتاتتاردىڭ قازاقشا قويعان ساۋالىنا ورىسشا جاۋاپ بەرىپ، ءسوز ەستىگەن. بۇل وقيعا اقپان ايىندا بولعان ەدى.

ول كەزدە مينيستر ءوز بايانداماسىن قازاق تىلىندە ەجىكتەپ وقىپ  شىققان. قازاقشا قويىلعان سۇراقتاردى قۇلاققاپپەن تىڭداعان. ال سۇراقتار ورىس تىلىندە قويىلعان كەزدە قۇلاقاپ تاقپادى. سوسىن، قازاق تىلىندەگى العاشقى سۇراققا تۇپ-تۋرا 13 ءسوزدى قازاقشا ايتىپ، ءارى قاراي ورىسشا جاۋاپ بەردى. قازاقشا قويىلعان ەكىنشى سۇراققا 26 ءسوزدى قازاقشا سويلەپ، ارعىسىن ورىسشا جالعادى. ءۇشىنشى قازاقشا سۇراققا 15 ءسوزىن قازاقشا ارنادى دا، ءارى قاراي ورىس تىلىندە جالعاستىردى. وسىلاي جالعاسا بەرگەندە ءماجىلىس دەپۋتاتى بەرىك دۇيسەمبينوۆ جاڭا تاعايىندالعان ەكونوميكا ءمينيسترىن سوزبەن سىباپ العان.

«ءسىز وتىز جىلدىق تاۋەلسىزدىگى بار، تاۋەلسىز مەملەكەتتىڭ ماجىلىسىنە العاش رەت كەلىپ تۇرعاندىقتان، سىزگە ەسكەرتۋ جاسايىن. ءسىز قازاق تىلىندە قويىلعان سۇراققا ەشقانداي رۇقسات سۇراماستان، ورىس تىلىندە جاۋىپ بەرىپ تۇرسىز. جاس بولعانىڭىزعا قاراماستان، ءسىز 18 ميلليون حالىقتىڭ ىشىنەن مينيستر لاۋازىمىنا لايىق دەپ تاڭدالدىڭىز. ءسىزدى تاۋەلسىزدىكتىڭ قۇرداسى دەۋگە دە بولادى. ءسىزدىڭ انا تىلىڭىزدە جاۋاپ بەرۋگە دايىن بولماۋىڭىزدى – ۇيات دەپ ەسەپتەيمىن! مەنەن سىزگە ءوتىنىش – انا تىلىمىزدە قويىلعان سۇراققا انا تىلىمىزدە جاۋاپ بەرىڭىز!»، - دەگەن ەدى دەپۋتات دۇيسەمبينوۆ.

وسىلايشا، ۇكىمەتەگى ەڭ جاس مينيستر دەگەن اسەت ەرعاليەۆ تە انا تىلىنە «اقساقتار» قاتارىنا قوسىلعان.

مىنە، سول مينيستر ەرعاليەۆ الداعى ۋاقىتتا تازا قازاق تىلىندە سويلەيتىنىن ايتىپ، تاعى دا ۋادە بەرىپتى. قايدا، قاشان؟ بۇگىن. ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا. ءمينيستردىڭ ءسوزىن «sputnik.kz» سايتى جاريالاپتى.

مينيستر بۇيدەيدى:

«قازاق ءتىلىن ۇنەمى، كۇن سايىن ۇيرەنىپ ءجۇرمىن. رەپەتيتورمەن كۇن سايىن ءبىر جارىم ساعات بويى وقيمىز. جاقىن ارادا تازا قازاق تىلىندە سويلەۋگە ۋادە بەرەمىن.

بىزدە كەز كەلگەن مينيسترلىكتەگى سياقتى قۇجاتتاردى اۋدارۋمەن اينالىساتىن اۋدارماشىلار ىستەيدى. ولاردىڭ اراسىندا قازاق ءتىلىن وتە جاقسى بىلەتىن ادامدار بار. ءار جينالىسقا سولارمەن بىرگە وتىرىپ دايىندالامىز. ولاردىڭ جىلدار بويى قالىپتاسقان ادىستەمەلىك بازاسى بار. وسى ادىستەمەلىك بازانى پايدالانىپ، قازاق ءتىلىن ۇيرەنىپ ءجۇرمىن»، - دەپتى اسەت ەرعاليەۆ.

ۇكىمەتتەگى ەڭ جاس مينيستر اسەت ەرعاليەۆ مينيسترلىكتى باسقارۋ ءۇشىن تىنباي ەڭبەك ەتۋ كەرەك دەپتى جانە: «مەن قازاقستان تاريحىنداعى ەڭ جاس مينيستر ەمەسپىن. بۇعان دەيىن دە مەنەن دە جاس مينيسترلەر ۇكىمەتتە بولعان. مەن قازىرگى مينيسترلەر كابينەتىندەگى ەڭ جاسىمىن. مينيستر بولۋ ۇلكەن جاۋاپكەرشىلىكتى تالاپ ەتەدى. ول ءۇشىن بار كۇشىڭدى، تاجىريبەڭدى سالىپ، ءوز سالاڭا پايداڭدى تيگىزە الۋىڭ قاجەت. مينيستر بولۋ ءۇشىن كۇنى-ءتۇنى تالماي ەڭبەك ەتە ءبىلۋ كەرەك»، – دەدى ول.

ءتۇيىن. ەل ۇكىمەتىندە مەملەكەتتىك ءتىلدى مۇلدە بىلمەيتىن، ءتىپتى قىرىن قارايتىن قىزمەتكەرلەر از ەمەس. ولاردان بولەك ەرعاليەۆ سەكىلدى ەجىكتەپ سويلەيتىندەر مەن انا ءتىلىن ۇمىتىپ قالعاندار دا تولىپ ءجۇر.

ءبىر قىزىعى ءبىز ءسوز ەتىپ وتىرعان ۇلتتىق ەكونوميكا مينيسترلىگىن كوبىنە مەملەكەتتىك ءتىلدى ءجوندى بىلمەيتىندەر باسقارادى. الىستى ايتپاعاندى، سوڭعى جىلدارى اتالعان مينيسترلىكتى باسقارعان ەربولات دوساەۆ، رۋسلان دالەنوۆ قاتارلى مينيسترلەر دە مەملەكەتتىك تىلگە جۇيىرىك ەمەس ەدى. ءتىپتى تيمۋر سۋلەيمەنوۆ دەگەن ساباز «ماسكەۋدە بەس جىل تۇرىپ، قازاق ءتىلىن ۇمىتىپ قالدىم»، ايدى اسپانعا شىعارعان.

Abai.kz