سەناتقا كەلگەنىمە تۋرا 10 اي بولىپتى. دەپۋتات رەتىندە اتقارىلعان جۇمىستىڭ قىسقاشا «background» ەسەبىن بەرگىم كەلەدى.

وسى ۋاقىت ىشىندە 119 زاڭ جوباسىن قاراۋعا قاتىستىم. ولاردىڭ ماقساتى - قوعامدى دەموكراتيالاندىرۋ، جەرگىلىكتى ءوزىن-ءوزى باسقارۋدى كۇشەيتۋ، ەكونوميكانى دامىتۋ، پاندەميا جاعدايىندا حالىقتى الەۋمەتتىك قورعاۋ، سىبايلاس جەمقورلىققا قارسى كۇرەستى كۇشەيتۋ، ەكولوگيانى قورعاۋ جانە ت. ب.

وسى زاڭداردىڭ كوپشىلىگى پرەزيدەنتتىڭ تاپسىرماسى بويىنشا جانە تىكەلەي پارلامەنت دەپۋتاتتارىنىڭ ۇسىنىسىمەن (ماجىلىسمەندەر مەن سەناتورلاردىڭ بىرلەسۋىمەن) ازىرلەنگەنىن اتاپ وتكىم كەلەدى.

زاڭدى قابىلداۋ - بۇل جاۋاپتى ءىس جانە مۇندا قاتەلەسۋگە بولمايدى، سەبەبى زاڭ قابىلداۋدا ءبىر وسالدىق بولسا، سوڭى ەلدەگى كۇردەلى پروبلەمالارعا اينالادى.

سوندىقتان زاڭ جوبالارىنىڭ «تازالىعىنا» جاۋاپ بەرەتىن سەناتقا ءار ۋاقىتتا ۇلكەن جاۋاپكەرشىلىك جۇكتەلەدى.

10 اي ىشىندە تولىقتىرۋلار مەن وزگەرىستەر ەنگىزىلگەن 15 زاڭ جوباسى سەناتتان ماجىلىسكە قايتا قاراۋعا جىبەرىلدى. ولاردىڭ ەكەۋىن ناقتىلاۋعا تىكەلەي ءوزىم باستاماشى بولدىم.

مەن ەلىمىزدىڭ ءىرى قالالارىندا سۋ قورعاۋ بەلدەۋلەرىنىڭ كولەمىن قىسقارتۋعا قارسى بولدىم، ويتكەنى بۇل ەلدىڭ سۋ رەسۋرستارىن ساقتاۋدا ەلەۋلى ماسەلەلەرگە اكەپ سوقتىرار ەدى. سونداي-اق، قوعامدا الاڭداۋشىلىق تۋدىرعان ورمان ءوسىرۋ ءۇشىن شەتەلدىكتەرگە جەر ۋچاسكەلەرىن 25 جىلعا جالعا بەرۋ تۋرالى جەر زاڭناماسىنىڭ نورمالارىنا قارسى پىكىر ءبىلدىردىم.

ارينە، ءماجىلىس قابىلداعان جانە ۇكىمەتپەن كەلىسىلگەن زاڭ جوباسىنا قارسى شىعۋ وڭاي ەمەس. ەگەر ءوز ۇسىنىسىڭنىڭ سەبەپ-سالدارىن دالەلدەي الماساڭ، «اق قارعا» اتاناتىنىڭ بەلگىلى عوي. بۇل ءۇشىن، ارينە، سوقىرعا تاياق ۇستاتقانداي ناقتى دالەلدەر قاجەت.

دەپۋتاتتاردىڭ كەلەسى ماڭىزدى ميسسياسى - اتقارۋشى بيلىك جۇمىسىنىڭ تيىمدىلىگىن باقىلاۋ. پارلامەنتتىڭ بىرنەشە وتىرىسى اياسىندا پرەمەر-مينيسترگە جانە ونىڭ ورىنباسارلارىنا، ەسەپ كوميتەتىنىڭ توراعاسىنا 7 دەپۋتاتتىق ساۋال جولداپ، وندا بيلىك تاراپىنان شەشىلمەي وتىرعان اۋىل تۇرعىندارىنىڭ جەكە مالدارىن جايىلىمدارمەن قامتاماسىز ەتۋ بويىنشا، ازىق-تۇلىك باعالارىن تۇراقتاندىرۋ بويىنشا مەملەكەتتىك ورگانداردىڭ جۇمىسىنداعى كەمشىلىكتەر مەن سىبايلاس جەمقورلىق ارەكەتتەرى تۋرالى، اوك-ءنى ستاتيستيكالىق ەسەپتىلىككە تىركەۋ تۋرالى، جوعارى وقۋ ورىندارىن باسقارۋدى دەموكراتيالاندىرۋ قاجەتتىگى جونىندە، ۆەتەرينارياداعى داعدارىس، اگرارلىق عىلىمدى قارجىلاندىرۋداعى ىركىلىستەر، شەتەلدىك تۇقىمداردى سۋبسيديالاۋعا مەملەكەتتىك قاراجاتتىڭ ءتيىمسىز جۇمسالۋىنا قاتىستى سۇراقتاردى كوتەردىم.

