2021 ج. 30 قىركۇيەكتە ساع. 16.00- دە ورتالىق كوممۋنيكاتسيالار قىزمەتىنىڭ الاڭىندا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەڭەيتىلگەن وتىرىسى ءوتتى.

وتىرىسقا پارلامەنت دەپۋتاتتارى، ۇلتتىق كوميسسيا مۇشەلەرى، ورتالىق مەملەكەتتىك جانە جەرگىلىكتى اتقارۋشى ورگانداردىڭ، ۇكىمەتتىك ەمەس ۇيىمدار مەن باق وكىلدەرى قاتىستى.

وتىرىستى اشاردا ۇلتتىق كوميسسيا ءتورايىمى لاززات رامازانوۆا مەملەكەت باسشىسىنىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا قويىلعان مىندەتتەر مەملەكەتتىك جانە جەرگىلىكتى اتقارۋشى ورگانداردان قازاقستاندىق وتباسىلاردىڭ ءال-اۋقاتىن جاقسارتۋ جانە ايەلدەردىڭ قۇقىقتارى مەن مۇمكىندىكتەرىن كەڭەيتۋ ءۇشىن جوعارى جاۋاپكەرشىلىك پەن ۇيلەسىمدى ءىس-قيمىلدى تالاپ ەتەتىنىن اتاپ ءوتتى.

«وتباسى ءال-اۋقاتىنىڭ ماسەلەلەرى، تۇرمىستىق زورلىق- زومبىلىقتىڭ جۇيەلى الدىن الۋ بويىنشا قوعامدىق ۇيىمدارمەن ءتيىمدى ءوزارا ءىس-قيمىل جاساۋ، ومىرلىك قيىن جاعدايعا تاپ بولعان ازاماتتارعا ۋاقتىلى كومەك كورسەتۋ - بۇل ماسەلەلەر ۇلتتىق كوميسسيا جۇمىسىندا باسىم بولىپ قالا بەرەدى»، - دەپ اتاپ ءوتتى لاززات رامازانوۆا.

وتىرىستا 5 وڭىردە: نۇر-سۇلتان، شىمكەنت قق.، الماتى، شىعىس قازاقستان جانە ماڭعىستاۋ وبلىستارىندا «وتباسىنداعى زورلىق-زومبىلىقسىز قازاقستان» پيلوتتىق جوباسىنىڭ ىسكە اسىرىلۋ بارىسى تۋرالى اقپارات تىڭدالدى. جوبانىڭ ماقساتى - وتباسى ينستيتۋتىن نىعايتۋ جانە وتباسىلىق-تۇرمىستىق سالاداعى قۇقىق بۇزۋشىلىقتى ازايتۋ.

تۇرمىستىق زورلىق-زومبىلىقتىڭ الدىن الۋ جۇيەسىنىڭ جاي-كۇيىن تالداۋ ءاربىر ەكىنشى قىلمىس ماس كۇيىندە جاسالاتىنىن، زاڭسىز ارەكەتتەردىڭ 70-75% تۇرعىن ءۇي-جايلاردا ورىن الاتىندىعىن كورسەتتى. 80% جاعدايدا زورلىق - زومبىلىق سۋبەكتىلەرى بولىپ ەرلى-زايىپتى نەمەسە ازاماتتىق نەكەدە تۇرعان ادامدار، 20% - وزگە تۋىستىق قاتىناستاعى ادامدار بولىپ تابىلادى.

جۇرگىزىلىپ جاتقان جۇمىسقا قاراماستان، شەشۋدى تالاپ ەتەتىن بىرقاتار پروبلەمالار بار. اۋماقتاردى دامىتۋ جوسپارلارىندا وتباسى ينستيتۋتىن نىعايتۋ جانە تۇرمىستىق زورلىق-زومبىلىقتىڭ الدىن الۋ ماسەلەلەرى بويىنشا ءتۇيىندى نىسانالى ينديكاتورلار جوق ەكەنى انىقتالدى. جەرگىلىكتى اتقارۋشى ورگانداردىڭ قۇزىرەتى ناقتىلانباعان. الدىن الۋ جۇيەسىنە ادىلەت، مادەنيەت جانە سپورت، ىشكى جانە جاستار ساياساتى ورگاندارى تارتىلماعان.

«جۇيەلى مونيتورينگتى ەنگىزۋ، الەۋمەتتىك قولايسىزدىق پەن تۇرمىستىق زورلىق - زومبىلىق ماسەلەلەرى بويىنشا ۆەدومستۆوارالىق ءوزارا ءىس-قيمىلدى جانە جەدەل دەن قويۋ تەتىكتەرىن نىعايتۋ قاجەت»، - دەپ اتاپ ءوتتى لاززات رامازانوۆا.
ەڭبەك جانە حالىقتى الەۋمەتتىك قورعاۋ مينيسترلىگى مەن ستراتەگيالىق جوسپارلاۋ جانە رەفورمالار جونىندەگى اگەنتتىگى ۇلتتىق ستاتيستيكا بيۋروسىنىڭ وڭىرلەردەگى وتباسىلاردىڭ ءال-اۋقاتىنا مونيتورينگ جۇرگىزۋ ناتيجەلەرى جانە قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىنىڭ ينديكاتورلارىن ەسەپتەۋ ادىستەمەسى تۋرالى اقپاراتى تىڭدالدى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتى بويىنشا، «وتباسىنىڭ تسيفرلىق كارتاسىن» ەنگىزۋ جوسپارلانۋدا. ەلىمىزدىڭ 19 ملن. تۇرعىنىنا تالداۋ جۇرگىزىلدى، 5 ملن. 341 مىڭ وتباسىنىڭ تسيفرلىق كارتالارى قالىپتاستىرىلدى. بۇگىنگى تاڭدا وتباسىلاردىڭ 2,7 ملن. نەمەسە 50,6%-ى قولايلى جانە جاقسى دەڭگەيگە جاتادى. اتاۋلى الەۋمەتتىك كومەكپەن قامتۋ 2020 جىلدىڭ ۇقساس كەزەڭىمەن سالىستىرعاندا 186,2 مىڭ وتباسىنا دەيىن نەمەسە 891,1 مىڭ ادامنان استام ءوستى، ءوسىم 25%-دى قۇرادى.

قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ شەڭبەرىندە ۇلتتىق ستاتيستيكا بيۋروسى 9 نىسانالى ينديكاتور بويىنشا ەسەپتەۋ ادىستەمەسىن ازىرلەدى. ول وتباسىلىق جانە گەندەرلىك ساياساتتى ىسكە اسىرۋ تيىمدىلىگىنىڭ نەگىزگى كورسەتكىشتەرىن قالىپتاستىرۋ ءتارتىبىن جۇيەلەندىرۋگە، دەرەكتەردى جيناۋ، ۇسىنۋ جانە ولاردى ساقتاۋ ءۇشىن ۋاكىلەتتى مەملەكەتتىك ورگانداردىڭ جاۋاپكەرشىلىگىن بەكىتۋگە مۇمكىندىك بەرەدى.

وتىرىس سوڭىندا قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى لاززات رامازانوۆا مەملەكەتتىك ورگاندارعا بىرقاتار ناقتى ۇسىنىستار بەردى.

Abai.kz