قر پرەمەر-ءمينيسترى اسقار مامين اقتوبە وبلىسىندا وتكەن ەكى كۇندىك جۇمىس ساپارى بارىسىندا ءوڭىر حالقىنا ءبىر اۋىز ءسوز ايتۋعا جارامادى. بۇل تۋرالى Arasha.kz جازدى.

قوس ءمينيستردى ەرتىپ كەلگەن ۇكىمەت وكىلدەرىنە اقتوبەلىكتەردىڭ دە كورسەتەر ەشتەڭەسى بولعان جوق. مامين وڭىرگە ەكى جىل بۇرىنعى ساپارىندا باس سۇققان جەرلەردى قايتا ارالادى.

اكىمدىكتىڭ ءباسپاسوز قىزمەتى تاراتقان رەسمي اقپاراتتا «21-22 شىلدەدە قر پرەمەر-ءمينيسترى ا. مامين اقتوبە وبلىسىنا جۇمىس ساپارىمەن بارىپ، ونىڭ بارىسىندا ءوڭىردىڭ الەۋمەتتىك-ەكونوميكالىق دامۋىمەن تانىستى» دەلىنگەن.

ۇكىمەت باسشىسى قۋاتى – جىلىنا 5 ملن م² كەراموگرانيت پەن كەراميكالىق پليتكا دايىنداۋ مۇمكىندىگى بار «اقتوبە» يندۋستريالىق ايماعىندا ورنالاسقان «زەردە-كەراميكا اقتوبە» جشس ارالاپ، ءونىمىن رەسەي، وزبەكستان، تاجىكستان جانە قىرعىزستانعا ەكسپورتتاپ وتىرعان «اقتوبەرەنتگەن» اق زاۋىتىنىڭ جۇمىسىمەن تانىستى.

مامين بيىلعى ساپارىندا «پو گلوبال-سپەتسودەجدا» جشس تىگىن فابريكاسىنا تاعى باردى. ۇكىمەت باسشىسى ەكى جىل بۇرىن دا تىگىن تسەحىنىڭ جۇمىسىمەن تانىسىپ، كۇرتە ساتىپ العان بولاتىن. بەينە ءبىر اقتوبەلىكتەردىڭ كورسەتەر ەشتەڭەسى قالماعانداي.

سونىمەن قاتار، اسقار مامين «اقتوبە – اتىراۋ – استراحان» رەسپۋبليكالىق اۆتوجولىن رەكونسترۋكتسيالاۋ بارىسىن تەكسەردى. بيىل «اقتوبە – قاندىاعاش» ۋچاسكەسىندە جول قوزعالىسى اشىلادى، «قاندىاعاش – ماقات» اۆتوجولىنىڭ ۋچاسكەسى وسى جىلدىڭ سوڭىنا دەيىن پايدالانۋعا بەرىلەدى. پرەمەر-مينيستر تاس جولدى قايتا جاڭارتۋ جۇمىستارىن ساپالى ءارى بەلگىلەنگەن مەرزىمدە اياقتاۋدى تاپسىردى. جانە مارتوك اۋدانىندا اسقار مامين «مilker» جشس جەم-ءشوپ تۇيىرشىكتەرىن ءوندىرۋ زاۋىتىن ارالادى، دەلىنگەن رەسمي مالىمەتتە.

P.S. رەسمي اقپاراتتا ۇكىمەت باسشىسىنىڭ ءبىر اۋىز ءسوزى جوق. مامين اقتوبەنى ەكى كۇن ارالاعاندا ۇندەمەي جۇرگەندەي. ۇكىمەت وكىلدەرىنىڭ وڭىرگە ساپارىمەن تانىسۋعا باق وكىلدەرى دە جىبەرىلگەن جوق. ايماق تىلشىلەرىنىڭ ساۋالىنان قورققان ۇكىمەت باسشىسى ءۇنسىز «قاشتى».
قازىرگى كۇنى اقتوبەنىڭ كەيبىر اۋداندارىندا جەم-ءشوپ جاعدايى ءماز ەمەس. رەسپۋبليكا بويىنشا قۋاڭشىلىقتىڭ الدىندا تۇرعان ەلدىمەكەندەر بار. وسىعان دەيىن اقتوبەلىك فەرمەرلەر پرەزيدەنتتەن اراشا سۇراپ، بىرنەشە رەت سۋبسيديا ماسەلەسىن كوتەردى. توقاەۆ ءۇمىت ارتقان ۇكىمەت باسشىسى ماڭڭىستاۋداعى ساپارىندا قۋاڭشىلىق زاردابىن تارتقان شارۋالارمەن كەزدەسپەگەندەي، اقتوبەلىك فەرمەرلەردىڭ جانايقايىن تىڭداماي كەتتى.

Abai.kz