قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلى كارانتين جاعدايىنداعى قۇربان ايت تۋرالى ءباسپاسوز ءماسليحاتىن وتكىزىپ جاتىر، دەپ حابارلايدى قازاقپارات.

«بارشاڭىزدى كۇللى ءيسى مۇسىلمان بالاسى اسىعا كۇتەتىن ۇلىق مەيرام – قۇربان ايتپەن شىن جۇرەكتەن قۇتتىقتايمىن! ايتتارىڭىز قابىل بولسىن! سىزدەرگە اللادان اماندىق، مىقتى ساۋلىق، مول ىرىس پەن باق-بەرەكە تىلەيمىن!»، - دەدى ناۋرىزباي قاجى تاعانۇلى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

باس ءمۇفتيدىڭ ايتۋىنشا، يسلام دىنىندە زۇلحيججا ايىنىڭ العاشقى 10 كۇنى قاسيەتتى كۇندەر سانالادى. حيجري جىل ساناۋى بويىنشا 1442 جىلدىڭ زۇلحيججا ايى 11 شىلدە كۇنى باستالدى. ال اراپا كۇنى 19 شىلدەگە سايكەس كەلەدى. 20 شىلدە – قۇربان ايت مەرەكەسىنىڭ ءبىرىنشى كۇنى.

«بيىلعى 20 شىلدە كۇنى رەسپۋبليكا اۋماعىندا تاڭعى ساعات 7.00-دە قاتاڭ سانيتارلىق نورما تالاپتارىن ساقتاي وتىرىپ، «سارى»، «جاسىل» ايماقتاردا 10 مينۋتتىق قۇربان ايت نامازى وقىلادى. دەگەنمەن، «قىزىل» ايماقتا قۇربان ايت نامازىن وقۋ جەرگىلىكتى سانيتارلىق مەملەكەتتىك باس دارىگەردىڭ قاۋلىسىنا سايكەس جۇزەگە اسىرىلادى.

وسى ورايدا، قۇربان ايت نامازىن وتكىزۋ بويىنشا قمدب-نىڭ وكىل يمامدارى جەرگىلىكتى باس سانيتارلىق دارىگەرلەرمەن بىرلەسىپ، ارنايى بريفينگتەر وتكىزەتىن بولادى. جاماعاتتان قاۋىپسىزدىك شارالارىن قاتاڭ ساقتاۋدى، ايت نامازى بىتكەن ساتتە مەشىت اۋلاسىندا ۇزاق تۇراقتاماۋدى سۇرايمىز»، - دەيدى باس ءمۇفتي.

Abai.kz