قازىرگى مىناۋ، اۋرۋ-سىرقاۋدىڭ مولايىپ كەتكەن زامانىندا دارىگەرلەرگە دەگەن زارۋلىكتىڭ ءالى دە جويىلماي وتىرعاندىعىن جوققا شىعارۋعا بولماس. ايماق باسشىلارى: «بۇل باعىتتا ءبىز ءبارىن دە قاتىرىپ جاتىرمىز»، - دەپ جوعارى جاققا جاعىمدى اقپارات بەرۋدەن  جالىقپايدى. الايدا كوپ جەرلەردە سول «باياعى جارتاس ءبىر جارتاس» كۇيىندە قالىپ وتىرعاندىعىن جاسىرۋدىڭ ءوزى قيىن.

وسى ورايدا، ءبىزدىڭ قوستاناي وبلىسىنىڭ دا ماقتاناتىن ءجونى جوق. قايتا كەرىسىنشە، حالىقتى دارىگەرلەرمەن قامتۋدا ءبىزدىڭ وبلىس كوش سوڭىندا جۇرگەندەردىڭ قاتارىندا. وزگەسىن بىلاي قويعاندا، وبلىس ورتالىعىندا بۋىن-بۋىندارى سىرقىرايتىن جانداردىڭ ەشبىر جەردەن ەم الۋعا مۇكىندىگى جوق. قالالىق ەمحانانىڭ شتاتىندا رەۆموتولوگ دەگەن دارىگەر مۇلدەم قاراستىرىلماعان. ال وبلىستىق اۋرۋحاناداعى وسىنداي جالعىز دارىگەر تۇسكە دەيىن ىستەيدى دە، تۇستەن اۋا اقىلى ەمحانالارعا تابىس تابۋعا اسىعادى. مۇنداي سوراقىلىقتى كورىپ وتىرعان وبلىستىق دەنساۋلىق ساقتاۋ باسقارماسىنداعىلاردىڭ مەملەكەتتىك اۋرۋحانادا ىستەيتىن دارىگەرلەردىڭ اۋدان، قالالاردان كەلەتىن سىرقاتتاردى كوزگە ىلمەي، جارتى كۇنىن اقىلى ەمحانالاردا وتكىزۋى سەكىلدى «ەركەلىكتەرىنە» قالاي جول بەرىپ وتىرعاندىعىن ءتۇسىنۋ قيىن. ەگەر مەملەكەتتىك مەكەمەدەن ايلىق الاتىن وسىنداي دارىگەرلەردىڭ بارلىعى دا پاتسيەنتتەردى ەمدەۋدى ەمەس، قاشان اقىلى جەرلەرگە بارىپ، تابىسقا كەنەلەتىندىگىن ويلاپ وتىرسا، قاراپايىم حالىقتىڭ جاعدايى نە بولماق؟ وبلىس دەڭگەيىندە مۇنى ويلاپ وتىرعان جانداردى كەزدەستىرمەدىك.

ال ەندى قالالىق جەرلەردە جاعداي وسىنداي بولسا، اۋىلدىڭ كۇيى ءتىپتى دە ادام ايارلىق. ءبىر عانا فاكتى. وسىدان تۇپ-تۋرا ءتورت جىل بۇرىن فتيزياتر-دارىگەر سەرعازى بەردىحانوۆ ۇكىمەتتىڭ ايتقانىنا سەنىپ، سونداي-اق، ءوزىنىڭ ازاماتتىق پارىزىن وتەمەك بولىپ، دارىگەر ايەلى ەكەۋى «ديپلوممەن - اۋىلعا» باعدارلاماسى بويىنشا، جىراقتاعى بەيىمبەت مايلين اتىنداعى اۋدانعا ات باسىن تىرەگەن. الايدا، وسى ۋاقىت ىشىندە ءۇمىتى جەلگە ۇشقانداي بولدى. بەينە ءبىر وزگە دەنى دۇرىس باسپانا تابىلماعانداي، بۇل ەكەۋىنە توبەسى تەسىك، قابىرعالارى قۇلاعالى تۇرعان ءۇيدى ۇسىنعان. سودان بەرى بۇل ەكەۋى ەسكى ۇيگە جوندەۋ جۇمىستارىن جۇرگىزۋمەن الەك. جاۋىن جاۋسا توبەدەن سۋ اعادى، جاپسىرما قاعازدار قابىرعادان اجىراپ كەتەدى...

- ءبىز وسىندا مەديتسينالىق كومەك كورسەتۋ ءۇشىن ارنايى باعادارمامەن كەلىپ ەدىك. كوپتەن بەرى جۇمىس ىستەيمىز، پاتسيەنتتەرىمىز دە ريزا. الايدا مۇندا الاڭسىز ەڭبەك ەتۋگە ەشبىر جاعداي جوق. ال ەندى مۇنى كورگەن جاس ماماندار اۋىلعا قايدان كەلسىن - دەيدى  دارىگەر سەرعازى بەردىحانوۆ.

وبالى نە، وسىنداعى اۋرۋحانانىڭ باس دارىگەرى بەكبولات ۋاليەۆ قولىنان كەلگەنىن ىستەۋگە ۋادە بەرىپ وتىر. الايدا ونىڭ دا قولى قىسقا. اۋرۋحانانىڭ بيۋدجەتىندە ۇيلەردى كۇردەلى جوندەۋگە دەلىنگەن قاراجات جوق. سويتسە دە، ول جاس دارىگەردى دالادا قالدىرماۋعا بەكىنىپ وتىر.

ال ەندى اۋداندىق اكىمدىك بولسا، «بىزگە ەشقانداي ارىز-شاعىم تۇسكەن ەمەس. جالپى، كۇردەلى جوندەۋدى سول ءۇيدىڭ تۇرعىندارىنىڭ وزدەرى شەشەدى»، - دەپ بۇل پروبلەمادان باسىن الىپ قاشىپ وتىر.

جايبەرگەن بولاتوۆ

Abai.kz