بۇل مەملەكەتتى تاريحتا ءالى ەشبىر الپاۋىت ەل سىرتتان جاۋلاپ الا الماعان. ءالى ەشكىم ءوز ىرقىنا ءباسىبۇتىن كوندىرە دە الماعان. جاھاننىڭ جۇدىرىعى جۋان ەلدەردىڭ كوزقۇرتىنا اينالعان اۋعان ەلىنەن تاعى دا مازا كەتتى. ء"تالىبان" راديكال قوزعالىسىنىڭ اسكەرلەرى اۋرەلەڭ ەلدى ءباسىبۇتىن دەرلىك ءوز بيلىگىنە الدى.

2009 جىلى، ياكي وسىدان 12 جىل بۇرىن اۋعانستاننىڭ ەڭ قاۋىپسىز قالاسى سانالىپ كەلگەن حەرات قالاسىندا سىرتقى ىستەر مينيسترلەرىنىڭ كەزدەسۋى ءوتىپ ەدى. قازاقستان اتىنان سول كەزدەگى سىرتقى ىستەر ءمينيسترىنىڭ ورىنباسارى نۇرلان ەرمەكباەۆپەن بىرگە ءبىر اپتاعا جۋىق ءىسساپاردا بولىپ ەك سوندا. سول تۇستا قازاقستاننان كەلگەن ۇكىمەتتىك دەلەگاتسيا قۇرامىندا بولعان ءبىزدىڭ ارقايسىمىزدى ءدال وسىنداي اۋعان پوليتسياسى قىزمەتكەرلەرى ەرەكشە كۇزەتىپ ەدى. قاسىمىزدان ءبىر ەلى قالمايتىن سابازدار. ءوزىمىزدى راسىندا دا قاۋىپسىز سەزىندىك.

قازىر ەلدىڭ سولتۇستىك-باتىسىندا ورىن تەپكەن 600 مىڭداي تۇرعىنى بار حەرات قالاسى دا ء"تالىبان" قوزعالىسى كۇشتەرىنىڭ تولىقتاي ىقپالىنا ءوتتى. ەلدىڭ ەڭ قاۋىپسىز مەكەنى بولعان قالا دا بۇگىندە بولاشاعى بەلگىسىز مازاڭ كۇيدە. ۇڭعىسىنان ءتۇتىنى سەيىلمەگەن اۋعان جۇرتىندا تىنىشتىقتىڭ ورناۋى ەمەس، ازىرگە راديكال توپتاردىڭ ارىنىن باسۋ باستى ماسەلە تولعاقتى بوپ تۇر. قازاقستان پرەزيدەنتى قاسىم-جومارت توقاەۆتىڭ وسى رەتتە ۇكىمەت مۇشەلەرىن، ءتيىستى ۆەدومستۆو باسشىلارىن جيناپ شۇعىل جيىن وتكىزۋى دە دەر ۋاعىندا. اۋعانداعى جاعداي ۋشىعا بەرسە ورتالىق ازيا ەلدەرىنە اسەرى قانداي بولماق؟ قازىر ورتالىق ازيا ەلدەرى مەملەكەتتەرى مەن جاھاندىق قاۋىمداستىق ەلدەرىنىڭ باسىن قاتىرعان ماسەلە وسى.

اۋەسبايدىڭ قاناتى

Abai.kz