بۇگىن كيەۆتە ۋكراينا - ەۋرووداق ءسامميتى وتەدى.
وندا ەكەۋارا قارىم-قاتىناس تولىق رەۆيزيا جاسالاتىن بولادى، ۋكراينانىڭ جالپى ەۋروپالىق پەرسپەكتيۆاسى قۋاتتالادى.

سامميتتە "اشىق اسپان" كەلىسىمىنە قول قويىلادى. بۇل ۋكرايناعا جاڭا لوۋكوست-اۋەجولدارىن اشىپ، پاسساجير اعىنىن كۇشەيتەدى، ول ءوز كەزەگىندە ەكونوميكانى كوتەرەدى، تۋريزم سالاسى دامىپ، بيلەت باعاسى ارزاندايدى.
كەلىسىم سونداي-اق ىشكى اۋەجولدارى نارىعىنا كەيبىر شەكتەۋلەردى الىپ تاستايدى، ونى ەو نارىعىمەن بايلانىستىرادى. ۋكراينا وزىنە ەو-نىڭ اۆياتسيالىق ستاندارتتارىن قابىلداۋعا مىندەتتەنەدى جانە بۇدان بىلاي ەۋروپالىق اۆياتسيا ەرەجەلەرىمەن جۇرەتىن بولادى (ساقتاندىرۋ تولەۋ، كومپەنساتسيالار).

ەۋرووداق ۋكراينا ءۇشىن 6,5 ملرد ەۋرو ينۆەستيتسيالىق پاكەتتى ىسكە قوسادى.
سونداي-اق انتيكوررۋپتسيالىق زاڭ مەن سوت رەفورماسىن نەلىكتەن سابوتاج جاساپ جاتقاندىعى تۋرالى ۋكراينادان قاتاڭ سۇرالاتىن بولادى.
كورىپ وتىرعانىمىزداي، باسقا ەلدەر مىسىقتابانداپ دامىپ جاتىر، قىزىققاننان ءىشىڭ ۋداي اشيدى. ال ءبىز نە ىستەپ وتىرمىز؟ رەسەي بولماسا ولە قالاتىنداي، سودان قورىققاندىقتان الدىمىزداعى اسىمىزدى دا دۇرىس ىشە الماي وتىرمىز. نە بولار ەكەنبىز؟ مىسالى ون جىلدان كەيىن؟

قۋانىش ەدىلحانتەگى

Abai.kz