قىزىلوردا وبلىسى ارال اۋدانىندا قۇرعاقشىلىق پەن مال ازىعىنىڭ تاپشىلىعىنا بايلانىستى توتەنشە جاعداي جاريالاندى.

رەسمي اقپاراتتارعا سۇيەنسەك، جاۋىن-شاشىننىڭ ازدىعى مەن سىرداريا وزەنى سۋىنىڭ از بولۋىنان جايىلىمداردىڭ 90 پايىزى جارامسىز بولىپ قالعان. ال ماۋسىم ايىنىڭ باسىندا وڭىردە 500 باس مال ولگەن.

جەرگىلىكتى اكىمدىك توتەنشە جاعداي ەنگىزۋ ءۇشىن ءتيىستى قۇجاتتاردى 1 ايعا جۋىق ۋاقىت دايىنداپتى. اتالعان قۇجات ادىلەت مينيسترلىگىنە تىركەلگەن.

ارال اۋدانىنىڭ اكىمى سەرىك سەرماعانبەتوۆتىڭ ايتۋىنشا، قۋاڭشىلىقپەن كۇرەسۋ ءۇشىن اۋدانعا 2 ملرد تەڭگە كولەمىندە قاراجات كەرەك ەكەن.

«قۇرعاقشىلىقتىڭ سالدارىن جويۋ ءۇشىن 2 ملرد تەڭگە كەرەك. ءبىز «قىزىل ايماققا» ەنگىزگەن 13 اۋداندا 15 سۋ ۇڭعىماسى بۇرعىلاندى. جايىلىمداردى تولىق پايدالانۋ ءۇشىن 8 كانال قازىلىپ، تازالاندى. بۇل جۇمىستاردى ءارى قاراي دا جالعاستىرۋ ءۇشىن تەحنيكا كەرەك»، - دەپتى ارال اۋدانىنىڭ اكىمى.

رەسمي اقپاراتتارعا سۇيەنسەك، الداعى ۋاقىتتا قۋاڭشىلىق ماسەلەسىن جويۋ ءۇشىن سۋ ناسوستارى مەن ارنايى تەحنيكالاردى ساتىپ الۋ، قۇدىقتار قازۋ جانە اۋىلداردى جەم-شوپپەن قامتاماسىز ەتۋ ءۇشىن قولدانىلاتىن تەحنيكالارعا قاجەتتى جانارماي شىعىندارىن وتەۋ جوسپارلانعان.

قازىرگى ۋاقىتتا تاۋلىك بويى مونيتورينگ جاسالىپ وتىر ەكەن. اۋىل-اۋىلداردا شابىندىققا ەرىكتىلەر بريگادالارى تارتىلعان. ولار قازالى، قارماقشى جانە سىرداريا اۋداندارىندا جۇمىس ىستەيدى. اقتوبە وبلىسىمەن دە كەلىسىم جاسالعان. اقتوبەدەگى ىرعىز اۋدانىنىڭ شارۋاشىلىقتارى قولجەتىمدى باعامەن جەم بەرىپ قويماي، جايىلىمدىق جەرلەرىن ءشوپ شابۋ ءۇشىن پايدالانۋعا دا بەرگەن.

ارال اۋدانىنىڭ اكىمى سەرىك سەرماعانبەتوۆتىڭ سوزىنشە، قازىر اۋداندا 205 مىڭ باس مال بار ەكەن.

«شامامەن 185 مىڭ توننا ءشوپ قاجەت. اۋدان ءوز كۇشىمەن 36 مىڭ توننانى قامتاماسىز ەتە الادى. قالعانى وبلىستىڭ باسقا اۋداندارىنان اكەلىنەدى»، - دەپتى اۋدان اكىمى.

تاقىرىپقا تۇزدىق رەتىندە ايتا كەتەيىك، وسىعان دەيىن قر اۋىل شارۋاشىلىعى ءمينيسترى بولعان ساپارحان وماروۆ 3 شىلدەدە ماڭعىستاۋ مەن قىزىلوردا وبلىستارىندا قۋاڭشىلىق سالدارىنان مالدىڭ قىرىلۋى توقتاعانىن، جاعدايدىڭ قالىپقا تۇسە باستاعانىن مالىمدەگەن. ال 10 شىلدەدە پرەزيدەنت قاسىم-جومارت توقاەۆ اۋىل شارۋاشىلىعى ءمينيسترىن وتاستاۆكاعا جىبەرگەن.

«جۇيەلى ءارى ناقتى جۇمىس اتقارىلماعان. سونىڭ كەسىرىنەن شارۋالارىمىز تىعىرىققا تىرەلىپ وتىر. ناقتى ءىس-ارەكەت پەن كەرى بايلانىس جوق. سوندىقتان فەرمەرلەر كومەك سۇراپ، تىكەلەي ماعان ءوتىنىش ايتىپ جاتىر. ارينە، قۋاڭشىلىق – تابيعي جاعداي. مۇنى جاقسى تۇسىنەمىن. دەگەنمەن بۇل ماسەلەنىڭ ءبىر جاعى عانا. ەڭ باستىسى وسىنداي كۇردەلى كەزەڭدە ءتيىستى مينيسترلىك شۇعىل جانە باتىل شەشىمدەر قابىلداۋى قاجەت ەدى»،- دەپ سوككەن ەدى توقاەۆ.

قازىر مينيستر مىندەتىن ونىڭ ورىنباسارى اتقارۋدا.

Abai.kz