ديسسيدەنت ارون اتابەك بەس كۇن بۇرىن پاۆلودار تۇرمەسىنەن بوساپ، الماتىعا كەلگەندە ونىمەن العاش بولىپ كەزدەسكەندەردىڭ ءبىرى ايسۇلۋ ابۋباكىروۆانىڭ (الەۋمەتتىك جەلىدە "اسيا اسەتكينا" دەگەن اتپەن بەلگىلى) ايتۋىنشا، تۇرمەدەن جوتەلىپ كەلگەن اتابەكتىڭ جوتەلى بۇگىن ۇدەي تۇسكەن. جوتەل توقتاماعان سوڭ الماتىدا قارىنداسىنىڭ ۇيىندە جاتقان اتابەككە جاقىندارى جەدەل جاردەم شاقىرتقان. دارىگەرلەر قانداعى ساتۋراتسياسىن ولشەپ، تومەن ەكەنىن كورىپ، بىردەن اۋرۋحاناعا الىپ كەتكەن.
ارون اتابەكتىڭ قارىنداسى ءرازيا نۋتۋشەۆانىڭ ازاتتىققا ايتۋىنشا، اقىننىڭ وكپەسى تارىلعان، "جوتەلۋگە ءالى جوق". ونىڭ ايتۋىنشا، اعاسىنىڭ دەرتى Covid-كە ۇقسامايدى، بىراق "وكپەسىنە سۋ جينالعان سياقتى". جەدەل جاردەم دارىگەرلەرى اتابەكتىڭ جاعدايى اۋىر دەپ، ونى وتتەگى اپپاراتىنا قوسقان.
1 قازاندا پاۆلوداردىڭ №2 سوتى ارون اتابەك دەنساۋلىق جاعدايىنا بايلانىستى جازاسىنىڭ قالعان بولىگىن شارتتى تۇردە وتەسىن دەگەن قاۋلى شىعارعان. سول كۇنى تۇندە ونى جولاۋشى ۇشاعىمەن الماتىعا جەتكىزىپ، ارون اتابەكتى قارسى الۋعا اۋەجايعا جينالعان جۇرتقا كورسەتپەي، ۇشاقتان بىردەن ۇيىنە اپارعان.
ارون اتابەك 2006 جىلعى "شاڭىراق وقيعاسىنان" كەيىن 18 جىلعا سوتتالىپ، 15 جىلدان استام ۋاقىتىن تۇرمەدە وتكىزدى. قۇقىق قورعاۋشىلار ونى "ساياسي تۇتقىن" دەپ تانىعان. تۇرمەدە وتىرعاندا ول بيلىكتەن ءوزىن تولىق اقتاۋىن تالاپ ەتىپ، شارتتى تۇردە بوستاندىققا شىعۋ تۋرالى ءوتىنىش جازۋ تۋرالى ۇسىنىستان بىرنەشە رەت باس تارتقان.
بيىل اقپاندا ەۋروپارلامەنت قازاقستانداعى ادام قۇقىعى احۋالى جايلى قابىلداعان قارارىندا نۇر-سۇلتاندى ەلدە تۇرمەدە وتىرعان ساياسي تۇتقىنداردى بوساتۋعا ۇندەگەن. ەۋروپارلامەنت دەپۋتاتتارى ولاردىڭ اراسىندا ارون اتابەكتى دە اتاعان.
اقىن ءارى ديسسيدەنت ارون اتابەكتىڭ تۋىستارى 2 قازاندا مالىمدەمە جاساپ، وندا ءوزىن تولىق اقتاۋدى تالاپ ەتكەن 68 جاستاعى تۇتقىندى اۋرۋحانادان اۋەجايعا "الداپ جەتكىزىپ، الماتىعا اتتاندىرۋعا اسىق بولعان" بيلىكتى سىناعان. ازاماتتىق قوعامنان اقىننىڭ بوستاندىعىن شەكتەيتىن ۇكىمنىڭ كۇشىن جويىپ، كوپ جىل بويى تۇرمەدە ازاپ كورىپ، دەنساۋلىعى مۇشكىل حالگە جەتكەن اقىندى ەمدەتۋ ءۇشىن ەش كەدەرگىسىز تەزىرەك شەتەلگە جىبەرۋگە جاردەم سۇراعان.
Abai.kz
