اۋعانستان اۋداندارىنىڭ باسىم بولىگىن جاۋلاپ العان «تاليبان» كابۋلگە كىرگەن تۇستا الەۋمەتتىك جەلىلەردە اۋعان بوسقىندارىنىڭ ءبىر بولىگى قازاقستانعا كەلەدى دەگەن اقپارات تارادى. وندا قازاقستاننىڭ بوسقىندارعا ارناپ ورىن دايىنداپ جاتقانى ايتىلادى. شىمكەنتتەگى ءابىلحان قاستەەۆ اتىنداعى كوللەدجدىڭ جاتاقحانا قىزمەتكەرى ازاتتىق تىلشىسىنە سونداي تاپسىرما تۇسكەنىن راستادى. بۇل تۋرالى kznews.kzكە سىلتەمە جاساپ Abai.kz حابارلايدى. 

– اۋعانستاننان كەلەتىن ادامدارعا ارناپ 305 ورىن دايىنداۋ تۋرالى تاپسىرمادان كەيىن كەشەدەن بەرى 100 ورىن دايىندالدى، – دەدى اتى-ءجونىن اتاماۋدى سۇراعان جاتاقحانا قىزمەتكەرى.

جاتاقحانا قالانىڭ ورتالىق بولىگىندە، ەڭبەكشى اۋدانىندا ورنالاسقان.

شىمكەنت قالاسىنىڭ اكىمدى اۋعان بوسقىندارى جايلى اقپارات بەرە المايتىنىن، ونى نۇر-سۇلتانداعى ورتالىق بيلىكتەن سۇراۋ قاجەتىن ايتتى.

جەكسەنبى، 15 تامىز كۇنى قازاقستان سىرتقى ىستەر مينيسترلىگى بوسقىنداردى قابىلداۋ تۋرالى اقپاراتتى تەرىستەگەن. بۇگىن، 16 تامىز كۇنى مينيسترلىك بوسقىن قابىلداۋ تۋرالى اقپاراتتى راستامادى، جوققا دا شىعارمادى.

– شىمكەنت قالاسىنا اۋعان بوسقىندارى كەلەتىنى، يا كەلمەيتىنى جايلى ازىرگە ايتا المايمىن. جاعداي شاپشاڭ وزگەرىپ جاتىر، – دەدى قازاقستان سىرتقى ىستەر مينيسترلىگىنىڭ ارنايى وكىلى ايبەك سمادياروۆ.

جەكسەنبى، 15 تامىز كۇنى «تاليبان» جالالاباد قالاسىن باسىپ العاننان كەيىن كابۋلدىڭ تۇبىنە جەتىپ، ەل پرەزيدەنتى اشراف عاني شەتەلگە قاشقان سوڭ، قالانىڭ ىشىنە كىردى. تالىپتەر استانا اۋداندارىنىڭ باسىم بولىگىن باقىلاۋىنا العانىن ايتادى. ەلدەگى ديپلوماتيالىق وكىلدىكتەر مەن ولارعا قىزمەت ەتكەن اۋعاندار كابۋلدىڭ حالىقارالىق اۋەجايىندا تىعىلىپ وتىر.

اقش ءوز قىزمەتكەرلەرىن ەلدەن الىپ كەتۋگە مىڭداعان ساربازىن جۇمساپ وتىر. ولار اۋەجايدى قورعاپ، ەۆاكۋتسيا رەيستەرىنىڭ قاۋىپسىزدىگىن قامتاماسىز ەتپەك.

2001 جىلعى 11 قىركۇيەكتەگى تەررور شابۋىلىنان كەيىن اقش اۋعانستانعا باسىپ كىرىپ، «تاليباندى» بيلىكتەن كەتىرگەن. اقش اسكەرى بيىل مامىردان باستاپ ەلدەن شىعارىلا باستادى. سودان بەرى «تاليبان» بەلسەندىلىگىن ارتتىرىپ، اۋعان اۋداندارى مەن قالالارىن بىرىنەن كەيىن ءبىرىن باسىپ الىپ جاتتى.

Abai.kz