مەملەكەت باسشىسى قاسىم-جومارت توقاەۆ رەسمي ءىس ساپارمەن الماتى وبلىسىنا باردى. بۇل تۋرالى Abai.kz اقپاراتتىق پورتالى حابارلايدى.

قر پرەزيدەنتىنىڭ ءباسپاسوز حاتشىسى بەرىك ءۋاليدىڭ حابارلاۋىنشا، مەملەكەت باسشىسى الماتى وبلىسىنداعى بىرقاتار وندىرىستىك نىسانداردى ارالاپ، «قايسار-2021» شۇعىل-تاكتيكالىق وقۋ-جاتتىعۋلاردى بارىپ كورەدى دەپ جوسپارلانعان.

«قازاقستان پرەزيدەنتى الماتى وبلىسىنا ساپارى بارىسىندا «قايسار-2021» شۇعىل-تاكتيكالىق وقۋ-جاتتىعۋلارىن كورەدى. سونىمەن قاتار، مەملەكەت باسشىسى مەديتسينالىق قۇرالدار، ءدارى-دارمەكتەر، ازىق-تۇلىك جانە جاعارماي شىعاراتىن بىرقاتار وندىرىستىك كاسىپورىنداردى ارالاپ، جۇمىستارىمەن تانىسادى»، - دەپ جازعان ەدى بەرىك ءۋالي مىرزا Facebook-تاعى رەسمي پاراقشاسىندا.

ال بۇگىن قازاقستان پرەزيدەنتىنىڭ الماتى وبلىسىنداعى رەزيدەنتسياسىندا بىرقاتار ءىس-شارالار وتكىزدى.

سونىمەن، مەملەكەت باسشىسىنىڭ الماتى وبلىسىنا جاساعان ءىس ساپاورى قالاي ءوتتى؟ ءبىز از-كەم شولۋ جاساعان ەدىك...

«قايسار-2021»

پرەزيدەنت قاسىم-جومارت توقاەۆ الماتى وبلىسىنا جاساعان جۇمىس ساپارىنىڭ العاشقى كۇنى «قايسار-2021» جەدەل-تاكتيكالىق وقۋ-جاتتىعۋلارعا باردى. اتالعان ءىس-شارا قر ءىىم قۇرامىنداعى ۇلتتىق ۇلان قۇرىلىمىنىڭ الماتى وبلىسىنداعى جاۋىنگەرلىك جانە ادىستەمەلىك ورتالىعىندا وتكەن.

قر جوعارعى باس قولباسشى ق.ك.توقاەۆ اسكەريلەر الدىندا سويلەگەن سوزىندە قازاقستاننىڭ قۇقىق قورعاۋ ورگاندارىنىڭ ەلىشىك تۇراقتىلىق پەن قاۋىپسىزدىكتى ساقتاۋداعى ەلەۋلى ۇلەسى تۋرالى ايتقان.

«سىزدەردىڭ تاباندى ەڭبەكتەرىڭىزدىڭ ارقاسىندا قوعامدىق قاۋىپسىزدىك بەرىك ورنىقتى. قىلمىسپەن كۇرەس، ەلدىڭ قاۋىپسىزدىگىن جانە ازاماتتاردىڭ قامتاماسىز ەتۋ قامتاماسىز ەتۋ – تاۋەكەلى كوپ جۇمىس. ءتارتىپ ساقشىسى كەز-كەلگەن ۋاقىتتا قاتەرگە دايىن تۇرۋعا ءتيىس. بۇل زور جاۋاپكەرشىلىك پەن توزىمدىلىكتى تالاپ ەتەدى. پوليتسيا قىزمەتكەرلەرى ارقاشان قىراعى ءارى شيراق بولۋى كەرەك. سوندىقتان، وسىنداي وقۋ-جاتتىعۋلار كاسىبي شەبەرلىكتى شىڭداۋ ءۇشىن وتە ماڭىزدى»، - دەدى قاسىم-جومارت توقاەۆ.

سونىمەن قاتار، مەملەكەت باسشىسى قۇقىق قورعاۋ ورگاندارىندا قىزمەت ەتۋدىڭ فيزيكالىق جانە پسيحولوگيالىق قىسىمعا اكەلىپ سوقتىراتىنى تۋرالى دا ايتقان. تاۋەلسىزدىك جىلدارى قىزمەتتىك مىندەتتەرىن ورىنداۋ بارىسىندا ۇزىن-سانى 802 ازامات قازا بولعان ەنكەن. ولار ىشكى ىستەر ورگاندارى مەن ۇلتتىق ۇلان قاتارىنداعى اسكەري قىزمەتشىلەر.

