سەناتور نۇرتورە ءجۇسىپ پرەمەر-ءمينيستردىڭ اتىنا جولداعان دەپۋتاتتىق ساۋالىندا جۋرناليستەردىڭ مارتەبەسىن زاڭنامالىق كوتەرۋ قاجەتتىلىگىن كوتەردى.

دەپۋتاتتىڭ ايتۋىنشا، ءجۋرناليستىڭ قوعامداعى ورنى زاڭ جۇزىندە انىقتالماعان. «باق تۋرالى» زاڭدا جانە ەلىمىزدىڭ ەڭبەك كودەكسىندە جۋرناليستەردىڭ مارتەبەسى مەن كەپىلدىكتەرى تۋرالى باپتار جوق. سالالىق زاڭدا جۋرناليستەردىڭ قۇقىقتارى مەن مىندەتتەرى عانا جازىلعان. مۇنىڭ ءبارى جۋرناليستەردىڭ وتە جاۋاپتى جانە قاۋىپتى جۇمىسىن ەسكەرمەۋ.

نۇرتورە ءجۇسىپ وتاندىق جۋرناليستيكانى دامىتۋ ءۇشىن جۋرناليستەردىڭ مارتەبەسىن كوتەرۋ، ولاردى الەۋمەتتىك كەپىلدىكتەرمەن جانە قورعاۋمەن قامتاماسىز ەتۋ ماڭىزدى ەكەنىن اتاپ ءوتتى. سەناتور پاندەميا كەزىندە جۋرناليستەر دارىگەرلەرمەن، پوليتسەيلەرمەن جانە قۇتقارۋشىلارمەن تەڭ دارەجەدە جۇمىس ىستەگەنىن، بىراق ولاردان ايىرماشىلىعى – باق قىزمەتكەرلەرى بۇل ءۇشىن ەشقانداي قوسىمشا اقى جانە الەۋمەتتىك كەپىلدىك الماعانىن ەسكە سالدى. جۋرناليستەر جەڭىلدىكتى ساناتتار قاتارىندا تۇرعىن ءۇي الۋعا ۇمىتكەر بولا المايدى. سەبەبى ولار مەملەكەتتىك قىزمەتكەر دە، ازاماتتىق قىزمەتكەر دە ەمەس.

«جۋرناليستەرگە سوت، پروكۋراتۋرا، ىشكى ىستەر، ادۆوكات، نوتاريۋس سياقتى ناقتى مارتەبە بەرەتىن كەز كەلدى.بۇقارالىق اقپارات قۇرالدارىنىڭ ىقپالىنسىز قوعامدى دەموكراتيالاندىرۋ مۇمكىن ەمەس. سوندىقتان بۇقارالىق اقپارات قۇرالدارى قىزمەتكەرلەرىن ارنايى الەۋمەتتىك مارتەبە  ارقىلى قولداۋدى ءارى قورعاۋدى ۇسىنامىز. بۇل ءۇشىن  «جۋرناليست مارتەبەسى تۋرالى» ارنايى زاڭ قابىلداۋ قاجەت دەپ ويلايمىن»،- دەدى دەپۋتات ءوز ساۋالىندا.

Abai.kz