ءومىرىمنىڭ ءبىر بۇلقىنىس ءساتى

بيىل جەلتوقسان كوتەرىلىسىنە 35 جىل تولادى. ءدال سول كۇنى قازاقستان رەسپۋبليكاسىنىڭ تاۋەلسىزدىگىنە 30 جىل بولادى. وسى ەكى اتاۋلى تاريحي وقيعانىڭ اراسىندا ورگانيكالىق بايلانىس بار.

ارينە، مەن «جەلتوقسان كوتەرىلىسى» كسرو سياقتى الىپ مەملەكەتتىڭ (يمپەريالىق سيپاتتاعى) كەرەگەسىن شاشىپ جىبەردى دەمەيمىن.

بىراق، «جەلتوقسان كوتەرىلىسى» ونداعان جىلدار بويى «حالىقتار دوستىعى» دەگەن تاماشا اتپەن جۇرگىزگەن، ال شىن مانىسىندە، كسرو مەملەكەتىنىڭ ۇلىدەرجاۆالىق سيپاتتاعى يدەولوگياسىنىڭ «رۋحاني كەرەگەسىن» قيراتا الدى.

جەلتوقساننان كەيىن-اق، كسرو حالىقتارى «حالىقتار دوستىعى» استارىنان ادىلدىكتى، تەڭدىكتى، ءوزارا قۇرمەتتى، شىنايى دوستىقتى ىزدەي باستادى... ءسويتىپ، ونىڭ ومىردە جوق ەكەنىن كوردى...

كسرو-نىڭ يدەولوگيالىق پلاتفورماسى وسىلاي قيراعان بولاتىن.

...وداقتاس ەلدەردىڭ تاۋەلسىزدىككە ۇمتىلىسى ەسەلەپ ارتا بەردى. ول بەس جىلعا سوزىلدى دا، سوڭىندا ورتالىقتىڭ قاتاڭ باسقارۋ شەڭبەرىنەن شىعىپ كەتتى.

وعان كوكپ-نىڭ «قايتا قۇرۋ»، «جاڭا وداق شارتى»، «اشىقتىق» سياقتى ارەكەتتەرى دە كومەكتەسە المادى.. سوڭى تەك تاۋەلسىزدىكپەن اياقتالۋى ءتيىس ەدى.... سولاي بولدى!

وعان «كىنالى»، ارينە، قازاق حالقىنىڭ ەڭ سوڭعى، ءارى، ناتيجەلى ۇلتتىق-ازاتتىق كوتەرىلىسى - جەلتوقسان كوتەرىلىسى!

الماتىداعى مۇز الاڭداعى ون مىڭداعان نامىسشىل قازاقتىڭ اراسىندا كوتەرىلىسشىلەردىڭ «قاراسىن كوبەيتىپ، قارايىپ جۇرگەنىم» - مەن ءۇشىن ءومىرىمنىڭ ەشقاشان دا قايتالانباس بۇلقىنىس ءساتى بوپ قالا بەرەدى...

ءابدىراشيت باكىرۇلى

Abai.kz