سودىرلار جەتەكشىسى ابدۋل عاني بارادار باستاعان "تاليبان" دەلەگاتسياسى پەكيندە قىتايدىڭ رەسمي تۇلعالارىمەن كەلىسسءوز ءوتكىزدى.

"كەزدەسۋ بارىسىندا ساياسات، ەكونوميكا مەن ەكى ەلدىڭ قاۋىپسىزدىگىنە بايلانىستى ماسەلەلەر، اۋعانستانداعى جاعداي مەن بەيبىت پروتسەسس تالقىلاندى" دەپ جازدى 28 شىلدەدە Twitter-دە "تاليباننىڭ" رەسمي وكىلى مۇحاممەد نايم.

تالىپتەر اۋعانستاننىڭ قىتايمەن شەكتەسەتىن جاڭا اۋداندارىنا شابۋىلىن ۇدەتكەن شاقتا كەلىسسوز ءوتىپ وتىر. اقش باستاعان حالىقارالىق كواليتسيا كۇشتەرى اۋعانستاننان كەتىپ جاتقان تۇستا "تاليبان" بەلسەندىلىگى كۇشەيگەن.

سودىرلار شەكاراعا جاقىن اۋماقتاردى بىرىنەن سوڭ ءبىرىن باقىلاۋعا الىپ جاتىر. ال شىلدە ورتاسىندا كاتاردا اۋعان ۇكىمەتى مەن تالىپتەر اراسىنداعى بەيبىت كەلىسسوزدەن ەش ناتيجە شىقپادى.

قىتاي ءسىم تاراتقان اقپاراتقا قاراعاندا، قىتاي سىرتقى ىستەر ءمينيسترى ۆان ي تالىپتەرگە پەكين اۋعانستاننىڭ تەرريتوريالىق تۇتاستىعىن قۇرمەتتەيدى دەپ ايتقان.

ءنايمنىڭ سوزىنشە، "تاليبان" دەلەگاتسياسى قىتايعا اۋعانستاندا وزگە ەلدىڭ قاۋىپسىزدىگىنە قاۋىپ توندىرەتىن توپتاردىڭ شوعىرلانۋىنا جول بەرمەۋگە ۋادە بەرگەن.

Abai.kz