«ولار ءومىرىنىڭ سوڭىنا دەيىن ءوز قىزمەتتەرىنە ادال بولدى. ولاردىڭ ەسىمدەرى ەش ۇمىتىلمايدى. وسىنداي جانقيارلىعى ءھام باتىرلىعى ءۇشىن بارلىعى 1567 قىزمەتكەر وردەندەرمەن جانە مەدالدارمەن ماراپاتتالدى»، – دەدى پرەزيدەنت.

ءارى قاراي، مەملەكەت باسشىسى قۇقىق قورعاۋ ورگاندارىندا قىزمەت ەتەتىن ازاماتتاردىڭ الەۋمەتتىك ماسەلەلەرىنە توقتالعان. پرەزيدەنت توقاەۆتىڭ ايتۋىنشا، الداعى 3 جىلدا ىشكى ىستەر ورگاندارى قىزمەتكەرلەرىنىڭ ەڭبەكاقىسى 30 پايىزعا وسەتىن بولادى. بۇل ماقساتتا بيۋدجەتتەن 100 ملرد تەڭگەدەن استام قاراجات قاراستىرىلعان ەكەن.

2021-2023 جىلدارى وفيتسەرلەردىڭ جالاقىسى 70 پايىزعا كەلىسىمشارت بويىنشا قىزمەت ەتىپ جاتقان اسكەريلەردىڭ جالاقىسى 60 پايىزعا وسەدى. ال 2024 جىلدىڭ سوڭىنا دەيىن ارنايى كۇشتەر اسكەريلەرى مەن كەلىسىمشارت بويىنشا قىزمەت ەتەتىن اسكەريلەردىڭ بارلىعى وفيتسەر شەنىن الاتىن بولادى.

«جىل سايىن اسكەريلەردىڭ تۇرعىن ءۇي ماسەلەسىن شەشۋ ءۇشىن قوماقتى قاراجات جۇمسالىپ كەلەدى. قازىرگى ۋاقىتتا 24 مىڭ پوليتسيا قىزمەتكەرى مەن 13,5 مىڭنان استام اسكەري قىزمەتشىگە تۇرعىن ءۇي تولەمدەرى بەرىلىپ تۇرادى. قوعامدىق ءتارتىپ پەن قاۋىپسىزدىكتى كۇزەتەتىن قىزمەتكەرلەرگە جان-جاقتى الەۋمەتتىك قولداۋ كورسەتۋ ءبىزدىڭ مەملەكەتىمىزدىڭ باسىمدىقتارىنىڭ ءبىرى بولىپ قالا بەرەدى»، – دەدى قازاقستان پرەزيدەنتى.

مەملەكەت باسشىسى قاسىم-جومارت توقاەۆ ءسوز سوڭىندا قۇقىق قورعاۋ ورگاندارىنا بەرىلەتىن ەڭ ءادىل باعا – حالىقتىڭ العىسى ەكەنىن اتاپ ءوتتى.

«ءتارتىپ ساقشىسى دەگەن ابىرويلى اتقا لايىق بولۋ كەرەك. سىزدەرگە بەرىلەتىن ەڭ جوعارى باعا – حالىقتىڭ سەنىمى مەن العىسى. ىشكى ىستەر ورگاندارىنىڭ قىزمەتكەرلەرى وسى سەنىمدى اقتايدى دەپ سەنەمىن»، – دەدى مەملەكەت باسشىسى.

312 ملرد تەڭگەنىڭ ينۆەستيتسياسى ءھام 40 مىڭ جۇمىس ورنى

ونان سوڭ پرەزيدەنت توقاەۆ الماتى وبلىسىندا ورنالاسقان «مارەۆەن فۋد تيان-شان» جشس جۇمىسىمەن تانىستى.

