كەنەسارى حاننىڭ باس سۇيەگى تابىلدى. بۇل تۋرالى Orda.kz-كە سىلتەمە جاساي وتىرىپ، Abai.kz حابارلايدى. 

كەنەسارى حاننىڭ باس سۇيەگى ومبىداعى مۇراجايلاردىڭ بىرىنەن تابىلعان. با سۇيەكتىڭ شىنايىلىعى ەكسپوناتتارعا اشىلاتىن ارنايى پاسپورت ارقىلى دالەلدەنگەن. ەكسپونات پاسپورتىندا جادىگەر قايدان الىنعانى، كىمگە تيەسىلى بولعانى، سىرتقى كورىنىسى مەن كولەمى جازىلادى. سونىمەن بىرگە ءبىر عانا قۇجات جەتكىلىكسىز، سوندىقتان ارنايى گەنەتيكالىق ەكسپەرتيزا جۇرگىزىلەتىن بولادى. ەگەر ەكسپەرتيزا ناتيجەسى وڭ بولسا، وندا باس سۇيەكتىڭ تابىلعانى جايلى رەسمي جاريالانۋى مۇمكىن. كەلەر جىلى كەنەسارىنىڭ 220 جىلدىعى، سوندىقتان ول ارنايى داتاعا دا جاڭالىقتى ساقتاپ وتىرۋى مۇمكىن.

كەنەسارى حاننىڭ باس سۇيەىن ىزدەۋ تاۋەلسىزدىك العان كۇننەن باستاپ جالعاسىپ كەلەدى. العاشقى جىلدارى باس سۇيەكتى پەتەربۋرگ قالاسىنان ىزدەدى، سەبەبى رەسەيدەگى رەۆوليۋتسيا كەزىندە ومبى قالاسىنداعى بارلىق جادىگەرلەر سوندا كوشىرىلگەن دەگەن اقپارات ايتىلعان ەدى. الايدا كوپتەگەن جادىگەردىڭ ومبىدا قالىپ قويعانى كەيىن بەلگىلى بولدى.

كوكتەمدە حان كەنەنىڭ باسىنا قاتىستى تاعى ءبىر اقپارات شىعىپ، ەل شۋلاعان بولاتىن. تاريح جانە ەتنولوگيا ينستيتۋتىنىڭ ديرەكتورى، تاريح عىلىمدارىنىڭ دوكتورى زيابەك قابىلدينوۆ سۇيىنشىلەپ، اقپارات تاراتقانى ەسىمىزدە.

«ءسۇيىنشى! كەنەسارى حاننىڭ باس سۇيەگى تابىلدى. مەنى ۇلى حاننىڭ باس سۇيەگىن ەلگە قايتارۋ تۋرالى ەكسپەرتتىك كوميسسيا قۇرامىنا قوستى.

بۇگىن ءبىزدىڭ ۇلتتىق تاريحىمىزدىڭ جاڭا كەزەڭى باستالادى. بۇگىن ءبىزدىڭ قازاقستان مەن رەسەي اراسىنداعى ارىپتەستىك (دوستىق) قارىم-قاتىناسىمىزدىڭ ءتىپتى، بولەك كەزەڭى باستالادى.

رەسەي مادەنيەت مينيسترلىگى تاراپىنان كەنەسارى حاننىڭ باس سۇيەگىن قازاقستانعا قايتارۋ جونىندەگى رەسەيلىك ەكسپەرتتىك قۇرامعا شاقىرتۋ الدىم جانە ءوز كەلىسىمىمدى بەردىم. ويتكەنى، كەنەسارى حاننىڭ باس سۇيەگى تابىلدى.

ءدال قازىر حاننىڭ باس سۇيەگىنىڭ قايدان تابىلعانى نەمەسە قازىر قايدا تۇرعانى تۋرالى ەگجەي-تەگجەيلى ايتا المايمىن. بۇل جەردە ديپلوماتيالىق ءھام فورمالدى ماسەلەلەر بار. ال ۇلى حاننىڭ باس سۇيەگىن قازاقستانعا قايتارۋ تۋرالى باستاما رەسەي بيلىگىنىڭ جوعارى لاۋازىمدى تۇلعالارى تاراپىنان بولعانى انىق»، - دەپ جازعان ەدى زيابەك قابىلدينوۆ.

Abai.kz