ماڭعىستاۋدا قۋاڭشىلىققا بايلانىستى توتەنشە جاعداي جاريالانبايدى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگىدە ماڭعىستاۋ وبلىسى توتەنشە جاعدايلار دەپارتامەنتى باسشىسىنىڭ ورىنباسارى بەكبولات ابدىقادىروۆ ءمالىم ەتتى. 

ونىڭ ايتۋىنشا، تابيعي سيپاتتاعى توتەنشە جاعدايدى جاريالاۋدا بىرقاتار كريتەريگە باسا نازار اۋدارۋ قاجەت.

«قازاقستان رەسپۋبليكاسى توتەنشە جاعدايلار مينيسترلىگىنىڭ 2021 جىلعى 3 ناۋرىزداعى №107 «قازاقستان رەسپۋبليكاسى توتەنشە جاعدايلار مينيسترلىگىندە كەزەكشى قىزمەتتەردىڭ جۇمىسىن ۇيىمداستىرۋدىڭ جانە اقپاراتتىڭ ءوتۋ ءتارتىبىنىڭ كەيبىر ماسەلەلەرى تۋرالى» بۇيرىعى نەگىزىندە مىناداي كريتەريلەرگە سايكەس تابيعي سيپاتتاعى توتەنشە جاعدايدى جاريالاۋعا بولادى. 2.4. تارماق «مەتەورولوگيالىق جانە اگرومەتەورولوگيالىق قاۋىپتى قۇبىلىستار» 2.4.12. تارماقشا «قۇرعاقشىلىق» - وسىمدىكتەردىڭ زاقىمدانۋىن تۋعىزاتىن 20 نەمەسە ودان دا كوپ كۇنگە كۇندىز اۋانىڭ سالىستىرمالى ىلعالدىلىعى 30%، توپىراق قاباتىنىڭ سۋ قورى 35 مم جانە ودان دا كوپكە ساقتالۋى. تابيعي سيپاتتاعى توتەنشە جاعدايلار تۋرالى اقپاراتتىڭ ولشەمشارتتارىنا (2.4.12 تارماقشاسىنا) سايكەس كەلمەگەندىكتەن، ماڭعىستاۋ وبلىسى بويىنشا توتەنشە جاعداي جاريالاۋ ءۇشىن نەگىز بولا المايدى»، - دەدى بەكبولات ابدىقادىروۆ.

ءباسپاسوز كونفەرەنتسياسىنا «قازگيدرومەت» رمك ماڭعىستاۋ وبلىسى بويىنشا فيليالى ديرەكتورىنىڭ ورىنباسارى نۇرلان سارسەنباەۆ تا قاتىستى.

ونىڭ ايتۋىنشا، وڭىردە اۋا جاعدايى كۇندەلىكتى باقىلانادى. باقىلاۋ بەكەتتەرىنىڭ مالىمەتىنە سايكەس، ايماقتا ىلعالدىلىقتىڭ ۇزاق مەرزىمدى جاعدايلارى بولعان جوق.

«وسى كۇنگە دەيىن ماڭعىستاۋ وبلىسىندا اتموسفەرالىق اۋانىڭ 30% -دان تومەن سالىستىرمالى ىلعالدىلىعى 20 كۇن قاتارىنان تىركەلگەن جوق. ءبىزدىڭ قاسىمىزدا كاسپي تەڭىزى ورنالاسقان. ىستىق اۋا رايىندا سۋ بۋلانىپ كەتەدى، سايكەسىنشە اۋا ىلعالدى بولادى»، - دەدى نۇرلان سارسەنباەۆ.

Abai.kz