اتالعان كومپانيا 4,5 گەكتار اۋماقتى الىپ جاتقان وڭىردەگى ءىرى كاسىپورىن. وعان 30 ملرد تەڭگەگە جۋىق ينۆەستيتسيا سالىنعان. كومپانيا جاپونيا، شۆەيتساريا جانە گەرمانيادان اكەلىنگەن يننوۆاتسيالىق قۇرىلعىلار ارقىلى تەز دايىندالاتىن ازىق-تۇلىك ونىمدەرىن  شىعارادى. جىلدىق كولەمى 85 مىڭ توننا. ونىمدەرىنىڭ باسىپ بولىگى شەتەلدەرگە ەكسپورتتالادى. اتالعان كاسىپورىندا ۇزىن-سانى 670 ادام جۇمىسپەن قامتىلعان ەكەن.

پرەزيدەنت توقاەۆقا ءوڭىردىڭ ەكونميكالىق احۋالى جايلى ەسەپ بەرگەن وبلىسى اكىمى اماندىق باتالوۆ مىرزا، ايماق ەكونوميكاسىنا 312 ملرد تەڭگەنىڭ ينۆەستيتسياسى تارتىلىپ، 40 مىڭ جۇمىس ورنى اشىلعان. بيىلدىڭ وزىندە وڭىردە 112 ملرد تەڭگەنىڭ 65 جوباسى جۇزەگە اسىرىلىپ جاتىر ەكەن.

«لۋكويل لۋبريكانتس ورتالىق ازيا» جشس

ءارى قاراي مەملەكەت باسشىسىنىڭ ءىس-ساپارى الماتى وبلىسىنىڭ ىلە اۋدانىندا جالعاستى. وندا پرەزيدەنت «لۋكويل لۋبريكانتس ورتالىق ازيا» جشس جاعارماي شىعاراتىن زاۋىتىندا بولدى. اتالعان كاسىپورىن جىلىنا 100 مىڭ توننا جاعارماي وندىرەلدى ەكەن. جالپى سانى 225 ادامدى جۇمىسپەن قامتيدى. ينۆەستيتسيالىق قۇنى – 94 ميلليون دوللاردى قۇرايدى.

ونان سوڭ، پرەزيدەنت قاسىم-جومارت توقاەۆ «Dolce» كاسىپورنىنىڭ جۇمىسىمەن تانىستى. اتالعان كاسىپورىن 1998 جىلدان بەرى قازاقستان نارىعىندا جۇمىس ىستەپ كەلەدى. بۇگىندە وندا 372 ادام ەڭبەك ەتىپ جاتىر. كاسىپورىن 160-تان استام ءونىم شىعارادى. ولاردىڭ اراسىندا قازىرگى ۋاقىتتا اسا قاجەت مەديتسينالىق قولعاپتار، ءۇش جانە ءتورت قاباتتى بەتپەردەلەر، حالاتتار، ءدارى-دارمەكتەر بار.

الماتى وبلىسىنىڭ 60 پايىز حالقى ەكپە العان

وبلىس اكىمىنىڭ ەسەبىنشە، وبلىس حالقىنىڭ 649 مىڭ تۇرعىنى ەكپەنىڭ ءى كومپونەنتىن، 510 مىڭى II كومپونەنتىن سالدىرعان. بۇل وبلىس حالقىنىڭ 60 پايىزى ەكپە العان دەگەندى بىلدىرەدى.

ايتا كەتەيىك، الماتى وبلىسىندا كوۆيد ىندەتىنىڭ الدىن الۋ ءۇشىن اتقارىلعان ءىس-شارالار اياسىندا 200 ورىندىق جۇقپالى اۋرۋلار اۋرۋحاناسى سالىنىپ، پايدالانۋعا بەرىلگەن. قوسىمشا 180 جەدەل جاردەم كولىگى مەن 12 جىلجىمالى مەديتسينالىق كەشەن ساتىپ الىنعان. وبلىستاعى 17 اۋرۋحانا وتتەگى اپپاراتتارىمەن، توسەك-ورىنداردىڭ 45 پايىزى وكسيگەنوتەراپيامەن قامتىلعان.

ءىس-ساپار سوڭىندا مەملەكەت باسشىسى قاسىم-جومارت توقاەۆ وڭىردەگى اتقارىلىپ جاتقان ءىس-شارالارعا وڭ باعا بەرىپ، ۆاكتسيناتسيالاۋ ءىسىن جەدەلدەتۋدى، ەپيدەميولوگيالىق جاعدايدى باقىلاۋدا ۇستاۋدى تاپسىردى.

Abai.kz