قانشا شەنەۋنىكتىڭ شەتەلدە شوتتارى بار؟
قازاقستاندا مەملەكەتتىك قىزمەتكەرلەردىڭ شەتەلدە قانشا بانكتىك شوتتارى، جىلجىمايتىن مۇلىكتەرى مەن كولىكتەرى بار ەكەنى ەسەپتەلدى، دەپ حابارلايدى LS.
مەملەكەتتىك كىرىستەر كوميتەتى توراعاسىنىڭ ورىنباسارى جايدار ىڭكارباەۆ ەلدەگى جالپىعا بىردەي دەكلاراتسيالاۋدىڭ ءبىرىنشى كەزەڭىن قورىتىندىلادى. وزدەرىنىڭ اكتيۆتەرى مەن مىندەتتەمەلەرى تۋرالى مالىمەتتەردى مەملەكەتتىك قىزمەتشىلەر، ولارعا تەڭەستىرىلگەن ادامدار جانە ولاردىڭ جۇبايلارى (زايىپتارى) ۇسىندى.
"دەكلاراتسيا تاپسىرعان 497 مىڭ تۇلعانىڭ 440-ىنىڭ 58 مەملەكەتتىڭ شەتەلدىك بانكتەرىندە شوتتارى بار. اقشانىڭ جالپى سوماسى 691 ملرد تەڭگەنى قۇرايدى. ولاردىڭ باسىم بولىگى رەسەيدە (140 جەكە تۇلعا), اقش-تا (65) جانە شۆەيتساريادا (38) شوعىرلانعان", - دەپ اتاپ ءوتتى ىڭكارباەۆ.
ونىڭ مالىمەتىنشە، 494 ادام قازاقستاننان تىس جەرلەردە، 26 ەلدە 666 جىلجىمايتىن مۇلىك وبەكتىسىن دەكلاراتسيالاعان. ونىڭ 436-سى رەسەيدە، 44- ءى ءباا-دە، 38-ءى تۇركيادا.
"1030 جەكە تۇلعا 49 شەت ەلدە 1198 كولىك قۇرالىن دەكلاراتسيالاعان. ونىڭ ىشىندە 292 – رەسەيدە، 235– ارمەنيادا، 221 – جاپونيادا، 162 – گەرمانيادا", - دەپ حابارلادى مكك وكىلى.
ىڭكارباەۆتىڭ مالىمەتىنشە، 47 جەكە تۇلعانىڭ شەتەلدەگى جەكە قۇرىلىمداردا ۇلەسى – رەسەيدە، ءباا-دە، كيپردە. جانە دە 11 ەلدە 1603 جىلجىمايتىن مۇلىك وبەكتىسىنىڭ ۇلەسى بار، ونىڭ ىشىندە 1568 – قازاقستاندا.
سپيكەر، سونداي-اق، قازاقستاندىق شەنەۋنىكتەردىڭ باسقا دا اكتيۆتەرى تۋرالى دەرەكتەردى كەلتىردى. وسىلايشا، 116 ادام ينۆەستيتسيالىق التىندى، 918 – 25 ەلدەگى باعالى قاعازداردى دەكلاراتسيالادى، 608-ءى 635 ينۆەستيتسيالىق قوردا پايلارعا يە، 212-ءسى 218 زياتكەرلىك مەنشىك نىسانى مەن اۆتورلىق قۇقىق، 355 – دەبيتورلىق بەرەشەك، 578-ءى كرەديتورلىق، دەپ ءتۇسىندىردى ىڭكارباەۆ.
ول 2025 جىلعا قاراي جالپىعا بىردەي دەكلاراتسيالاۋمەن قازاقستاننىڭ بارلىق تۇرعىندارى قامتىلاتىنىن ەسكە سالدى.
"مەملەكەتتىك قىزمەتشىلەردىڭ ءبىر بولىگى دەكلاراتسيانى دا ۇسىنادى، بىراق تابىستار مەن جىلجىمايتىن مۇلىك وبەكتىلەرىن كورسەتپەۋ ءۇشىن ولاردى ءوز تۋىستارىنا، تانىستارىنا جانە ت.ب. تىركەيدى، سوندىقتان بىزدە 2025 جىلعا دەيىن حالىقتىڭ بارلىق توپتارى كەزەڭ-كەزەڭىمەن قامتىلاتىن بولادى. وسىلايشا، مۇنداي سحەمالار مەن مانيپۋلياتسيالارعا جول بەرىلمەيدى", - دەدى ىڭكارباەۆ.
Abai.kz
