30 ماۋسىمدا نۇر-سۇلتاندا ون كءۇننەن بەرى اشتىق جاريالاپ جاتقان ازاماتتىق بەلسەندىلەر قازاقستان پرەزيدەنتى توقاەۆقا, بيلىككە, قۇزىرلى ورىندارعا, حالىقارالىق جءانە قازاقستاندىق قۇقىق قورعاۋ ۇيىمدارىنا, ديپلوماتيالىق ميسسيالارعا حابارلاما جولداپ، اكتسيالارىنا نازار اۋدارۋدى سۇرادى.

حابارلاما Egov پورتالى ارقىلى ازاماتتىق بەلسەندى ءاليا جاكۋپوۆانىڭ اتىنان جولدانىپ، وعان اشتىق جاريالاپ جاتقان ءاسيا باقاەۆا، گۇلنار جۇماعۇلوۆا، اقنۇر قاليانۇروۆا، سەميگۇل وشاقباەۆا قول قويعان.

حاتتا بەلسەندىلەر كونستيتۋتسيالىق كەڭەستەن قدت جانە "كوشە پارتياسى" قوزعالىستارىن ەكسترەميستىك ۇيىم دەپ جاريالاعان ەسىل اۋداندىق سوتىنىڭ شەشىمىنە قۇقىقتىق باعا بەرۋدى، بۇل قوزعالىستاردى ەۋروپارلامەنت قاۋلىسىندا اتالعانداي "بەيبىت وپپوزيتسيالىق قوزعالىس" دەپ تانۋدى سۇراعان.

بەلسەندىلەر ەسىل اۋداندىق سوتىنىڭ شەشىمىن قۇقىقتىق پروتسەدۋرالاردان ءوتۋ ءۇشىن اشىق تۇردە جاريا ەتۋدى، قاماۋداعى بارلىق بەلسەندىنى شىعارۋدى جانە ولاردى رەابيليتاتسيادان وتكىزۋدى تالاپ ەتكەن.

- مەن ءتورت جىلدان بەرى بەلسەندىلىكپەن اينالىسامىن. بىرنەشە مارتە ءتىنتتى، ايىپپۇل سالدى، قامادى. قازىر "ەكسترەميزم" كۇدىگىنە ءىلىنىپ، ۇيقاماقتا وتىرمىن. ماعان قاتىستى سوت پروتسەسى ءالى ءجۇرىپ جاتىر. مەنىڭ قانشاما سەرىكتەرىم جازىقسىز قاماۋدا وتىر. ءبىزدىڭ اشتىعىمىزعا بىرەۋلەر سەنىمسىزدىكپەن قاراۋى مۇمكىن. بىراق ءبىز ءوز پوزيتسيامىزعا بەرىكپىز. مەنىڭ مەملەكەتىم مەنى ەستىمەيدى، ءبىزدى ەستىمەيدى. ءالىمىز كەلگەنشە، كۇيىمىز جەتكەنشە اكتسيامىزدى جالعاستىرامىز، - دەدى ءاليا جاكۋپوۆا ازاتتىققا.

ول حاتتىڭ Egov پورتالى ارقىلى قۇزىرلى ورىندارعا جەتكەنىن كورىپ وتىرعانىن ايتتى.

ءاليا جاكۋپوۆانى قوشتاعان 62 جاستاعى ءاسيا باقاەۆا دا اشتىقتان السىرەي باستاعانىن، بىراق ەلدەگى ادام قۇقىعىن قورعاۋعا وسىلاي ۇلەس قوسۋعا تىرىساتىنىن جەتكىزدى.

20 ماۋسىمدا الماتىدا ءبىر توپ بەلسەندى اشتىق اكتسياسىن باستاعان. كەيىن بۇل اكتسياعا نۇر-سۇلتان، ورال، شىمكەنت، تۇركىستان وبلىسىنداعى بەلسەندىلەر قوسىلعان ەدى. كەيبىر بەلسەندى اكتسيا كەزىندە دەنساۋلىعى سىر بەرىپ، اشتىقتى توقتاتتى.