بۇل حاتتاردى جازباشا جولداپ قانا قويماي، پرەمەر-ءمينيستردىڭ، پرەمەر-مينيستر ورىنباسارىنىڭ، ءبىلىم جانە عىلىم، اۋىل شارۋاشىلىعى مينيسترلەرىنىڭ جەكە قابىلداۋىندا بولىپ، «تەت-ا-تەت» فورماتتا ولارعا ءوز ۇسىنىستارىمنىڭ ءمانىن ءتۇسىندىرىپ بەردىم.

سونىمەن قاتار، سەنات وتىرىستارىندا، پارلامەنتتىك تىڭداۋلاردا ەاەو، ينفلياتسيا، ازىق-تۇلىك قاۋىپسىزدىگى، سۋ رەسۋرستارىن باسقارۋ، ەكولوگيانى قورعاۋ، عىلىمدى دامىتۋ جانە ت.ب. ماسەلەلەر تۋرالى 11 رەت ءوز ۇستانىمدارىمدى العا تارتىپ، ءسوز سويلەدىم.

كوتەرىلگەن ماسەلەلەرگە نازار اۋدارتۋ ءۇشىن، باستى گازەتتەردە 12 ماقالا جاريالاپ، ەكونوميكا، ءبىلىم بەرۋ، اگرارلىق عىلىم، جەر جانە سۋ رەسۋرستارى مەن مەملەكەتتىك باسقارۋ جۇيەسىنىڭ پروبلەمالارى بويىنشا تەلەارنالارعا 21 رەت سۇحبات بەردىم (بۇلار ۆەب-سايتتاردا، الەۋمەتتىك جەلىلەردە جاريالانعان كوپتەگەن ماتەريالدارىمدى ەسەپتەمەگەندە). وسى مۇمكىندىكتى پايدالانىپ، جۋرناليستەرگە قولداۋ كورسەتكەندەرى ءۇشىن العىس ايتقىم كەلەدى.

ەندى وسى جۇمىستاردىڭ ناتيجەسى تۋرالى ايتىپ وتەيىن. وكىنىشكە وراي، مەنىڭ كوپتەگەن ۇسىنىستارىم «قاعاز كۇيىندە» قالدى، كوپتەگەن دەپۋتاتتىق ساۋالدارىما «ۇيرەنشىكتى سىرعىتپا» جاۋاپتار الدىم. مەن تۇسىنەمىن، ارينە، بيۋدجەتتە پروبلەمالار كوپ، ۋاقىتتى قاجەت ەتەتىن شەشىمدەر دە بار. بىراق، ءتىپتى، دەپۋتاتتار ۇسىنعان زاڭعا تاۋەلدى اكتىلەرگە ء(مينيستردىڭ بۇيرىعىنا) وزگەرىستەر ەنگىزۋ بىرنەشە اي بويى قاجەت ەتىلەدى ەكەن... دامىعان ەلدەردە پارلامەنت دەپۋتاتتارىنىڭ ۇسىنىسىنا وسىنداي سەلقوس كوزقاراستى كورۋ ەكىتالاي شىعار.

​پرەزيدەنت باستاماشىلىق ەتكەن زاڭدارمەن جۇمىس جاساي وتىرىپ، مەن مەملەكەت باسشىسىنىڭ حالىقارالىق تاجىريبەسى مول كوشباسشى رەتىندە مەملەكەتىمىزدى زاڭنامالىق نەگىزدە دامىتۋدىڭ جاڭا مودەلىن قالىپتاستىرۋعا باعىتتاپ كەلە جاتقانىن، قوعامدى دەموكراتيالاندىرۋعا، ەكونوميكانى دامىتۋ بويىنشا جاڭاشا باسىمدىقتاردى كوردىم.

ەندى وسى ستراتەگيانى جۇزەگە اسىرۋ ماڭىزدى. «زاڭ ءالسىز بولسا دا، جاقسى شەنەۋنىكتەرمەن ەلدى باسقارۋعا بولادى، ال شەنەۋنىكتەر ءالسىز بولسا، ەڭ جاقسى زاڭدار دا كومەكتەسپەيدى» دەگەندەي، بىزگە قازىر جۇمىستى ساپالى، جاقسى ورىنداۋشىلار جەتىسپەيدى. ال مۇنداي باسقارۋ جۇيەسىن قالىپتاستىرۋ ءۇشىن، ىقپالدى پارلامەنت پەن ەسەپ بەرەتىن ۇكىمەتتىڭ  بولۋى وتە ماڭىزدى!

اقىلبەك كۇرىشباەۆ،

سەناتتىڭ اگرارلىق ماسەلەلەر، تابيعاتتى
پايدالانۋ جانە اۋىلدىق اۋماقتاردى
دامىتۋ كوميتەتىنىڭ حاتشىسى

Abai.kz