اقش-تىڭ بۇرىنعى پرەزيدەنتى دونالد ترامپ 2021 جىلى قاڭتاردا قىزمەتتەن كەتكەننەن كەيىنگى ءوز جاقتاستارىنىڭ العاشقى ميتينگىسىن وتكىزدى. ول دجو بايدەننىڭ كوشى-قون ساياساتىن قاتاڭ سىنعا الدى، دەپ جازادى ۆۆس.

وگايو شتاتىنىڭ ۆەللينگتون قالاسىندا وتكەن ميتينگ «امەريكانى قۇتقارامىز» دەپ اتالادى. ترامپ ءوز جاقتاستارىنىڭ الدىنا شىعىپ، 2020 جىلعى قاراشاداعى پرەزيدەنتتىك سايلاۋدىڭ ناتيجەلەرى بۇرمالانعان دەپ مالىمدەدى.

ول ءۇشىنشى رەت پرەزيدەنتتىك سايلاۋعا تۇسە الاتىنىن مەڭزەدى. «ءبىز سايلاۋدا ەكى رەت جەڭىسكە جەتتىك، ءۇشىنشى رەت وتكىزۋگە تۋرا كەلۋى مۇمكىن»، - دەدى اقش-تىڭ بۇرىنعى پرەزيدەنتى.

ميتينگتە ترامپ ەڭ الدىمەن مەكسيكامەن شەكارادان ءوتىپ، ەلگە كىرىپ جاتقان ميگرانتتاردىڭ كوبەيۋ پروبلەماسىنا توقتالدى.

«ءبىزدىڭ ەلگە ميلليونداعان ادامدار كەلەدى. ءبىز ولاردىڭ كىم ەكەنىن دە بىلمەيمىز»، - دەگەن ەكس-پرەزيدەنت دجو بايدەننىڭ ارەكەتى ترامپ اكىمشىلىگى جاساعانعا قاراما-قارسى ەكەنىن اتاپ ءوتتى.

بايدەن اكىمشىلىگى ترامپتىڭ كوشى-قون ساياساتىن ادامگەرشىلىككە قايشى دەپ اتادى.

ترامپتىڭ جەكە جوسپارلارى تۇسىنىكسىز بولىپ قالسا دا، ول ءوز جاقتاستارىن وكىلدەر پالاتاسى مەن سەناتقا سايلاۋعا تۇسەتىن رەسپۋبليكاشىلاردى قولداۋعا شاقىردى.

«ءبىز جاقىندا كونگرەسستى، امەريكانى قايتارىپ الامىز»، - دەدى ول.

Abai.kz