اشتىق اكتسياسىنا قاتىسىپ جاتقان بەلسەندىلەر ساياسي تۇتقىنداردى بوساتۋدى، ساياسي كوزقاراسى ءۇشىن قۋدالاۋدى توقتاتۋدى، ەۋروپارلامەنت قارارىنداعى ادام قۇقىعىنا قاتىستى تالاپتاردى ورىنداۋدى، قدت مەن "كوشە پارتياسىن" "ەكسترەميستىك ۇيىم" دەپ تانىعان سوت شەشىمىن جويۋدى، قازاقستاننىڭ سىرتقى قارىزى تۋرالى ەسەپ بەرۋدى تالاپ ەتەدى.

بەلسەندىلەردىڭ اشتىق اكتسياسىنا قازاقستان بيلىگى تاراپىنان ازىرگە ەشكىم پىكىر بىلدىرمەدى. اشتىق جاريالاعاندار قازاقستانداعى ادام قۇقىقتارى جونىندەگى ۋاكىل ەلۆيرا ازيموۆنى شاقىرعان. ازاتتىق ءتىلشىسى ومبۋدسمەننەن بەلسەندىلەر تالابى تۋرالى پىكىرىن سۇراماق بولعان ەدى، بىراق ول ۋاقىتى جوقتىعىن ايتىپ، ساۋالدى جازباشا تۇردە جولداۋدى سۇرادى.

- قازاقستان سوتى "قازاقستاننىڭ دەموكراتيالىق تاڭداۋى" (قدت) مەن "كوشە پارتياسى" قوزعالىستارىن 2018 جانە 2020 جىلدارى "ەكسترەميستىك ۇيىم" دەپ تانىپ، قىزمەتىنە تىيىم سالعان. قازاقستان باس پروكۋراتۋراسىنىڭ پىكىرىنشە، ەكى قوزعالىس – ءبىر ۇيىم. بىراق قوزعالىس جاقتاستارى مۇنى جوققا شىعارادى. اتالعان ەكى ۇيىمعا شىققان سوت شەشىمدەرى جاريالانبادى. بەلسەندىلەر سوت شەشىمدەرىن اپەللياتسياعا بەرۋگە تالپىنعانمەن ناتيجە بولمادى. ال ەۋروپارلامەنت ەكى ۇيىمدى "بەيبىت وپپوزيتسيالىق قوزعالىس" دەپ اتاعان.

- ەۋروپارلامەنت دەپۋتاتتارى قازاقستانداعى ادام قۇقىعى جايلى بيىل قابىلداعان قارارىندا نۇر-سۇلتاندى "ەكسترەميزمگە قارسى زاڭداردى" قوزعالىس جاقتاستارىنا قارسى قولداندى دەپ ايىپتاعان. ساياسي كوزقاراسىنا بايلانىستى قۋدالانعان بەلسەندىلەردى بوساتۋعا ۇندەگەن. قۇقىق قورعاۋشىلاردىڭ ايتۋىنشا، قارار قابىلدالعالى بىرنەشە اي وتسە دە، نۇر-سۇلتان بۇل باعىت بويىنشا بىردە-ءبىر قادام جاساماعان. ەسەسىنە وسى ۇيىمدارعا قاتىستى قىلمىستىق جاۋاپكەرشىلىككە تارتىلعاندار قاتارى كوبەيىپ كەلەدى. ولاردىڭ ناقتى سانى بەلگىسىز. كەيبىر قۇقىق قورعاۋشىلار سوڭعى بىرنەشە جىلدا 300-گە تارتا ادامنىڭ سوتتالعانىن ايتادى.

- قدت-نىڭ نەگىزىن قالاۋشى – بۇرىنعى بانكير، وپپوزيتسيالىق ساياساتكەر مۇحتار ءابليازوۆ 2020 جىلى فرانتسيادان ساياسي باسپانا العان.

Abai.kz