وزبەكستان، قىرعىزستان، تاجىكستان اراسىنداعى شەشىلمەگەن شەكارا ماسەلەسى ورتا ازياداعى وزەكتى تاقىرىپ. قىرعىز بەن تاجىك اراسىنداعى شەكارانىڭ 60% عانا شەشىلگەن. وزبەك پەن قىرعىز اراسىنداعى 2021 جىلدىڭ مامىر ايىنداعى كەلىسسوز بويىنشا كەمپىر-اباد سۋ قويماسى وزبەكستانعا ءوتىپ، وزبەكتەر قىرعىز اعايىنعا شەكارا ماسەلەسىندە بەلگىلى جەڭىلدىكتەر جاساپ، ەكى ەل ءتىل تابىسقانداي بولعان. بىراق ارتىنشا قىرعىز حالقى كوتەرىلىپ سۋ قويماسىن بەرمەيمىز دەگەن ميتينگ ءوتتى. قىرعىز باسشىلىعى سۋ قويماسى قىرعىزستان تاراپىندا قالادى دەپ ەلدى تىنىشتاندىردى.

وسى جىلى تاجىكستان مەن قىرعىزستان اراسىندا 2-3 كۇندىك سوعىس تا ورىن الدى. ماسەلەنى 1990 جىلدارى شەشىپ تاستاعاندا قازىر وڭاي بولۋشى ەدى. ءۇش مەملەكەت ءۇشىن دە بۇل داۋلى ايماقتاردى شەشۋ پروتسەسى 20-30 جىلعا سوزىلادى دەپ ويلايمىن. ۇكىمەتى قول قويسا حالقى كەلىسپەي ءبىراز داۋ-دامايعا ۇلاساتىن ءتۇرى بار.

ماماندار الداعى 20-30 جىلدا ورتا ازياداعى سۋ ماسەلەسى ءبىرىنشى كەزەكتەگى سۇراققا اينالادى دەپ بولجاۋدا. كليماتتىڭ وزگەرۋىنە وراي وڭتۇستىك وڭىرلەردە قار جاۋمايتىن قالالار، ايماقتار كوبەيەدى. قۋاڭشىلىق ارتادى. بۇل سۋ رەسۋرستارىنا دەگەن قاجەتتىلىكتى ارتتىرىپ، ءار مەملەكەت وزىنە تارتاتىنى انىق. مەنىڭ ويىمشا ماسەلەنى قازىردەن شەشىپ الماسا ورتا ازيا ءۇشىن بۇل دا كەلەشەكتە كۇردەلى سۇراققا اينالادى.

باۋىرجان سەرىكباەۆ

Abai.kz