بۇگىن ءماجىلىس «كاسپي تەڭىزىن قورعاۋ جونىندەگى نەگىزدەمەلىك كونۆەنتسياعا بيولوگيالىق ارالۋاندىلىقتى ساقتاۋ تۋرالى حاتتامانى راتيفيكاتسيالاۋ ماسەلەسى» قاراستىرعان. وعان جۋىردا عانا مينيستر بولىپ تاعايىندالعان قر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ تە قاتىسقان.

مينيسترلىك ۇسىنعان حالىقارالىق قۇجاتتى تالقىلاۋ بارىسىندا دەپۋتات جاناربەك ءاشىمجان بايانداما جاساۋشى مينيسترگە بىرنەشە سۇراق قويعان (قازاق تىلىندە) جانە بارلىق سۇراققا مەملەكەتتىك تىلدە جاۋاپ بەرۋدى سۇراعان.

بىراق، مينيستر برەكەشەۆ ءوز ويىم مەملەكەتتىك تىلدە جەتكىزە المايتىنىن ايتىپ, ورىسشا جاۋاپ بەرۋدى سۇراعان.

«سۇراعىڭىزعا راقمەت، مەملەكەتتىك تىلدە جاۋاپ بەرۋگە كىشكەنە قينالامىن. قازاقشا بىلمەگەندىكتەن ەمەس، ءوز ويىمدى تولىق جەتكىزۋ ءۇشىن ورىس تىلىندە جاۋاپ بەرەيىن»، - دەدى برەكەشەۆ، سوزبە-ءسوز.

ونان سوڭ توراعا نۇرلان نىعماتۋلين مينيستر برەكەشەۆكە ەسكەرتۋ جاساپ، كەلەسى كەلگەندە قازاقشا سۇراققا قازاق تىلىندە جاۋاپ بەرۋگە دايىندالۋدى تاپسىرعان.

«ءسىز بىزگە ءبىرىنشى رەت كەلىپ وتىرسىز، دەپۋتاتتىڭ قويعان سۇراعى دا ۇلكەن كۇردەلى ماسەلە. ءسىز پارلامەنتكە كەلىپ وتىرسىز. سوندىقتان ەندىگىدە قازاق تىلىندە قويىلعان سۇراققا قازاق تىلىندە جاۋاپ بەرۋىڭىز كەرەك. شەتەلدە وقىدىڭىز، اعىلشىن ءتىلىن بىلەسىز. ەندى تۋعان ەلدە ءجۇرسىز، وعان قوسا ءمينيسترسىز، سوندىقتان قازاق تىلىندە سويلەۋ كەرەك. كەلىستىك پە؟»، - دەدى نىعماتۋلين.

مينيستر: «تۇسىنىكتى، مىندەتتە تۇردە»، - دەپ جاۋاپ بەردى.

ەسكەرتە كەتەيىك، مينيستر سەرىكقالي برەكەشەۆ ۇكىمەتتەگى قازاق تىلىندە سويلەۋدەن قاشقاقتايتىن العاشقى مينيستر ەمەس.

سەرىكقالي امانعاليۇلى برەكەشەۆ قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ءمينيسترى لاۋازىمىنا 10 قىركۇيەكتە تاعايىندالعان. ول بۇعان دەيىن اتالعان مينيسترلىكتە ۆيتسە-مينيستر قىزمەتىن اتقارعان.

Abai.kz