ۋكراينادا زەلەنسكي سايلانعالى 2,5 جىل، ياعني جارتى مەرزىمى ءوتتى، سويتە تۇرا ول ءۇشىن "بال ايى" اياقتالدى. كەشە رەسپوندەنتتەر اراسىندا كەزەكتى سۇراۋ سالۋ ناتيجەسى جاريالاندى. ول بويىنشا زەلەنسكيدىڭ "سلۋگا نارودا" پارتياسى ەكىنشى ورىنعا ءتۇستى. العاش رەت بۇرىنعى پرەزيدەنت پوروشەنكونىڭ "ەۆروپەيسكايا سوليدارنوست" پارتياسى الدىڭعى ورىنعا شىقتى. ياعني حالىقتىڭ كوڭىل-كۇيى وزگەرە باستادى دەگەن ءسوز. حالىق كىمنىڭ دوس، كىمنىڭ قاس ەكەنىن ايىرا باستاعانداي.

پوروشەنكونى وليگارح، ءىشىپ قويدى-جەپ قويدى، اناۋ-مىناۋ دەپ بارىنشا سوتتاۋعا تىرىسىپ ەدى، ونىسىنان تۇك تە شىقپادى، اققا كۇيە جاعا المادى. سونداعى قاۋپى وسى ەدى عوي، ءتۇبى ءوزىمدى قۇرتادى دەگەن بولۋى كەرەك. دەگەنمەن ول دا بىزدەن جاقسى، زامانبەك، التىنبەك سياقتى اتىپ تاستاعان جوق.

بۇدان بىلاي ەكى پارتيانىڭ اراسى بىرتىندەپ الشاقتاي بەرۋى ءتيىس مەنىڭشە. پوروشەنكو پارتياسى كەلەسى سايلاۋ قارساڭىندا ءبىرشاما قارا ءۇزىپ كەتۋى مۇمكىن دەپ بولجايمىن. رەسەي تۆ-سىنىڭ الداۋىنا، زەلەنسكيدىڭ وتىرىك ۋادەلەرىنە سەنىپ قالعان اڭقاۋ حالىق ەندى قاتەلەسپەۋى كەرەك، وسىنىڭ ءوزى ءبىرتالاي ساباق بولعان شىعار.

بىزدەگى جاعدايدى ءتىپتى ايتۋدىڭ ءوزى ۇيات. باتىس تۇگىلى ۋكرايناداعى دەموكراتيانىڭ وزىنە جەتۋ مۇڭ-اۋ. قاراڭىزشى، قانشاما پارتيا تىركەلگەن! ماماي ءبارىبىر ايتاتىنىن ايتىپ، جازاتىنىن جازىپ جاتىر، ەندەشە ونىڭ پارتياسىن تىركەي سالۋعا نەسىنەن قورقادى؟ ءبارىبىر سول ايتقاندارىنان اسىرىپ ەشتەڭە دە ايتا الماس، سولاي ەمەس پە؟ قايتا جاقساتتى كورىنبەي مە؟ سونشاما توپاس پا؟ ال سۇراۋ سالۋ تۋرالى ءتىپتى ايتپاي-اق قويسا دا بولادى. ۇياتسىزدار ەكزيت-پولعا تىيىم سالادى دا سايلاۋ قارساڭىندا نۇروتاننىڭ رەيتينگىن جاريالايدى، ماسقارا ەمەس پە؟ ەلدى وزدەرىندەي اقىماق ساناپ ابدەن قۇرتىپ بولدى.

قۋانىش ەدىلحانتەگى

Abai.kz