توكيو وليمپياداسىنداعى ساتسىزدىكتەن كەيىن الەۋمەتتىك جەلىدەگى كوپشىلىك سپورت سالاسىن باسقاراتىن تۇلعا ىزدەپ كەتتى. بىرەۋلەر داۋلەت تۇرلىحانوۆتىڭ، بىرەۋلەر سەرىك ساپيەۆتىڭ، ەندى بىرەۋلەر ەرماحان يبرايموۆتىڭ اتىن اتاپ، سپورت باسشىلىعىنىڭ تورىنە وزدىرىپ جاتىر. ال مەن "ەگەر امان-ەسەن ورتامىزدا بولعاندا، سپورت سالاسىنىڭ ەكى تىزگىن ءبىر شىلبىرىن قولىنا ۇستايتىن تۇلعا - تالعات اتاباەۆ بولار ەدى" دەيمىن. تالعات مارقۇم جۇرەكتى، باتىل، ءارى قارا قىلدى قاق جارعان ءادىل جىگىت ەدى. تۇيتكىلدى ماسەلەلەردىڭ دە ءتۇيىنىن تەز تارقاتىپ، تىعىرىقتان جول تاباتىن. سونىڭ ءبىر مىسالى نۇربول داۋتباەۆ جازعان مىنا ءبىر شاعىن ەستەلىكتە جاقسى كورىنىس تاپقان. 

- ءيا، تالعات اتاباەۆ تۋرالى ءبىر ەستەلىك جازايىن. بۇل ەستەلىكتى مەن قازاقتىڭ بەلگىلى ەركىن كۇرەس پالۋانى مالىك نادىربەكوۆتىڭ اۋزىنان ەستىدىم.
بۇل وقيعا اتلانتا وليمپياداسىنىڭ الدىندا بولعان بولۋى كەرەك. سونىمەن ەركىن كۇرەستەن قازاقستان قۇراماسى وقۋ-جاتتىعۋ جيىنىن سوچي قالاسىنىڭ ماڭىندا وتكىزۋگە سول شاھارعا كەلەدى. ۇيىمداستىرۋشى جاڭادان عانا «اعا» («ستارشي برات») دەگەن اتاعىنان ايىرىلىپ، ىشتەي ۇلىپ جۇرگەن رەسەي تاراپى ەكەن. ءبىزدىڭ قۇرامانىڭ جىگىتتەرى كەلىسىلگەن شاھارعا كەلە سالىپ ۇيىمداستىرۋشىلارعا جولىعىپ، تۇراتىن جەرىن، جاتتىعۋ جاسايتىن ورنىن بىلگەندە كوڭىلدەرى قۇلازىپ شىعا كەلەدى. سەبەبى بەرگەن جايلارى ورتالىقتان الىس، جول قاتىناسى دا ءبىراز ۋاقىتتى الادى ەكەن. ەڭ سوراقىسى – بەرگەن قوناق ۇيلەرى وتە لاس، اننان قاشقان، مىننان قاشقاندار توقتايتىن ورىن بولىپ شىعادى.

ارينە، سول كەزدەگى قازاقستان قۇراماسىنىڭ باس جاتتىقتىرۋشىسى مالىك نادىربەكوۆ الماتىعا تەلەفون شالىپ، سپورت شەنەۋنىكتەرىن، مينيسترلىكتى (ول كەزدە رەسمي ورتالىق ءالى ارقاعا كوشپەگەن كەز) مازالاپ، جاعدايدى بايانداپ، دۇرىستاۋ ورىن الىپ بەرۋدى ايتىپ كومەك سۇرايدى.

ال ءبىزدىڭ شوپكەتىشارلار بولسا، ورىستارعا ءسوزى جۇرمەيتىندەرىن ايتىپ ات توندارىن الا قاشادى. جىگىتتەردىڭ وليمپيادا الدىندا كوڭىل كۇيلەرى جابىرقاپ تۇرعانىنا جانى اۋىرعان ماكەڭ ءوزىنىڭ شاكىرتى تالعات اتاباەۆقا حابارلاسىپ ءمان-جايدى تۇسىندىرەدى .

(وسى تۇستا تالعات اتاباەۆ ءالى كۇرەس فەدەراتسياسىنىڭ باسشىلىعىنا كەلمەگەن، ءجاي قاتارداعى، ارينە بەدەلدى قازاق قانا ەدى).

اڭگىمەنىڭ توركىنىن تەز باعامداعان تالعات: «الاڭداماڭدار، مەن موسكۆاعا حابارلاسىپ جاعدايدى تۇسىندىرەمىن. ءبىر حابارىن بەرەدى»، – دەپ باسۋ ايتادى.
ەكى ساعات وتپەي جاتىپ ءبىزدىڭ قۇرامانىڭ جىگىتەرى امالسىزدان ورىن تەپكەن جامان قوناقۇيدىڭ الدىنا ۇلكەن اۆتوبۋس كەلىپ توقتاپ، ىشىنەن ءبىر زور ورىس شىعىپ: «كازاحي، پوەحالي ۆ لۋچشۋيۋ گوستينيتسۋ گورودا سوچي. بۋدەتە جيت س نامي ي ترەنيروۆاتسيا بۋدەتە توجە س نامي دو كونتسا سبورا»، – دەيدى.

– ال سوندا بۇل ماسەلەنى كىم شەشتى؟ قالاي تەز بولدى؟ – دەپ سۇراعانىمىزدا الگى ورىستىڭ الىبى:
– يز الماتى كاكوي-تو كرۋتوي پارەن زۆونيل پريامو ميحايلۋ مامياشۆيلي ي ون پريكازال نەمەدلەننو رەشيت پروبلەمۋ ي دولوجيت. ۆوت مى ي بەگاەم!» – دەگەن ەكەن.

ال «ميحايل مامياشۆيلي كىم؟» دەگەندەرگە جاۋاپ:
ول – رەسەي عانا ەمەس، الەم كۇرەسىندە بەدەلدى ادام. وليمپيادانىڭ، بۇرىنعى وداق كولەمىنىڭ، ەۋروپانىڭ، الەمنىڭ چەمپيونى.
ورىستاردىڭ بىردە ءبىر پالۋانى ول كىسىنىڭ رۇقساتىنسىز قيمىلداي المايدى. ءتىپتى ورەكەڭدەردىڭ كريمينالدى قۇرىلىمدارىنىڭ سەرەكەلەرى دە بۇل كىسىمەن ساناسادى.

مىنە، ءوز زامانىنان ەرتە تۋىپ، ماڭدايىمىزعا سيماي كەتكەن الىپ تۋرالى  ءبىر مولتەك سىر...

نۇربول داۋتباەۆ

Abai.kz