اقش پەن ناتو-نىڭ اۋعانستانداعى ءاسكەرلەرىنىڭ قولباسشىسى گەنەرال-لەيتەنانت وستين سكوتت ميللەر اۋعانستاندا ۋشىعىپ بارا جاتقان جانجال ازامات سوعىسىنا ۇلاسۋى مءۇمكىن ەكەنىن ەسكەرتتى.

ميللەردىڭ ايتۋىنشا، "تاليبان" راديكال قوزعالىسى سودىرلارىنىڭ اۋعانستاندا جاڭا جەرلەردى از ۋاقىتتا باسىپ الۋى وسى ەلگە كورشى مەملەكەتتەردىڭ ۇكىمەتتەرىن الاڭداتۋى ءتيىس. گەنەرال-لەيتەنانت الەمدىك قاۋىمداستىق اۋعانستاننىڭ بەيبىت تۇرعىندارىنىڭ ءۇمىتىن سوندىرمەۋى ءتيىس دەپ ەسەپتەيدى.

بۇۇ مالىمەتى بويىنشا، 1 مامىردا ناتو اسكەرلەرى ەلدەن شىعارىلا باستاعالى بەرى تالىپتەر اۋعانستانداعى 370 ۋەزدىڭ ەلۋىنە باقىلاۋ ورناتتى. تالىپتەر اۋعانستاننىڭ تاجىكستانمەن شەكتەسەتىن ءتورت پروۆينتسياسىنداعى چاحەب، يانگي-كالا، داركاد، داشتي-كالا، حودجاگور، داشتي-ارچي، يموم-سوحيب جانە كالاي-زول ۋەزدەرىن، سونىمەن بىرگە "شەرحون-باندار" مەن "كوكۋل" شەكارا بەكەتتەرىن باسىپ العان.

گەنەرال ميللەر 29 ماۋسىمدا كابۋلدە وتكەن ءباسپاسوز كونفەرەنتسياسىندا وزودي راديوسىنىڭ "تاليبان" سودىرلارىنا اۋەدەن جاسالعان شابۋىلدار تۋرالى ساۋالىنا جاۋاپ بەرىپ، تالىپتەر مۇنداي شابۋىلداردىڭ جالعاسۋىن قالاماسا، اسكەري وپەراتسيالارىنىڭ ءبارىن دوعارۋى ءتيىس دەپ مالىمدەدى.

"تاليبان" قوزعالىسىنىڭ ءباسپاسوز حاتشىسى زابەحۋللو مۋدجوحيد وزودي راديوسىنا اقش-تىڭ اۋعانستانداعى اسكەرىن شىعارۋى ۇزاققا سوزىلىپ كەتكەنىن ايتىپ، ۆاشينگتوندى كاتارداعى كەلىسىم شارتتارىن بۇزدى دەپ ايىپتادى. "وسى كەلىسىمگە سايكەس، اقش "تاليبانعا" قارسى اسكەري وپەراتسيا جۇرگىزۋگە قۇقىعى جوق. كەلىسىم شارتى بۇزىلعان جاعدايدا، اياۋسىز قارىمتا ارەكەتتەرگە دايىن بولۋى ءتيىس", دەپ مالىمدەدى ول.

14 ساۋىردە اقش پرەزيدەنتى دجو بايدەن 11 قىركۇيەككە دەيىن اۋعانستاننان امەريكالىق جاۋىنگەرلەردى تۇگەل شىعاراتىنىن مالىمدەدى. 1 مامىردا اقش اسكەرى اۋعانستاننان كەتە باستادى.

Abai.kz