قىركۇيەكتىڭ ورتاسىندا پارلامەنتتىڭ تومەنگى پالاتاسى قازاقستاندا وكىلدىگى جوق الەۋمەتتىك جەلىلەردى بۇعاتتاۋ تۋرالى زاڭ جوباسىنا تۇزەتۋدى ءبىرىنشى وقىلىمدا ماقۇلداعان. تۇزەتۋ قوعامدا ءتۇرلى پىكىر تۋعىزعان.
پەتيتسيا اۆتورلارىنىڭ پىكىرىنشە، زاڭعا ەنەتىن تۇزەتۋلەر تسەنزۋرانى كۇشەيتىپ، اقپارات الۋ ەركىندىگىن شەكتەيدى. Facebook, Instagram, Telegram, Whatsapp جانە وزگە دە تانىمال الەۋمەتتىك جەلىلەردىڭ ەركىن پايدالانىلۋىنا بوگەت جاسايدى.
پەتيتسيا اۆتورلارى زاڭ جوباسىنداعى تومەندەگىدەي وزگەرىستەرگە قارسى:
- شەتەلدىك ينتەرنەت-پلاتفورما، الەۋمەتتىك جەلى مەن مەسسەنجەرلەردى قازاقستاندا تىركەۋگە مىندەتتەۋ;
- ولاردىڭ وكىلدىكتەرىنە قازاقستان ازاماتتارىن تاعايىنداۋ;
- ەگەر تىركەۋدەن باس تارتسا، جەلىلەر مەن پلاتفورمالاردىڭ جۇمىسىن شەكتەۋ;
- تىركەلگەن وكىلدىكتەر قازاقستاننىڭ وكىلەتتى ورگاندارى تىيىم سالعان نەمەسە شەكتەۋ قويعان اقپاراتتارعا توسقاۋىل قويۋى ءتيىس;
- مەملەكەتتىك ورگانداردىڭ وكىلەتىن كەڭەيتۋ.
ء"بىزدىڭ ويىمىزشا، بۇل وزگەرىستەر قۋدالاۋ سيپاتىنا يە جانە ينتەرنەتتى رەتتەۋ ەمەس، باقىلاۋعا باعىتتالعان. مۇنداي ءىس جۇزىندەگى تسەنزۋرا كونستيتۋتسيا مەن ادام قۇقىعى سالاسىنداعى حالىقارالىق ستاندارتقا قايشى" دەلىنگەن پەتيتسيادا.
ولاردىڭ پىكىرىنشە، Facebook, Telegram سياقتى الەۋمەتتىك جەلىلەر قازاقستاندا وكىلدىكتەرىن تىركەۋدەن باس تارتسا، قازاقستاندىقتار ينتەرنەتتى ەركىن پايدالانۋ مۇمكىندىگىنەن ايىرىلادى. ولاردىڭ ويىنشا، زاڭ شىعارۋ ورگاندارى بۇل وزگەرىستەر كيبەربۋللينگپەن كۇرەس ءۇشىن قاجەت دەپ ايتقانمەن، "اتالعان ءتاسىل ءتيىمسىز", ال بالا قۇقىعىن سىلتاۋراتىپ زاڭدى وتكىزىپ جىبەرۋگە تىرىسۋ "مانيپۋلياتسيا".
بۇل 2019 جىلعى پرەزيدەنت سايلاۋىنان كەيىن ايتىلىپ كەلە جاتقان بيلىكتىڭ رەفورمالار تۋرالى ۋادەلەرىنە دە قايشى. قازاقستاننىڭ ادام قۇقىعى سالاسىندا العان مىندەتتەمەلەرىنە دە كەرەعار، قوعامنىڭ دامۋىن تەجەيدى دەيدى حات اۆتورلارى.
پەتيتسيا اۆتورلارى 15 قازاندا اشىق حات پەن جينالعان قولدى پرەزيدەنت اكىمشىلىگى مەن پارلامەنتكە تاپسىراتىنىن دا ايتادى.
بۇعان دەيىن زاڭعا تۇزەتۋلەردى ء"ادىل ءسوز" ءباسپاسوز ۇيىمى دا سىناپ، اتالعان نورما اقپارات الۋ مەن تاراتۋ، ينتەرنەتتى پايدالانۋ قۇقىعىن شەكتەيدى دەپ مالىمدەگەن.
Abai.kz
