سەيسەنبى كۇنى كونسۋلدىق ماڭىنا 5 ادام جينالدى. نارازىلىقتىڭ 156-كۇنى ولار قىتايدا قامالعان تۋىستارىنىڭ سۋرەتتەرىن ۇستاپ تۇردى، پەكيننەن ولاردى بوساتۋدى تالاپ ەتتى.

– ءبىز كۇرەستى توقتاتپايمىز. ءبىزدىڭ سويلەۋ ەركىندىگىمىز بار. ءبىز قازاقستان بيلىگىنە قارسى بولىپ تۇرعان جوقپىز. قىتاي تاقىرىبىنا كەلگەندە ەشقاشان توقتامايمىز. جاقىندارىمىزدى ىزدەگەنىمىز وتە زاڭدى. بىزگە وتباسىمىزدى ىزدەگەنىمىز ءۇشىن ايىپپۇل سالسا، سانكتسيا سالسا، ول دۇرىس دەپ ويلامايمىن. ءوز باسىم انام مەن ەكى ءىنىمدى ىزدەپ ءجۇرمىن. ولار كەلمەيىنشە پيكەتتى توقتاتپايمىن، – دەدى نارازىلاردىڭ ءبىرى اقيقات قاليوللا ازاتتىق تىلشىسىنە.

ول فەيسبۋكتاعى پاراقشاسىنىڭ قايتا-قايتا بۇعاتتالىپ جاتقانىنا دا شاعىمداندى.

پوليتسيا ادەتتەگىدەي نارازىلاردى قىتاي كونسۋلدىعىنا جولاتپاي، كونسۋلدىقتان شامامەن 50 مەتر جەرگە تەمىر شارباق قويىپ قويدى.

قىتايدىڭ الماتىداعى كونسۋلدىعى الدىنداعى نارازىلىق اقپان ايىندا باستالعان. نارازىلار قىتاي بيلىگىنەن شىڭجاڭدا "جازىقتان-جازىقسىز" قامالعان جاقىندارىن بوساتۋدى تالاپ ەتەدى. ءالى كۇنگە دەيىن كونسۋلدىقتان نارازىلاردىڭ الدىنا ەشكىم شىققان جوق.

ءساۋىر ايىندا قىتايدىڭ قازاقستانداعى ەلشىسى شىڭجاڭدا قامالعانداردىڭ "قىتاي ازاماتى" ەكەنىن جانە ولاردىڭ "قىتاي زاڭىن بۇزعانىن" ايتقان. قازاقستان سىرتقى ىستەر مينيسترلىگى "وزگە ەلدىڭ ىشكى ىسىنە ارالاسا المايتىنىن" ايتىپ كەلەدى.

بۇعان دەيىن الماتى سوتى قىتاي كونسۋلدىعى الدىندا پيكەت وتكىزگەن ادامداردى بىرنەشە رەت اكىمشىلىك جاۋاپقا تارتقان.

- بۇعان دەيىن حالىقارالىق ۇيىمدار مەن باتىس ەلدەرى پەكيندى شىڭجاڭ ولكەسىندە ۇيعىر، قازاق، قىرعىز جانە وزگە دە مۇسىلمان توپتارعا "گەنوتسيد" جاسادى دەپ ايىپتاعان. پەكين مۇنى جوققا شىعارعان.

Abai.kz