قر قارجى ءمينيسترى ەرۇلان جاماۋباەۆ 2022 جىلعى رەسپۋبليكالىق بيۋدجەتتىڭ شىعىستارى تۋرالى ايتتى. ونىڭ ايتۋىنشا، 2022 جىلى رەسپۋبليكالىق بيۋدجەتتىڭ كىرىسى 9,2 ترلن تەڭگەنى، 2023 جىلى - 9,7 ترلن تەڭگەنى، 2024 جىلى - 10,4 ترلن تەڭگەنى قۇرايدى.

2022 جىلى 3,9%-عا دەيىن ەكونوميكالىق ءوسىمدى قامتاماسىز ەتۋ جوسپارلانۋدا. نومينالدى ءجىو 2022 جىلى 87,1 ترلن تەڭگەدەن 2026 جىلى 119,9 ترلن تەڭگەگە دەيىن وسەدى.

بيۋدجەت تاپشىلىعى 2022 جىلى ءجىو -ءنىڭ 3,3%-ىنان 2024 جىلى ءجىو-ءنىڭ 2,5%-ىنا دەيىن كەزەڭ-كەزەڭمەن تومەندەتۋمەن جوسپارلانعان. سونىمەن بىرگە، كورسەتىلگەن كەزەڭدەگى شيكىزاتتىق ەمەس تاپشىلىق ءجىو-گە 8,1%-دان 6,3%-عا دەيىن تومەندەيدى.

ماسەلەن، 2022 جىلى بيۋدجەت شىعىستارى اعىمداعى جىلدىڭ جوسپارىنان 577 ميلليارد تەڭگەگە ارتىپ، 15,9 تريلليون تەڭگەنى قۇرايدى.

"ەكونوميكانىڭ ناقتى سەكتورىنىڭ دامۋىن قولداۋ ءۇشىن 2022 جىلعا شامامەن 2 ترلن تەڭگە قاراستىرىلعان. وسى قاراجات اياسىندا "نۇرلى جول", "نۇرلى جەر",  "بيزنەستىڭ جول كارتاسى - 2025" مەملەكەتتىك باعدارلامالارىن ىسكە اسىرۋ، اگروونەركاسىپتىك كەشەندى دامىتۋ، جالعاسادى", - دەپ قوستى جاماۋباەۆ.

بيۋدجەت شىعىستارىنىڭ نەگىزگى باعىتتارى ەكونوميكانىڭ ناقتى سەكتورىنىڭ، كاسىپكەرلىكتىڭ، الەۋمەتتىك ينفراقۇرىلىمنىڭ، ونىڭ ىشىندە دەنساۋلىق ساقتاۋ مەن ءبىلىم بەرۋ جۇيەسىنىڭ، مادەنيەت پەن سپورتتىڭ، سونداي-اق قاۋىپسىزدىك پەن قۇقىق ءتارتىبىنىڭ جوعارى ساپالى جانە تۇراقتى دامۋىن قامتاماسىز ەتۋ بولماق. بۇل تۋرالى ءمينيستردىڭ ءباسپاسوز قىزمەتى حابارلادى.

Abai.kz