وسى ۇكىمەتتىڭ ءۇيى جوق ادامداردان پروپيسكا سۇرايتىنىنا تاڭىم بار. ءۇيى جوق ادامدا قايداعى پروپيسكا؟ لوگيكاعا سىيىمسىز. ونسىز دا كۇيزەلىپ، ءۇيسىز جۇرگەن ادامدار تانىس-تۋىس، دوس-جاران، كورشى-كولەڭگە جالىنىپ جۇرەدى «پروپيسكاعا وتىرعىزشى» - دەپ. سوۆەت زامانىندا قالادا پروپيسكاڭ جوق بولسا ءۇيدىڭ كەزەگىنە دە تۇرا المايتىنسىڭ، ءتىپتى ءوز اقشاڭا ءۇي دە ساتىپ الا المايتىنسىڭ، جۇمىسقا دا تۇرا المايتىنسىڭ، تاعى باسقا دا قيىنشىلىقتارى بولاتىن. سول قاعيدانى ءالى بۇزباي ۇستاپ وتىرعان سياقتى. ۇكىمەت ءۇي-كۇيى جوق ادامنان پروپيسكا تالاپ ەتەدى ەكەن، ولاردىڭ ءبىر جەردە تىركەلىپ، وكىمەتتىڭ قاداعالاۋىندا بولعانىن قالايدى ەكەن، وندا وزدەرى شەشسىن ول ماسەلەنى، ولارعا پروپيسكاعا وتىراتىن ورتالىقتاندىرىلعان ءبىر جەر تاۋىپ بەرسىن، «پالەن ۋاقىتتا ءبىر كەلىپ وسى جەرگە بەلگىلەنىپ، كورىنىپ تۇر» دەي مە، ايتەۋىر ءبىر ەرەجە شىعارسىن. ەلدى اۋرە-سارساڭعا سالماسىن «پروپيسكاڭ قايدا؟» - دەپ.

ليازات دۋيسەمبەكوۆا

Abai.kz