بەلگىلى ءدىنتانۋشى قايرات جولدىبايۇلى «نۇر-مۇباراك» مەشىتىندە بالا زورلاندى» دەگەن اقپاراتقا قاتىستى تۇسىنىكتەمە بەرىپ، مەشىت قىزمەتكەرلەرى تۋرالى تەرىس پىكىر جازباۋعا شاقىردى.

ايتۋىنشا، اتالعان وقيعانىڭ «نۇر-مۇباراك» ۋنيۆەرسيتەتىمەن، مەشىتپەن، جاتاقحانامەن تىكەلەي قاتىسى جوق.

«بۇگىن بەلگىلى ادۆوكات ايمان وماروۆا حانىم «نۇر-مۇباراك» مەشىتىنىڭ قاراۋىلى بالا زورلادى دەگەن كۇدىككە ىلىنگەندىگىنە قاتىستى اقپارات تاراتقان بولاتىن. وسى اقپاراتتان كەيىن الەۋمەتتىك جەلىدە مەشىتتى، مەشىت قىزمەتكەرلەرىن كىنالايتىن ءتۇرلى تەرىس پىكىرلەر تاراپ كەتتى. وسىعان بايلانىستى ءىستىڭ ءمان-جايىن، انىق-قانىعىن اشىپ ايتۋدى ءجون ساناپ وتىرمىن. 

بىرىنشىدەن، بالا زورلادى دەگەن فاكتى ءالى ناقتىلانعان جوق. 

ەكىنشىدەن، بۇل وقيعانىڭ مىنا تۇرعان «نۇر-مۇباراك» ۋنيۆەرسيتەتىمەن، مەشىتپەن، جاتاقحانامەن تىكەلەي قاتىسى جوق ەكەنىن استىن سىزىپ ايتقىم كەلەدى. ويتكەنى اتالعان عيماراتتار 6 گەكتار جەردە ورنالاسقان. وسىنداي ۇلكەن تەرريتوريانى كۇزەتۋ ءۇشىن «نۇر-مۇباراك» ۋنيۆەرسيتەتى «سكيمەن.KZ» اتتى ارنايى ليتسەنزياسى بار، كۇزەت اگەنتتىگىمەن اقىلى نەگىزدە كەلىسىم شارتقا وتىرعان. سوندىقتان وسى بۇكىل تەرريتوريانى كۇزەتۋ ءىسى اتالعان اگەنتتىكتىڭ موينىندا. 

جاڭاعى ايتىلعان وقيعا ورىن العان جاعدايدىڭ وزىندە، جاۋاپكەرشىلىك وسى كومپانيانىڭ قىزمەتكەرلەرىنە تيەسىلى بولادى. جاۋاپكەرشىلىك سولاردىڭ موينىندا. سوندىقتان، بۇل ماسەلەگە قاتىستى مەشىتتىڭ قىزمەتكەرلەرىن كىنالاۋ، ولار جايلى تەرىس پىكىر جازۋ، وسىنداي اقپاراتتاردى تاراتۋ ورىنسىز دەپ سانايمىن»،- دەدى جولدىبايۇلى ۆيدەوۇندەۋىندە.

ايتا كەتەيىك، بۇعان دەيىن زاڭگەر ايمان وماروۆا الماتىداعى نۇر-مۇباراك مەشىتىندە 18 جاستاعى بوزبالانى كۇزەتشى زورلاعانى تۋرالى اقپارات تاراتقان. 

«كۇدىكتى بالانى مەشىتتەگى ءوز بولمەسىنە الىپ كىرگەن دە، اياق-قولىن بايلاپ وتىرعىزىپ قويعان. وسىنداي جاعدايدا ونى ۇزاق ۇستاعان. ازعىندىق كورسەتكەن، زورلاعان، ۇزاق ۋاقىت قورلاعان. مىنە، ەندى وسىنداي ادامدى بوستاندىق اۋداندىق پوليتسيا باسقارماسى بوساتىپ جىبەرمەكشى. دالەل جيناۋ ءۇشىن ۋاقىت كەرەك دەيدى. بىراق، جابىرلەنۋشى ونى بىردەن تانىدى، ودان ارتىق نە دالەل كەرەك ەكەنىن تۇسىنبەيمىن», - دەدى ايمان وماروۆا.

زاڭگەردىڭ ايتۋىنشا، كۇدىكتى بالانىڭ دامۋىندا تەجەۋ بار ەكەنىن ءبىلىپ، سول جاعدايدى پايدالانعان-مىس.

Abai.kz